ގުޅިފައިވާ ޕާޓީތަކުން ހަދާފައިވާ ސަރުކާރު ހިންގުމުގެ ކޯލިޝަން އެއްބަސްވުމާ ހިލާފަށް، ހަޔާ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި، އެމްއާރުއެމްގެ ސްލޮޓެއްގައި ހުންނެވި އިސްމާއިލް ޒަބީހު އެ މަގާމުން ވަކިކުރުން ބަަލައެއް ނުގަނެވޭ ކަމަށް އެ ޕާޓީން ބުނެފި އެވެ.
ޒަބީހު ވަކިކުރިކަން ސަރުކާރުން ޔަގީންކޮށްދީފައިވާއިރު، އެއީ ކޮން ސަބަބަކާ ގުޅިގެން ކަމެއް ހާމައެއް ނުކުރެ އެވެ.
މި މައްސަލައިގައި އެމްއާރްއެމުން ނެރުނު ބަޔާނެއްގައި ވަނީ "ޒަބީހު ފަދަ ތައުލީމީ ބޭފުޅަކު މަގާމުން ސަބަބެއް ނެތި ވަކިކުރުމުން" ކަންބޮޑުވުން ފާޅުކޮށްފަ އެވެ.
"ކުއްލިއަކަށް މަގާމުން ވަކިކޮށްފައިވާ ގޮތާމެދު އެމްއާރްއެމްއިން ނުހަނު ކަންބޮޑުވެ އެވެ. އަދި ޒަބީހު މަގާމުން ވަކިކުރަންޖެހޭ ވަރުގެ އަމަލެއް ކުރައްވާފައި ނުވާނެކަން މި ޕާޓީއިން ރައްޔިތުންނަށް ކަށަވަރު ކޮއްދެމެވެ. ޒަބީހަކީ ހަވާލުކުރެއްވި މަގާމުގެ މަސްއޫލިއްޔަތު ނުހަނު ފަރުވާތެރިކަމާއި ތެދުވެރިކަމާއި އިހުލާސްތެރިކަމާއެކު އަދާކުރެއްވި ބޭފުޅެކެވެ،" ބަޔާނުގައިވެ އެވެ.
އެ ޕާޓީގެ ބަޔާނުގައި ވަނީ މިނިސްޓްރީގައި ޒަބީހު މަސައްކަތް ކުރެއްވިއިރު އިސްނަގައިގެން ކުރެއްވެވި ބައެއް ކަންކަމާއި ކޮށްދެއްވި ހިދުމަތްތައް ވެސް ފާހަގަކޮށްފަ އެވެ.
"ތަފާތު އެކި ސަބަބުތަކާހުރެ ދަރިވަރުންނަށް ނުދެއްކި، ބޮޑެތި އަދަދު ތަކުން އަރައިގެން ގޮސްފައިވާ ސްޓޫޑަންޓް ލޯނު ރީޕެމަންޓް ފައިސާ ވަކި އުސޫލެއްގެ ދަށުން އެކި މަސް މަހަށް ބަހާލައިގެން ދެއްކޭނެ ގޮތްތައް ހަމަޖައްސަވާ ދައުލަތަށް ނުލިބިހުރި އެތައް މިލިއަން ރުފިޔާއެއް ހޯއްދަވައި ދެއްވި،" އެ ޕާޓީން ބުނެފައިވެ އެވެ.
ޒަބީހު ފަދަ ބޭފުޅަކު ވަކިކޮށް، މަގާމުގެ މަސްއޫލިއްޔަތު އަދާކުރަން ބޭނުން ޝަރުތު ހަމަނުވާ ގިނަ އަދަދެއްގެ ބަޔަކަށް ހަދިޔާ ބަހާ އުސޫލުން ސިޔާސީ މަގާމު ދިނުމަކީ ގައުމަށް ނުހަނު ގެއްލުން ބޮޑު ކަމެއް ކަމުގައި ވެސް އެ ބަޔާނުގައި ބުނެފައިވެ އެވެ.
