ސެޕްޓެމްބަރު މަހު ބާއްވާ ރިޔާސީ އިންތިހާބުގައި ޕީޕީއެމްއާއެކު ކޯލިޝަން ހެދުމުގެ ވިސްނުން ނެތް ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ކެންޑިޑޭޓު މުހައްމަދު ނާޒިމް މިއަދު ވިދާޅުވެއްޖެ އެވެ.
އަދަދު" ނޫހުން ގެނެސްދޭ "އެތެރެފުށް" ޕްރޮގްރާމުގައި އިދިކޮޅު ޕީޕީއެމްއާ އެކު ކޯލިޝަނަކުން ފެނިދާނެތޯ ސުވާލުކުރުމުން ނާޒިމް ވިދާޅުވީ، މިވަގުތުގެ ހާލަތަށް ބަލާއިރު، ޕީޕީއެމްއާއެކު ކޯލިޝަނަކަށް ދެވިދާނެ ކަމަށް ގަބޫލު ނުކުރައްވާ ކަމަށެވެ.
"މިވަގުތުގެ މިހާލަތަށް ބަލާއިރުގަ އަޅުގަނޑަކަށް ގަބޫލެއް ނުކުރެވޭ އެކަން ނުރެވިދާނެ ކަމަކަށް. އަޅުގަނޑު މިހުރީ ހަމަ ރިޔާސީ އިންތިހާބުގައި ﷲގެ އިރާދަފުޅާއެކު ހަމަ ވާދަކުރަން،" ނާޒިމް ވިދާޅުވި އެވެ.
ނާޒިމް ވިދާޅުވީ އެކުގައި މަސައްކަތް ކުރާ ކޮންމެ ބަޔަކަށް ވެސް މަރުހަބާ ކިޔާ ކަމަށެވެ. އެހެން ނަމަވެސް އެއްވެސް ޕާޓީއެއްގެ ފަހަތަށް އެރުމުގެ ވިސްނުން ނެތް ކަމަށް ކުރިއަށް އޮތް އިންތިހާބުގައި ވާދަ ކުރައްވާކަން އިއުލާނުކުރައްވާފައިވާ ނާޒިމް ވިދާޅުވި އެވެ.
އެހެން ޕާޓީތަކާއެކު ވެސް މަޝްވަރާކުރެވެމުން އަންނަ ކަމަށް ނާޒިމް ވިދާޅުވި އެވެ. އެހެން ނަމަވެސް ހުރިހާ ޕާޓީއަކުން އެއް ކެނޑިޑޭޓަކު ނެރުމަށް އެއްބަސް ނުވާކަމަށް އޭނާ ވިދާޅުވި އެވެ.
"ކޮންމެ ޕާޓީއެއްގައި ވެސް އެޕާޓީގެ ފަލްސަފާތަކެއް އެބަ އޮވޭ. އެ ފަލްސަފާތައް ދޫކޮށްފައި އެއްވެސް ބަޔަކު ބޭނުމެއް ނުވޭ އެއްވެސް ބައެއްގެ ފަހަތައް އަރާކަށް. އެހެންވީމަ އަޅުގަނޑަށް ހީވަނީ ފުރަތަމަ ބުރަކީ އަޅުގަނޑުމެން ހުރިހާ ޕާޓީތައް ވަކިން ނިކުންނަން ޖެހޭ ބުރެއްކަން،" ނާޒިމް ވިދާޅުވި އެވެ.
ނާޒިމް އިތުރަށް ވިދާޅުވީ އިދިކޮޅު ހުރިހާ ޕާޓީތަކަށް ވެސް އެއްބަސް ވެވޭ ކަމަކީ މިހާރު އޮތް ސަރުކާރު ބަދަލުކުރަން ޖެހޭ ކަން ކަމަށެވެ. އަދި އެހެން ޕާޓީތަކާއެކު ސަރުކާރު ބަދަލުކުރުމަށް މަޝްވަރާ ކުރެވެމުން އަންނަ ކަމަށް ވެސް ވިދާޅުވި އެވެ.
"އަޅުގަނޑުމެން މަޝްވަރާކުރަމުން މިދަނީ. އަދި އެއްވެސް ބޭފުޅެއްގެ ފަހަތައް މަސައްކަތް ކުރުމަކަށް އަދި އެއްބަސްވުމަކަށް ނާދެވޭ،" ނާޒިމް ވިދާޅުވި އެވެ.
ދާދި ފަހުން ދަ ޑިމޮކްރެޓްސް އާއި ޖޭޕީ އަދި ނާޒިމްގެ އެމްއެންޕީ އިން ވަނީ ބައްދަލުކޮށް ޕީޕީއެމްއިން ރުހޭނަމަ ހުރިހާ ޕާޓީއަކުން އެއް ކެނޑިޑޭޓަކު ނެރެން ނިންމާފަ އެވެ. އެހެން ނަމަވެސް ޕީޕީއެމްއިން އެ ހުށަހެޅުން ގަބޫލެއް ނުކުރެ އެވެ. އެޕާޓީއިން ގަބޫލުކުރަނީ ރިޔާސީ ކެނޑިޑޭޓަކީ ކުރީގެ ރައީސް އަބްދުﷲ ޔާމީނު ކަމާއި، އެމަނިކުފާނުގެ ނަން ވޯޓު ކަރުދާހުގައި އޮންނަން ޖެހޭނެ ކަމަށެވެ.
ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެ ހުކުމް ދެމިއޮތްހާ ހިނދަކު ޔާމީނަށް އިންތިހާބުގައި ވާދައެއް ނުކުރެވޭނެ އެވެ. ފަނޑިޔާރަކު ޗުއްޓީގައި ހުންނެވުމުން ހުކުމުގެ އިސްތިއުނާފު ހައި ކޯޓުގައި ހުއްޓުމަކަށް އައިސްފަ އެވެ.
ޕީޕީއެމް/ޕީއެންސީން ޔާމީނަށް ރިޔާސީ ޓިކެޓު ދިން ނަމަވެސް އިއްވާފައިވާ ޖަލު ހުކުމް ދެމިއޮތްހާ ހިނދަކު ޔާމީންގެ ކެންޑިޑެސީ ބަލައިނުގަންނާނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވި އެވެ.
