ފާއިތުވި ތިން މަހުގެ ތެރެއިން އެންމެ ވައްކަމުގެ މައްސަލަތައް މަދުން ރިޕޯޓުކޮށްފައި ވަނީ މިދިޔަ މަހު ކަމަށް ފުލުހުންގެ ތަފާސްހިސާބުތަކުން ދައްކައިފި އެވެ.
ކޮންްމެ މަހެއް ނިމުމުން ފުލުހުންް އާންމުކުރާ ތާފާސްހިސާބުގެ ޖޫން މަހުގެ ނަމްބަރުތަކަށް ބަލާއިރު އޭޕްރީލް އަދި މެއި މަހާއި އަޅައި ބަލާއިރު މިދިޔަ މަހު ވައްކަމުގެ މައްސަލަތައް ރިޕޯޓު ކުރި މިންވަރު ވަނީ ދަށްވެފަ އެވެ.
އޭޕްރީލް މަހު ވައްކަމާއި ފޭރުމުގެ 234 މައްސަލައެއް ރިޕޯޓުކުރި އިރު މެއި މަހު 221 މައްސަލައެއް ރިޕޯޓުކޮށްފައިވެ އެވެ. ނަމަވެސް މިދިޔަ މަހު ހުށަހަޅާފައި ވަނީ 172 މައްސަލަ އެވެ.
އޭގެ އިތުރުން އެންމެ ގިނައިން ޖޫން މަހު ރިޕޯޓު ކުރީ މަގުމަތީގެ އެކްސިޑެންޓުތަކުގެ މައްސަލަތަކެވެ. މިދިޔަ މަހު 140 މައްސަލައެއް ރިޕޯޓުކޮށްފައިވެ އެވެ. މެއި މަހު 178 އެކްސިޑެންޓު ރިޕޯޓުކޮށްފައި ވާއިރު އޭޕްރީލް މަހުގެ ތެރޭގައި 173 މައްސަލައެއް ރިޕޯޓުކޮށްފައިވެ އެވެ.
މަސްތުވާތަކެތީގެ މައްސަލަތައް ވެސް މިދިޔަ މަހު ފުލުހުންނަށް ރިޕޯޓުކުރި މިންވަރު މަދެވެ. މިދިޔަ މަހު މަސްތުވާތަކެތީގެ 116 މައްސަލައެއް ހުށަހެޅި އިރު މޭ މަހު 161 މައްސަލަ އަދި އޭޕްރީލް މަހު 178 މައްސަލައެއް ބަލައިފައި ވާކަމަށް ފުލުހުންގެ ތަފާސް ހިސާބުތަކުން ދައްކަ އެވެ.
