ސިޔާސީ ޕާޓީއެއްގައި މަދުވެގެން ތިބެން ޖެހޭ 3،000 މެމްބަރުން ހަމަނުވާތީ މޯލްޑިވްސް ރިފޯމް މޫމެންޓް (އެމްއާރްއެމް) އުވައިލަން އިލެކްޝަންސް ކޮމިޝަން (އީސީ) އިން ނިންމި ނިންމުން ތަންފީޒުކުރުން ފަސްކުރަން ސިވިލްކޯޓުން ނެރުނު އަމުރު، ،އެކޮމިޝަނުން އެދުނު ގޮތަށް މުރާޖައާކޮށްދެވެން ނެތް ކަަމަށް ސިވިލްކޯޓުން ނިންމައިފި އެވެ.
ސިވިލް ކޯޓުން އިއްޔެ ނިންމި ނިންމުމުގައި ބުނީ ޣައިރު އެކޮމިޝަނުގެ ޣައިރު ހާޒިރުގައި އަމަރު ނެރެދޭން ހުރަސް އެޅޭ ފަދަ، ޝަރީއަތަށް ގަބޫލުކުރެވޭ ފަދަ ހަގީގަތެއް އެމްއާރްްއެމުން ހާމަނުކޮށް އޮތް ކަން އީސީއަށް ބުނެދެވިފައި ނުވާ ކަމަށެވެ. އެއީ އަމުރު މުރާޖައާކޮށްދޭން އީސީން ހުށަހެޅި އެއް ނުކުތާ އެވެ. ޣައިރު ހާޒިރުގައި އަމުރު ނެރެދޭން ތަން ނުދޭ ސަބަބުތަކެއް ހުރިކަމަށް، އެމްއާރްއެމުން ހުށަހެޅި ލިޔެކިއުންތަކަށް ބަލާއިރު ކޯޓަށް ބުރަ ނުވެވޭ ކަމަށް ވެސް އެ ނިންމުމުގައި ވެ އެވެ.
އެމްއާރުއެމް އުވާލި މައްސަލާގައި މައުމޫނާއި އެމަނިކުފާނުގެ ދަރިކަލުން އަދި ޕާޓީގެ ރައީސް އަހްމަދު ފާރިސް މައުމޫން ވަނީ މިއީ އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ ފާޑުވިދާޅުވެފަ އެވެ. އެމްއާރުއެމުން ބުނާ ގޮތުގައި އީސީއިން 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް އެ ޕާޓީން ވަނީ ފޯމު ހުށަހަޅައިފަ އެވެ.
އީސީގެ ނިންމުން ބާތިލުކުރުމަށް އެދި ކުރިއަށް އޮތް 30 ދުވަހުގެ ތެރޭގައި ސިވިލް ކޯޓަށް މައްސަލައެއް ހުށަހެޅުމަށް މަސައްކަތް ކުރަމުންދާ ކަމަށް ކޯޓުގައި ބުނެފައިވާތީ، ސިވިލް ކޯޓުގެ އަމުރު ނެރެދީފައިވަނީ 30 ދުވަހަށެވެ. އެ އަމުރު ނެރުނީ މިދިޔަ މޭމަހުގެ 28 ގަ އެވެ.
