ދެހާސްއެކާވީސްވަނަ އަހަރު ބޭއްވި ލޯކަލް ކައުންސިލްތަކުގެ އިންތިހާބުގައި މާލެ ސިޓީގައި ވޯޓުލާން ރަޖިސްޓްރީވެފައިވާ މީހުން ކުރިއަށް އޮތް ރިޔާސީ އިންތިހާބުގެ ރަޖިސްޓްރޭޝަންގައި ވެސް މާލޭގައި އޮންނަ ގޮތަށް ހަމަޖެހިފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވޯޓު ލުމުގެ ހައްގު ލިބިފައިވާ މީހުންގެ ލިސްޓު މީގެ ކުރިން އޮތީ ކޮންމެ މީހަކު ވެސް އެ މީހަކު ރަށްވެހިވެފައިވާ ރަށެއްގައި ހިމެނޭ ގޮތަށެވެ. އަދި ރަށްވެހިފައިވާ ރަށް ނޫން އެހެން ރަށެއްގައި ވޯޓު ލާން ޖެހޭ ނަމަ ރީރަޖިސްޓްރީ ކުރާ ގޮތަށެވެ.
ނަމަވެސް އެ އުސޫލަށް ބަދަލު ގެނެސް، އީސީން ކުރި ޓްވީޓެއްގައި ބުނި ގޮތުގައި އެންމެ ފަހުން ބޭއްވި ކައުންސިލް އިންތިހާބުގައި މާލޭގައި ވޯޓުލާން ރަޖިސްޓްރީވި މީހުން ރިޔާސީ އިންތިހާބުގައި ވެސް އޮޓެމެޓިކުން އޮންނާނީ މާލޭގައި ވޯޓުލާ ގޮތަށް ރަޖިސްޓްރީކޮށްފަ އެވެ.
މާލޭގައި ވޯޓުލީ މީހުން ފިޔަވައި އެހެން މީހުންގެ ނަން އޮންނާނީ އެ މީހަކު ރަށްވެހިވެފައިވާ ރަށުގެ ރަޖިސްޓްރޭޝަންގައި ކަމަށް އިލެކްޝަނުން ބުންޏެވެ.
އެހެންކަމުން ކައުންސިލް އިންތިހާބުގައި މާލޭގައި ވޯޓުލާފައިވާ މީހުން މި ފަހަރު ވެސް މާލޭގައި ވޯޓުލާން ޖެހޭނަމަ ރީރަޖިސްޓްރީކުރާކަށް ނުޖެހޭނެ އެވެ. އެހެން ނަމަވެސް އޭރު މާލޭގައި ވޯޓުލާފައި، މި ފަހަރު އެހެން ތަނަކަށް ވޯޓު ލާން ބޭނުންވާ ނަމަ ރީރަޖިސްޓްރީ ކުރަން ޖެހެނޭ އެވެ.
ރީރަޖިސްޓްރީ ކުރުމަށް ކޮމިޝަނުން ހުޅުވާލާނީ ޖުލައި މަހުގެ 16 ވަނަ ދުވަހުގަ އެވެ. އެ ފުރުސަތު ކޮމިޝަނުން ހުޅުވާލާނީ 21 ދުވަހުގެ މުއްދަތަކަށެވެ. އެއީ އޮގަސްޓް މަހުގެ ފަސްވަނަ ދުވަހުގެ ނިޔަލަށެވެ.
އިލެކްޝަންސް ކޮމިޝަނުން އެ ބަދަލު ގެނެސްފައިވަނީ ރަށްވެހިފައިވާ ރަށުގައި އޮޓެމެޓިކުން ރަޖިސްޓްރީ ގެންދިޔުމުން ރީރަޖިސްޓްރީގެ މަސައްކަތްތައް ބުރަވެގެންދާ ކަމަށް ބުނެ ސިޔާސީ ޕާޓީތަކުން ލުޔެއް ހޯދައިދިނުމަށް އެ ކޮމިޝަނުގައި އެދިފައިވަނިކޮށެވެ.
އިންތިހާބާ ގުޅޭ ގޮތުން މަޝްވަރާ ކުރުމަށް އީސީން އެކުލަވާލާފައިވާ އޮންނަ ގައުމީ ލަފާ ދޭ ކޮމިޓީގައި، ސިޔާސީ ޕާޓީތަކުގެ މަންދޫބުން ފާހަގަ ކުރި ކަމަކީ ރާއްޖޭގެ އެކި ރަށްރަށުން ގިނަ އަދަދެއްގެ މީހުން މާލޭގައި ދިރިއުޅޭއިރު އެއިން ގިނަ މީހުނަކީ ކޮންމެ އިންތިހާބެއްގައި ވެސް މާލޭގައި ވޯޓުލާ މީހުން ކަމަށެވެ.
ކޮމިޝަނުން މީގެ ކުރިން އަމަލުކުރަމުން އައި ގޮތަކީ ކޮންމެ ރިޔާސީ އިންތިހާބެއްގައި ރަށްވެހިފައިވާ ރަށުގެ ރަޖިސްޓްރީގައި މީހުންގެ ނަން ހިމެނުމަށް ފަހު ރިޔާސީ އިންތިހާބުގައި ރީރަޖިސްޓްރީކުރާ ގޮތަށް މަޖިލީހުގެ އިންތިހާބުގެ ރަޖިސްޓްރީ އިއުލާން ކުރުމެވެ. އަދި އެ އިންތިހާބުގައި ވޯޓުލާން ރަޖިސްޓްރީވެފައިވާ ގޮތަށް ކައުންސިލް އިންތިހާބުގައި ރަޖިސްޓްރޭޝަން ހުޅުވާލުމެވެ.
މުޅި ރާއްޖޭގެ މީހުން ދިރިއުޅޭ ހުރިހާ ރަށަކާއި، ރިސޯޓުތައް އަދި ސިނާއީ ރައްތައް ހިމަނައިގެން ޖުމްލަ 600 ވޯޓު ފޮށި މިއަހަރު ބެހެއްޓުމަށް ނިންމާފައި ވެއެވެ. މި ރިޔާސީ އިންތިހާބުގައި 280،000 އެއްހާ މީހުން ވޯޓުުމުގެ ހައްގު ލިބިފައިވާ ކަމަށް އީސީން ބުނެފައިވެ އެވެ.