މި ސަރުކާރުގެ ކޯލިޝަނުގައި ހިމެނޭ ކުރީގެ ރައީސް މައުމޫން އަބްދުލްގައްޔޫމު އިސްވެ ހުންނަވާ ހިންގަވާ އެމްއާރުއެމުން ކުރިއަށް އޮތް ރިޔާސީ އިންތިހާބުގައި ކަންކުރާނެ ގޮތް ނިންމާފައިނުވެ އެވެ.
އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި އެކުގައި މަސައްކަތް ކުރުމަށް މިހާރު ކޯލިޝަނުގައި ތިބި ޖޭޕީ، އެމްއާރުއެމް އަދި އަދާލަތު ޕާޓީއަށް ރައީސް ސޯލިހު ވަނީ އެމްޑީޕީގެ ޓިކެޓު ލިބުމާއެކު ސިޓީފުޅެއް ފޮނުއްވާފަ އެވެ. އެ ސިޓީއަށް އިޖާބަދީ ކޯލިޝަން ހަދަން ނިންމީ އަދާލަތުން އެކަންޏެވެ.
ޖޭޕީން ވަނީ ރިޔާސީ އިންތިހާބުގައި ވަކިން ވާދަކުރަން ނިންމާ ޕާޓީގެ ޓިކެޓު، ލީޑަރު ގާސިމް އިބްރާހިމަށް އަރުވާފަ އެވެ. އެމްއާރުއެމުން ރަސްމީކޮށް ވަކިގޮތެއް ނުނިންމި ނަމަވެސް އެ ޕާޓީގެ ލީޑަޝިޕުން މިފަހުން ވަނީ ސަރުކާރަށާއި ރައީސް ސޯލިހުގެ އެކި ނިންމެވުންތަކަށް ފާޑުކިޔާފަ އެވެ.
ކޯލިޝަނާ ބެހޭގޮތުން ވާހަކަދައްކަވަމުން މާޗު މަހުގެ 21 ގައި ރައީސް ސޯލިހު ވިދާޅުވީ ކުރިއަށް އޮތް ރިޔާސީ އިންތިހާބާ ހަމައަށް އެކުގައި ސަރުކާރާ އެކު ނުތިބެވޭނަމަ ކޯލިޝަން އެއްބަސްވުން ނިމުމަކަށް ގެންނަން ޖެހޭ ކަމަށެވެ.
"އަޅުގަނޑުމެން އެގްރީމެންޓެއް އެބައޮތް ދައުރު ނިމެންދެން އެކުގައި މަސައްކަތް ކުރުމަށް، އެއީ އަކުރުން އަކުރަށް މާނަކުރީމަ އޮތްގޮތް، އެހެން ނަމަވެސް، ކުރިއަށް އޮތް ރިޔާސީ އިންތިހާބަށް ކުރިއަށް ދާއިރު އަޅުގަނޑުމެންނަށް އެކީގަ ނުތިބެވޭ ކަމަށް ވަންޏާ، އަޅުގަނޑު ގަބޫލުކުރާ ގޮތުގައި އެއޮތީ އެ އެގްރީމެންޓު ނިމުމަކާ ހިސާބަށް ގެންނަން ޖެހިފައި."
ރައީސް ވިދާޅުވީ އޭގެ މާނައަކީ މިހާރު ކޯލިޝަނެއް ނެތުން ނޫން ކަމަށެވެ. ނަމަވެސް، އެއްބަސްވެވޭ އެއްބަސްވުމަކީ ތަންފީޒުކުރެވޭ އެއްޗަކަށް ވާންޖެހޭ ކަމަށާއި އެއްބަސްވުން ތަންފީޒުނުކުރެވޭ ކަމަށް ވަނީ ނަމަ އޭގެ ބޭނުމެއް ނޯންނާނެ ކަމަށްވެސް ރައީސް ވިދާޅުވި އެދުވަހު ވިދާޅުވި އެވެ.
މިހާތަނަށް ޖޭޕީ އަދި އެމްއާރުއެމްގެ ސްލޮޓުތަކުގައި ސަރުކާރުގެ މަތީ މަގާމުތަކުގައި ތިއްބެވި ބޭފުޅުން ވަކިކޮށްފައި ނުވި ނަމަވެސް ޒަބީހު ވަކިކުރަން ނިންމި ނިންމުމާއެކު އެކަން ބަދަލުވާނެކަމަށް ބެލެވެ އެވެ.
