މިދިޔަ މެއި މަހުގެ ތެރޭގައި ފ. ފިލިތެޔޮ ރިސޯޓު ކައިރިިން ކަނޑަށް ފައްތާފައި ހުއްޓާ ފުލުހުން ހޯދި 45 ކިލޯގެ މަސްތުވާތަކެތީގެ މައްސަލައިގައި އަދިވެސް މީހަކު ހައްޔަރު ނުކުރާ ކަމަށް ފުލުހުން މިއަދު ބުނެފި އެވެ.
ފިލިތެޔޮ ކައިރިން މޫދަށް މަސްތުވާތަކެތި ފައްތާފައި ހުއްޓާ އެ ހިސާބުގެ މަސް ދޯންޏަކަށް ފެނިގެން މެއި 18، ގައި އެކަން ފުލުހުންނަށް ރިޕޯޓުކުރުމުން ފުލުހުން ހިންގި އޮޕަރޭޝަނުގައި އަތުލައިގަތީ 45 ކިލޯގެ ހެރޮއިން އެވެ.
ފުލުހުންގެ ޑްރަގް އެންފޯސްމަންޓް ޑިޕާޓްމެންޓް އޮފިޝަލަކު "އަދަދު" ވިދާޅުވި ގޮތުގައި، މިހާތަނަށް އެ މައްސަލައިގައި އެއްވެސް މީހަކު ހައްޔަރުކޮށްފައިނުވާ ކަމަށާއި ނަމަވެސް ތަހުގީގު ކުރިއަށްގެންދާ ކަމަށެވެ.
މަސްތުވާތަކެތި ހޯދަން ފުލުހުން ހަފުތާއެއްހާ ދުވަހު ފިލިތެޔޮ ކައިރިން ކަނޑުގެ ސަރަހައްދެއް ބެލި އެވެ.
މީގެ ކުރިން ވެސް މޫދަށް ފައްތާފައި ހުއްޓާ ގިނަ އަދަދެއްގެ މަސްތުވާތަކެތި އަތުލައިގަނެފައިވެ އެވެ. އަދި ފަޅު ރަށްރަށުގައި ވަޅުލާފައި ހުއްޓާ ވެސް ގިނަ އަދަދެއްގެ މަސްތުވާތަކެތި ހޯދާފައިވެ އެވެ. ފުލުހުން މީގެ ކުރިން ބުނެފައިވާ ގޮތުގައި، ގިނަ އަދަދެއްގެ ޑްރަގް އެގޮތަށް ފޮރުވާފައި ބަހައްޓަނީ، ޓްރާންސިޓް މަންޒިލެއްގެ ގޮތުގައި ރާއްޖެ ބޭނުންކޮށްގެން އެހެން ގައުމުތަކަށް ޑްރަގް ފޮނުވުމަށެވެ.
ފާއިތުވި ހައެއްކަ އަހަރުގެ ތެރޭގައި ބޮޑެތި އަދަދުތަކުން ރާއްޖެއަށް އެތެރެ ކުރަން އުޅުނު ޑްރަގް ޝިޕްމަންޓުތައް ފުލުހުން އަތުލައިގަނެފައިވެ އެވެ. އެފަދަ ބައެއް ހާދިސާތަކުގައި 100 ކިލޯއަށް ވުރެ ގިނައިން ވެސް ޑްރަގް ފެނިފައި އެބަ ހުއްޓެވެ.
އެގޮތުން، އެންމެ ގިނަ އަދަދަށް މި ފަހުން ޑްރަގް އަތުލައިގަނެފައި ވަނީ 2020 ވަނަ އަހަރު ހުޅުމާލޭ ފަޅުގައި އޮތް ދޯންޏަކުން 130 ކިލޯ އަދި 2021 ވަނަ އަހަރު ރ. މަޑުއްވަރީ ކައިރީ އޮންނަ ފަޅު ރަށަކުން 215 ކިލޯ އެވެ. އެ ދެ މައްސަލައިގައި ވެސް ދައުވާކޮށްފައިވާއިރު، ޝަރީއަތްތައް ދަނީ ކުރިއަށެވެ.
މިދިޔަ ނޮވެމްބަރު 17، ވަނަ ދުވަހު ފުލުހުން އާންމު ކުރި ތަފާސްހިސާބުތަކުން ދައްކާ ގޮތުގައި، 2018 ވަނަ އަހަރުން ފެށިގެން 2022 ވަނަ އަހަރާ ހަމައަށް ފުލުހުން އެކި އޮޕަރޭޝަންތަކުގައި ޖުމްލަ 1.6 ޓަނުގެ ޑްރަގް އަތުލައިގަނެފައިވެ އެވެ. އެ މަސްތުވާތަކެއްޗާއި ގުޅިގެން ޖުމްލަ 6165 މައްސަލައެއް ތަހުގީގު ކުރި އިރު، އޭގެ ތެރެއިން 2681 މައްސަލައެއް ވަނީ ދައުވާ ކުރަން ޕްރޮސެކިއުޓާ ޖެނެރަލްގެ އޮފީހަށް ފޮނުވައިފަ އެވެ.
