އެކި ސަބަބުތަކާހުރެ ހިޔާ ފްލެޓްތަކުން ހުސްވެފައިވާ 145 އެޕާޓްމެންޓު، ފްލެޓަށް ކުރިމަތިލާފައިވާ މީހުންގެ ރިޒާވް ލިސްޓުގެ ތަރުތީބުން ދޫކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ނިންމަވައިފި އެވެ.
ހުސްވެފައި ހުރި 145 އެޕާޓްމަންޓު ދޫކުރަން ރައީސް ސޯލިހު ނިންމެވީ މިއަދު ބޭއްވި ކެބިނެޓު ބައްދަލުވުމެއްގަ އެވެ. އެމަނިކުފާނު ނިންމެވީ ރިޒާވް ލިސްޓުގައި ތިބި މީހުންގެ ތެރެއިން މާކްސް ލިބިފައިވާ ތަރުތީބުން އެޕާޓްމަންޓު ދެއްވުމަށެވެ.
އޭގެ އިތުރުން، ހިޔާ ސްކީމްގެ ސިވިލް ސާވިސް ކެޓަގަރީން 50 ޕޮއިންޓަށްވުރެ ދަށުން މާކްސް ލިބިގެން ފްލެޓް ނުދޭން ސަރުކާރުން ނިންމާފައިވާ ނިންމުން ބަދަލުކޮށް އެ ކެޓަގަރީއަށް ފެތޭ 45 މީހުންނަށް ވެސް ވަނީ އެޕާޓްމަންޓު ދޭން ނިންމައިފަ އެވެ.
"ވަޒީރުން މަޝްވަރާކުރައްވާފައި ވަނީ ހިޔާ ސްކީމުގެ ސިވިލް ސާވިސް ކެޓަގަރީގެ ދާއިމީ ލިސްޓުގައި 50 ޕޮއިންޓަށްވުރެ ދަށުން މާކްސް ލިބުނު ފަރާތްތަކަށް ފްލެޓް ހަވާލުނުކުރާ ގޮތަށް ސަރުކާރުން ކުރިން ނިންމަވާފައިވާ ނިންމެވުމާއެކު އެކެޓަގަރީން ފްލެޓް ހަވާލުނުކޮށްތިބި 45 ފަރާތަކަށް ފެލެޓް ހަވާލުކުރުމާ މެދު،" ރައީސް އޮފީހުން ބުންޏެވެ.
"މިއަދުގެ ވަޒީރުންގެ މަޖިލީހުގައި ނިންމަވާފައި ވަނީ ދާއިމީ ލިސްޓުގައި ހިމެނިފައިވާ އެ 45 ފަރާތައް ފްލެޓް ހަވާލުކުރުމަށް."
ސޯޝަލް ހައުސިން އުސޫލުން ހިޔާ މަޝްރޫއުގައި 25 ބުރީގެ 16 ޓަވަރު ހެދި އެވެ. އެއިން ކޮންމެ ބުރިއެއްގައި 20 ފްލެޓް ހުރެ އެވެ. އަދި ކޮންމެ ފްލެޓެއްގައި މަދުވެގެން ފަސް މީހުން ދިރިއުޅޭނެ ކަމަށް އާބަންކޯއިން ކުރިން ލަފާކޮށްފައިވެ އެވެ.
އޭގެ އިތުރުން ބިންވެރިޔާ ސްކީމުގެ ދަށުން ގޯއްޗަށް ކުރިމަތިލީ ފަރާތްތަކަށް ކޮމެޓީން ނިންމި ގޮތަށް ގޯތި ދެއްވުމަށް ވެސް ރައީސް ސޯލިހު ވަނީ މިއަދު ނިންމަވައިފަ އެވެ. ނަމަވެސް ރައީސް އޮފީހުން ބުނީ ކޮމެޓީން ނިންމި ގޮތް ޕްލޭނިން މިނިސްޓްރީން ފަހުން ހާމަ ކުރާނެ ކަމަށެވެ.
