ސެޕްޓެމްބަރު ނުވައެއްގައި ރާއްޖޭގައި ބާއްވާ ރިޔާސީ އިންތިހާބު އޮބްޒާވްކުރަން އިލެކްޝަންސް ކޮމިޝަން (އީސީ) އިން ހާއްސަކޮށް ދައުވަތު ދިން 15 ގައުމުގެ ތެރޭގައި ނުހިމެނޭ، އަވަށްޓެރި އިންޑިއާއިން އެ އިންތިހާބް އޮބްޒާވްކުރަނީ އަމިއްލައަށް އިސްނަގައިގެން އަމިއްލަ ހަރަދުގައި ކަމަށް އެކޮމިޝަނުން ބުނެފި އެވެ.
އީސީގެ ނައިބުރައީސް އިސްމާއީލް ހަބީބު ވިދާޅުވީ އިންތިހާބް އޮބްޒާވްކުރާ ބައެއް ގައުމުތަކުގެ ވަފުދުތަކުން އެކޮމިޝަނުގެ މެމްބަރުންނާ އެކު ބައްދަލުވުންތައް މިއަދު ބޭއްވީ އިންތިހާބު އޮބްޒާވްކުރުމުގެ އިންތިޒާމްތަކާ ބެހޭ މައުލޫމާދު ސާފުކުރަން ކަމަށެވެ. އިންޑިއާ ސަފީރު ހިމެނޭ އެގައުމުގެ ވަފުދަކުން ބައްދަލުކުރީ ވެސް އެ އުސޫލުން ކަމަށް އޭނާ ވިދާޅުވި އެވެ.
"ހަަމ އެެހެން [ބައެއް] ގައުމުތަކުން ވެސް ހަމަ އެ އަންނަނީތާ ހަމަ، ހަމަ އެ އުސޫލުން އިންޑިއާއިން ވެސް އެ އަންނަނީ. ކޮމަން ވެލްތަކަށް އީޔޫއަކަށް ވެސް އަޅުގަނޑުމެންގެ ހަރަދެއް [މެހްމާންދާރީއެއް] ނެތް،" ހަބީބު ވިދާޅުވި އެވެ.
ހަބީބް ވިދާޅުވި ގޮތުގައި އިންޑިއާއާއި އިންތިހާބް އޮބްޒާވްކުރާ އެހެން ގައުމުތކުގެ ވަފުދުތަކުން ވެސް އީސީއާ އެކު ބޭއްވީ އިންތިޒާމް ތަކާ ބެހޭ މައުލޫމާތު ސާފުކުރުމުގެ ބައްދަލުވުންތަކެކެވެ.
"އިންޑިއާގެ އިލެކްޝަންސް ކޮމިޝަނުގެ ފަރާތުން ދިވެހިރާއްޖޭގެ އިންތިހާބު އޮބްޒާވްކުރުމުގެ ޝައުގުވެރިކަން ފާޅުކުރައްވައި އެކަން އަޅުގަނޑުމެންނަށް އަންގަވާފައި އޮތީ. މި ވާގޮތަކީ [ބައްދަލުވުމެއް ބޭއްވީ] އިންޑިއާގެ އިލެކްޝަން ކޮމިޝަނުގެ ބޭފުޅުން ވަޑައިގަންނަވާ ކަމަށް ވަންޏާ އެބޭފުޅުންނާ ގުޅޭ އިންތިޒާމްތަކަށް، އަޅުގަނޑުމެންނަށް އެ ބޭފުޅުންނަށް ފޯރުކޮށްދެވޭނީ ކޮން ކަމެއްތޯ އާއި، ޕްރޮޓޮކޯލް އޮންނަ ގޮތާ މިކަންކަމުގެ މައުލޫމާތު އެބޭފުޅުން ބޭނުންވާތީ ކޮމިޝަނުގެ ރައީސާ އެ ބައްދަލުކުރެއްވީ. އެހެން ގައުމުތަކުން ވެސް ހަމަ މައުލޫމާތު ސާފުކުރާ އުސޫލުން" ހަބީބް ވިދާޅުވި އެވެ.
އިންޑިއާގެ ވަފުދަކުން އީސީއާ އެކު ބައްދަލުވުމެއް ބޭއްވުމުން ބައެއް ފަރާތްތަކުން ފާޑުކިޔާތީ އެ ފާޑުކިއުންތަކަށް ހަބީބް ރައްދު ދެއްވި އެވެ. އޭނާ ވިދާޅުވީ އިންޑިއާގެ ވަފުދުން ބައްދަލުކުރީ ހަމަ އެކަނި މައުލޫމާތު ސާފުކުރުމަށް ކަމަށާއި އިންތިހާބަށް ނުފޫޒު ފޯރާ ފަދަ ވާހަކައެއް ނުދައްކާ ކަމަށާއި ފޯރުވޭނެ ނުފޫޒެއް ނުވެސް އޮންނާނެ ކަމަށެވެ.
"އެމީހުންނަށް ފޯރުވޭނެ ނުފޫޒެއް ނުވެސް އޮންނާނެ،" ހަބީބް ވިދާޅުވި އެވެ.
އީސީގެ ރައީސް ފުއާދު ތައުފީގު ކުރިން ވިދާޅުވެފައިވާ ގޮތުގައި އެކޮމިޝަނުގެ މެހުމާންދާރީގައި ރާއްޖެއަށް އައިސް އިންތިހާބު އޮބްޒާވްކުރަން ދައުވަތު ދިން ގައުމުތަކުގެ ތެރޭގައި އަވަށްޓެރި ބައެއް ގައުމުތަކެއް ނުހިމެނެ އެވެ. އިންޑިއާ ވެސް ހިމެނެނީ އެ ދައުވަތު ނުދޭ ގައުމުތަކުގެ ތެރޭގަ އެވެ.
