ފުލުހުންގެ ރޯޑް ސޭފްޓީ އެވެއާނެސް އެންޑް ޕްރިވެންޝަނުން މި އަހަރު ކުރިއަށް ގެންދާ ''ރައްކާ ކެމްޕެއިން'' ޕްރޮގްރާމް ކުރިއަށް ގެންދިއުމަށްޓަކައި ތިން ކުންފުންޏަކާއިއެކު އެއްބަސްވުންތަކުގައި ސޮއިކޮށްފިއެވެ.
އިސްކަންދަރު ބިލްޑިންގައި އިއްޔެ ބޭއްވި ރަސްމިއްޔާތުގައި ފުލުހުންނާއިއެކު އެއްބަސްވުމުގައި ސޮއިކޮށްފައިވަނީ، ސިލްވާ ޕާޓްނާ އެލައިޑް އިންޝުއަރެންސް، ޝީޝާ މޯލްޑިވްސް ޕްރައިވެޓް ލިމިޓެޑް އަދި ޑިޖިޓަލް ޕާޓްނާ އުރީދޫ މޯލްޑިވްސްއެވެ.
ފުލުހުންގެ ހިދުމަތުގެ ފަރާތުން އެ އެއްބަސްވުންތަކުގައި ސޮއިކުރެއްވީ ޑެޕިއުޓީ ކޮމިޝަނާ އޮފް ޕޮލިސް އަލީ ރަޝީދުއެވެ. އެލައިޑް އިންޝުއަރެންސް ކޮމްޕެނީގެ ފަރާތުން ސޮއިކުރެއްވީ އެ ކުންފުނީގެ ޖެނެރަލް މެނޭޖަރު އިބްރާހީމް ފިރުޝާންއެވެ. ޝީޝާ މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އޮޕަރޭޝަންސް އެންޑް މާކެޓިން މެނޭޖަރު ފާތިމަތު ޖުމާންއެވެ. އަދި އުރީދޫގެ ފަރާތުން ސޮއިކުރެއްވީ ކޮމާޝަލް އޮފިސާ ހުސައިން ނިޔާޒެވެ.
މި ރަސްމިއްޔާތުގައި އެސިސްޓަންޓް ކޮމިޝަނާ އޮފް ޕޮލިސް އަހްމަދު މުހައްމަދު، ރޯޑް ޕޮލިސްގެ ހެޑް ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ދާއޫދު އަދި ސެންޓްރަލް ޕޮލިސިން ކޮމާންޑާއި އޮޕަރޭޝަނަލް ސަޕޯޓް ކޮމާންޑުގެ ވިންގުތަކުގެ ވެރިން ވެސް ވަނީ ބައިވެރިވެފަ އެވެ.
މި އެއްބަސްވުމުގެ ދަށުން މަގުމަތީގެ ސަލާމަތާއި ރައްކާތެރިކަމުގެ ތަފާތު ޕްރޮގްރާމްތައް ހިންގުމަށް ހަމަޖެހިފައިވެއެވެ.
