މާލޭ އަތޮޅުގައި ހިންގާ ކޮކޯ ބޮޑު ހިތި ރިސޯޓުގެ ޕޫލެއްގައި އަށް އަހަރުގެ ކުޑަކުއްޖަކު މަރުވެފައި އޮއްވާ ފެނިއްޖެ އެވެ.
"އަދަދު" ނޫހަށް ކަށަވަރު ކުރެވިފައިވާ ގޮތުގަައި މަރުވެފައި އޮއްވާ ފެނުނީ އިންޑިއާއަށް ނިސްބަތްވާ ކުއްޖެކެވެ. އެ ކުއްޖާ ފެނިފައިވަނީ އިއްޔެ ހަވީރުގެ ވަގުތެއްގައި އެ ރިސޯޓުގެ އިންޑޯ ޕޫލަކުން ކަމަށްވެ އެވެ.
މައުލޫމާތު ލިބިފައިވާ ގޮތުން މަރުވި ކުއްޖާގެ އާއިލާއިން ޗުއްޓީ ހޭދަކޮށްލުމަށް ރާއްޖެއަށް އައިސްފައިވަނީ އިއްޔެ މެންދުރު ފަހުގެ ވަގުތެއްގަ އެވެ.
ކުއްޖާ މަރުވާން ދިމާވި ސަބަބެއް މިހާތަނަށް ސާފުވެފައި ނުވާއިރު، މިކަމާ ގުޅިގެން ރިސޯޓުގެ ބަހެއް ހޯދުމަށް ކުރި މަސައްކަތުން މިހާތަނަށް ބަހެއް ލިބިފައެއް ނުވެ އެވެ. ފުލުހުންގެ ބަހެއް ވެސް އެކަމާ ގުޅޭ ގޮތުން އަދި ނުލިބެ އެވެ.
ކޮކޯ ބޮޑު ހިތި އަކީ 44 ވިލާގެ މައްޗަށް އެކުލެވޭ ރިސޯޓެކެވެ. ވެލާނާ އިންޓަނޭޝަލް އެއާޕޯޓުން ފުރައިގެން 40 މިނެޓުން ދެވޭ މި ރިސޯޓުގައި ހުންނަ ގިނަ ވިލާ ތަކުގައި ޕްރައިވެޓު ޕޫލް އެކުލެވެ އެވެ. އިއްޔެ މަރުވި ކުއްޖާ ފެނިފައިވަނީ ވޯޓާ ނުވަތަ ބީޗް ވިލާއަކުންކަން ކަށަވަރުވެފައެއް ނުވެ އެވެ.
