މާލޭގެ ރައްޔިތުންނަށް ގޯތި ދޭން ސަރުކާރުން ހިންގާ "ބިންވެރިޔާ ސްކީމް" ގެ ފުރަތަމަ ބުރުގައި 6،000 އަށް ވުރެ ގިނަ ގޯތި ދޫކުރާނެ ކަމަށް ރައީސް އިބްރާހީމް މުހައްމަދު ސޯލިހު އިއްޔެ ވިދާޅުވި އެވެ.

ގުޅިފަަޅުގައި ކުރިއަށް ގެންދާ ބިންހިއްކުމުގެ މަަޝްރޫއު ފަށްޓަވައި ދެއްވުމަށް ފަހު އެ ރަސްމިއްޔާތުގައި ރައީސް ވިދާޅުވީ އެ މަޝްރޫއުގެ ދަށުން ގުޅިފަޅަށް 150 ހެކްޓަރުގެ ބިން އިތުރުކުރެވޭނެ ކަަމަށާއި ސަރުކާރުގެ އަމާޒަކީ ގުޅިފަޅުން 2،000 ގޯތި ދޫކުރުން ކަމަށެވެ. އަދި ހުޅުމާލޭން 2،200 ގޯއްޗާއި ގިރާވަރު ފަޅުން ވެސް 2،000 ގޯތި ދޫކުރަން ސަރުކާރުން ނިންމާފައިވާ ކަމަށް ވެސް އެމަނިކުފާނު ވިދާޅުވި އެވެ.

"މި ދެންނެވި ތިން މަޝްރޫއުގެ ދަށުން، ބިންވެރިޔާ ސްކީމްގެ ދަށުން މިބުރުގައި، އެކު ޖުމްލަ 6،200 ގޯތި ދޫކުރަން މިހާރު އަޅުގަނޑުމެން ވަނީ ނިންމާފައި، މިއީ ކުރީ ދުވަހު މިނިސްޓަރު އަސްލަމް ވިދާޅުވި އަދަދަށް ވުރެެ ކުޑަ ތަންކޮޅެއް އަނެއްކާ ވެސް އިތުރު އަދަދެއް،" ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި މާލޭ ރައްޔިތުންނަށް ގޯތި ދޭން، ގިރާވަރު ފަޅުގައި ހިންގާ ބިން ހިއްކުމުގެ މަޝްރޫއު ވެސް ވަރަށް ބާރަށް ކުރިއަށް އެބަ ދެވެ. އެ މަޝްރޫއާއި ގުޅިފަޅުގައި ފެށި މަޝްރޫއު ނިމި، މާލޭގެ ރައްޔިތުންގެ ތެރެއިން، މިފަހަރު ގޯތި ދޭން ނިންމި މީހުންނަށް އަންނަ އޮގަސްޓް މަހު ގޯތި ހަވާލުކުރާނެ ކަމަށް ވެސް ވިދާޅުވި އެވެ.

"ޝަރުތު ހަމަވެގެން ގޯތި ލިބޭ މީހުންގެ ލިސްޓް ވެސް މިހާރު އޮތީ އާއްމުކުރެވިފައި. އަދި އެ ލިސްޓަށް ޝަކުވާ ހުށަހެޅުމަށް ޖުލައި މަހުގެ 15 ވަނަ ދުވަހާ ހިސާބަށް ވަނީ ފުރުސަތު ހުޅުވާލާފައި. ލިބޭ ޝަކުވާތައް ބެލުމަށް ފަހު، ލިސްޓްގައި ހުރި މައްސަލަތައް ހައްލުކޮށް، އިރާދަކުރެއްވިއްޔާ އަންނަ އޮގަސްޓް މަހުގެ ތެރޭގައި އެންމެ ލަސްވެގެން ގޯތިތައް ހަވާލުކުރުމުގެ މަސައްކަތް އަޅުގަނޑުމެން ފަށާނަން،" ރައީސް ވިދާޅުވި އެވެ.

ބިންވެރިޔާ ސްކީމްގެ ދަށުން ގޯއްޗަށް އެދެން ހުުޅުވައިލުމުން 23،000 އަށް ވުރެ ގިނަ މީހުން ފޯމު ލި އެވެ. ރައީސް ވިދާޅުވި ގޮތުގައި އޭގެ ތެރެއިން 19،858 މީހެއްގެ ޝަރުތު ހަމަވެ އެވެ.

މުހިންމު ބައެއް ހަބަރު

ދުވަހުގެ ކޯޓޭޝަން

ގުޅިފަޅު ހިއްކުމުގެ މަޝްރޫއު ފައްޓަވައި ދެއްވުމަށް ފަހު ރައީސް އިބްރާހިމް މުހައްމަދު ސޯލިހު ވިދާޅުވީ؛

ޝަރުތު ހަމަވެގެން ގޯތި ލިބޭ މީހުންގެ ލިސްޓް ވެސް މިހާރު އޮތީ އާއްމުކުރެވިފައި. އަދި އެ ލިސްޓަށް ޝަކުވާ ހުށަހެޅުމަށް ޖުލައިމަހުގެ 15 ވަނަ ދުވަހާ ހިސާބަށް ވަނީ ފުރުސަތު ހުޅުވާލާފައި. ލިބޭ ޝަކުވާތައް ބެލުމަށް ފަހު، ލިސްޓްގައި ހުރި މައްސަލަތައް ހައްލުކޮށް، އިރާދަކުރެއްވިއްޔާ އަންނަ އޮގަސްޓްމަހުގެ ތެރޭގައި އެންމެ ލަސްވެގެން ގޯތިތައް ހަވާލުކުރުމުގެ މަސައްކަތް އަޅުގަނޑުމެން ފަށާނަން،"

ދުވަހުގެ ފޮޓޯ

ރައީސް އިބްރާހިމް މުހައްމައްދު ސޯލިހު އިއްޔެ ގުޅިފަޅު ހިއްކުމުގެ މަޝްރޫއު ފައްޓަވައި ދެއްވަނީ. -- ފޮޓޯ: ރައީސް އޮފީސް