ނިމި ދިޔަ ބޮޑު އީދު ދުވަހު ފަތިހު މަޖީދީ މަގުން ހިނގާފައި ދަނިކޮށް، ބާރު ސްޕީޑެއްގައި ދުއްވާފައި ދިޔަ ސައިކަލަކުން ޖެހި ސީރިއަސް އަނިޔާތަކެއް ލިބުނު އަލީ ހަފީޒު ހޮސްޕިޓަލަށް ގެންދިއުމަށް އެހީތެރިވި މީހުން ހޯދުމުގެ މަސައްކަތް ފުލުހުން ފަށައިފި އެވެ.
ފުލުހުން މިއަދު ބުނީ އެ ރޭ 5:00 ހާއިރު ހިނގި މި އެކްސިޑެންޓުގައި އަނިޔާވި ފަރާތް ހޮސްޕިޓަލަށް ގެންދިއުމަށް އެހީތެރިވި މީހުން ހޯދަނީ ތަހުގީގަށް ބޭނުންވާ ބައެއް މައުލޫމާތު ސާފުކުރުމަށް ކަމަށެވެ.
މޯލްޑިވްސް ނެޝަނަލް ޔުނިވާސިޓީގެ ސީނިއާ ލެކްޗަރާއެއްގެ ވަޒީފާ އަދާ ކުރާ ހަފީޒުގެ ގައިގައި ސައިކަލުން ޖެހުނީ ހީނާމާގެ ޕާކިން ޒޯނު ކަންމަތީގައި ހުންނަ މަސްޖިދުލް އާދިލުން ފަތިސް ނަމާދުކޮށް އެތަނުން ފައިބައިގެން ރެޑްވޭވް ފިހާރައަށް ވަނުމަށް މަގު ހުރަސް ކުރި ވަގުތެވެ.
ސައިކަލުން ޖެހި އޭނާ ސާޅީހަކަށް ފޫޓަށް ވިއްސައިގެން ދިޔަ ކަމަށްވެ އެވެ.
އުމުރުން 50 އަހަރުގެ ހަފީޒަށް ލިބުނު އަނިޔާގެ ސަބަބުން އޭނާގެ ހާލު އަދިވެސް ވަރަށް ގޯހެވެ. އޭޑީކޭ ހޮސްޕިޓަލުގައި އޭނާއަށް ފަރުވާ ދިނުމަށް ފަހު، މި މަހުގެ ހަތަރު ވަނަ ދުވަހު ވަނީ އިންޑިއާއަށް ފޮނުވައިފަ އެވެ.
އެ އެކްސިޑެންޓާ ގުޅިގެން ސައިކަލް ދުއްވަން އިން ޒުވާނާ ވަނީ ހައްޔަރުކޮށްފަ އެވެ. އެ ޒުވާނާގެ އަތުގައި ސައިކަލު ދުއްވުމުގެ ލައިސެންސެއް ނެތެވެ.
