ލ. ގަން ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރުމާއި ގދ. ގައްދޫގައި އާ ހޮސްޕިޓަލެއް އެޅުމުގެ އަމަލީ މަސައްކަތް އަންނަ މަހު ފަށާނެ ކަމަށް އެމްޓީސީސީން ބުނެފި އެވެ.
ގަން ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރުމަށާއި ގައްދޫގައި އާ ހޮސްޕިޓަލު އަޅަން ސްޕެއިންގެ އެޗްއޯއެމްޓީ އެސްޕާނާ ކުންފުންޏާއެކު އެއްބަސްވުމަކަށް އާދެވިފައިވާ ކަމަށް ހެލްތު މިނިސްޓްރީން ބުނީ މިދިޔަ އަހަރުގެ ސެޕްޓެމްބަރު މަހުގެ ތެރޭގަ އެވެ.
މި ދެ ހޮސްޕިޓަލު އިމާރާތް ކުރުމުގެ މަސައްކަތް ޑިޒައިން އެންޑް ބިލްޑް އުސޫލުން ހަވާލުކޮށްފައިވާ އެމްޓީސީސީ އިން މިއަދު ކުރި ޓްވީޓެއްގައި ބުނެފައިވަނީ، އެ މަޝްރޫއުގެ އަމަލީ މަސައްކަތް ފެށުމަށް އެ ކުންފުނިން ތައްޔާރުވަމުން އަންނަ ކަމަށެވެ. އަދި އަންނަ އޮގަސްޓް މަހުގެ ދެވަނަ ހަފުތާގެ ކުރިން މަސައްކަތް ކުރަން ބޭނުންވާ ސަމާނު ސައިޓުތަކަށް ގެންގޮސް މަސައްކަތް ފަށާނެކަމަށް ވެސް އެމްޓީސީސީއިން ބުނެފައިވެ އެވެ.
ގަމުގައި ހަދާ ޓާޝަރީ 130 އެނދުގެ ހޮސްޕިޓަލަކީ 28.41 މިލިއަން ޔޫރޯ (492.35 މިލިއަން ރުފިޔާ) ގެ މަޝްރޫއުއެއް ކަމަށެވެ. ގައްދޫގެ 30 އެނދުގެ އާ ހޮސްޕިޓަލް އިމާރާތް ކުރަން 13.07 މިލިއަން ޔޫރޯ (226.50 މިލިއަން ރުފިޔާ) ގެ މަޝްރޫއެކެވެ.
ގަމު ޓާޝަރީ ހޮސްޕިޓަލް ތަރައްގީކުރަން ތިން އަހަރު ދުވަހުގެ މުއްދަތެއް ދީފައިވާއިރު، ގައްދޫ ހޮސްޕިޓަލް ހަދަން ދީފައި ވަނީ ދެ އަހަރާއި ހަ މަސްދުވަހުގެ މުއްދަތެކެވެ.
