އިންޑިއާގެ ރިލަޔަންސް ޖިއޯ ކުންފުންޏާ ގުޅިގެން ދިވެހި ސަރުކާރުން ހިންގާ ސަބްމެރިން ކޭބަލްގެ މަސައްކަތް އަންނަ ޖުލައި މަހަށް ނިންމާލެވޭނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ސަބްމެރިން ކޭބަލްގެ މަސައްކަތް ހިންގަނީ ސަރުކާރުގެ ކުންފުނި އޯޝަން ކަނެކްޓް މޯލްޑިވްސް (އޯސީއެމް) އިންނެވެ. ސަބްމެރިން ކޭބަލް ނެޓްވޯކުގެ ތެރެއިން އޭޝިއާ ސަރަހައްދުގައި އަޅާ 'އިންޑިއާ-އޭޝިއާ އެކްސްޕްރެސް' ގެ ކޮޅަކުން ހުޅުމާލެއާ ގުޅުވައިލާނެ އެވެ.
"އަދަދު" އިން ގެނެސްދޭ "އެތެރެފުށް" ޕްރޮގްރާމްގައި ސުވާލުކުރުމުން އަމީރު ވިދާޅުވީ ކޭބަލްގެ ހިދުމަތް ނިމުމާއެކު ލަސްތަކެއް ނުވެ އެ ހިދުމަތް އާންމުންނަށް ލިބި، އިންޓަނެޓުގެ އަގު ކުޑަ މިހާރަށްވުރެ ވެސް ކުޑަވާނެ ކަމަށެވެ.
"މެއިންލޭންޑިން ސްޓޭޝަނަކާ ގުޅާލުމުން އިންޓަނެޓް ޕްރައިސަސް ވެސް ވަރަށް ބޮޑުތަން އަގުހެޔޮ ވެގެންދާނެ، ގާތްގަނޑަކަށް މިހާރު އަޅުގަނޑު ހަނދާންވާ ގޮތުން އެއް ޖީބީއަށް އެބަ ދޭ 80 ޑޮލަރު، އެ ކުޑަވެގެން އެބަދޭ 20 ޑޮލަރަށް،" އަމީރު ވިދާޅުވި އެވެ.
އަމީރު ވިދާޅުވީ ރާއްޖެ ހިމެނޭ ސަރަހައްދަށް ބެލި ކަމުގައިވީ ނަމަވެސް އިންޓަނެޓުގެ އަގުތައް ވަރަށް ބޮޑު ކަމަށާއި މިހާރު ވެސް ރާއްޖެއިން ހިދުމަތް ދެނީ މެއިންލޭންޑިން ސްޓޭޝަނާ ގުޅުވާލެވިގެން ނޫން ކަމަށެވެ. އަދި ސަބްމެރިން ކޭބަލާއެކު މެއިންލޭންޑިން ސްޓޭޝަނާ ގުޅާލުމުން އިންޓަނެޓުގެ އަގު ހެޔޮވުމާއެކު ބޭންޑްވިޑްތު ކެޕޭސިޓީ ވަރަށް ބޮޑުތަނުން އިތުރުވެގެންދާނެ ކަމަށް އޭނާ ވިދާޅުވި އެވެ.
އޭގެ އިތުރުން އޯޝަން ކަނެކްޓުން ބޭރުގެ ފަރާތްތަކާ ގުޅިގެން ރާއްޖޭގައި ޑޭޓާ ސެންޓަރުތައް ގާއިމްކޮށް ހިދުމަތް ދިނުމުގެ ވިސްނުން ހުރި ކަމަށް ވެސް އޭނާ ވިދާޅުވި އެވެ.
"އެއާއެކު މުޅިން އާ ދޮރެއް، އާ ސެކްޓާއެއް ހުޅުވިގެން ދާނެ" އަމީރު ވިދާޅުވި އެވެ.
މި އަހަރުގެ ރިޔާސީ ބަޔާން އިއްވަމުން ރައީސް އިބްރާހިމް މުހައްމަދު ސޯލިހު ވަނީ ފްރާންސްގެ މާސޭ އާއި ސިންގަޕޫރާ ދެމެދު އަޅާ ސަބްމެރިން ކޭބަލް ރާއްޖެއާ ގުޅާލާ ބޭނުންކުރުމުގެ ފުރުސަތު އަންނަ ސެޕްޓްމްބަރު މަހުގެ ކުރިން ލިބިގެންދާނެ ކަމަށް ވިދާޅުވެފަ އެވެ.
މިއީ އިންޓަނެޓުގެ ސްޕީޑާއި އަގަށް އިންގިލާބީ ކުރިއެރުމެއް ލިބިގެންދާނެ މަޝްރޫއެއް ކަމަށް ވެސް އެމަނިކުފާނު ވިދާޅުވި އެވެ.
ހުޅަނގު ޔޫރަޕާއި މެދުއިރުމަތި އަދި އޭޝިއާގެ ގައުމުތައް ގުޅުވާލާ މި ސަބްމެރިން ކޭބަލްގެ މަސައްތަކަތް ފެށީ ފެބްރުއަރީ، 2022 ގަ އެވެ. ގާތްގަނޑަކަށް 19،200 ކިލޯމީޓަރުގެ އެ ކޭބަލް ގުޅާލާ ގައުމުތަކުގެ ތެރޭގައި ރާއްޖޭގެ އިތުރުން ހިމެނެނީ މެލޭޝިއާ، ބަންގްލަދޭޝް، ސްރީ ލަންކާ، އިންޑިއާ، ޕާކިސްތާނު، ސައުދީ އަރަބިއާ އަދި މިސްރެވެ.
