އިލެކްޝަންސް ކޮމިޝަން (އީސީ) އަށް ރައްޔިތުންގެ އިތުބާރު ކުޑަވަމުން އަންނަ ކަން، ޓްރާންސްޕޭރެންސީ މޯލްޑިވްސްގެ ދިރާސާއިން ދައްކައިފި އެވެ.
ޕްރީ-އިލެކްޝަންސް އެސެސްމަންޓްގެ ގޮތުގައި ކުރިއަށް އޮތް ރިޔާސީ އިންތިހާބުގެ ކުރިއަށް ރައްޔިތުންގެ އަސާސީ ހައްގުތަކާއި، ސިޔާސީ މަސްރަހު އަދި ރައްޔިތުންގެ ހިޔާލުތައް އޮތް ގޮތް ވަނީ ބަލައިފަ އެވެ.
ޓްރާންސްޕޭރެންސީ މޯލްޑިވްސްގެ ފަހުގެ ސާވޭތަކުންނާއި، އިންޓަނޭޝަނަލް ރިޕަބްލިކަން އިންސްޓިޓިއުޓްގެ ޕޯލްތަކުން ދައްކާ ގޮތުން 2013 ވަނަ އަހަރު އީސީއަށް 74 އިންސައްތަ މީހުންގެ އިތުބާރު އޮތް ކަމަށް ދެއްކި އެވެ. ނަމަވެސް މިދިޔަ 2022 ވަނަ އަހަރު އެ އަދަދު ވަނީ 43 އިންސައްތަ ދަށްވެފަ އެވެ.
ޑެސްކް ރިސާޗާއި ރިސާޗުތަކާއި ޕޯލުތަކުގެ ލިޔެކިޔުންތައް ދިރާސާކުރުމުގެ އިތުރަށް، މި އެސެސްމެންޓަށް ޓްރާންސްޕޭރެންސީ އިން ވަނީ ތަޖުރިބާކާރުންގެ ފަންނީ ލަފާގެ ގޮތުގައި 30 މީހުންގެ އިންޓަވިއު ނަގައިފަ އެވެ. އޭގެ ތެރޭގައި ދައުލަތުގެ މުއައްސަސާތަކާއި، ސިޔާސީ ޕާޓީތަކާއި، މީޑިއާތަކާއި، މަދަނީ ޖަމިއްޔާތަކާއި، ބައިނަލްއަގުވާމީ ޖަމިއްޔާތަކުގެ ބައެއް މަންދޫބުން ހިމެނެ އެވެ.
ޓްރާންސްޕޭރެންސީގެ ދިރާސާއިން ބުނި ގޮތުގައި، އިތުބާރު ކުޑަވުމަށް މެދުވެރިވާ އެއް ސަބަބަކީ ކޮމިޝަންގެ މެންބަރުންގެ ސުލޫކީ މިންގަނޑު ސާފު ނުވުމާއި ކޮމިޝަންގެ މެންބަރުން މަޖިލީހުގެ އަގުލަބިއްޔަތުން ވަކިކުރެވޭ ގޮތަށް އޮތުމެވެ. އަދި, މިހާރު އޮތް މަޖިލީހުގެ އަގުލަބިއްޔަތު ވެރިކަން ކުރާ މައި ޕާޓީ އެމްޑީޕީއަށް އޮތުމަކީ އޭގެ ސަބަބުން ސިޔާސީ ނުފޫޒު ފޯރުވަން އޮތް ފުރުސަތެއް ކަން ވެސް ފާހަގަކޮށްފައިވެ އެވެ.
ކޮމިޝަަނަށް އޮތް އިތުބާރު ކުޑަވުމަށް އިތުރަށް ޖާގަ ލިބޭ އިތުރު ކަމަކީ އިންތިހާބު ގާތްވަމުން އަންނަ ވަރަކަށް އެ ކޮމިޝަނަށް ސިޔާސީ ނުފޫޒު އޮތް ކަމަށް ސިޔާސީ ޕާޓީތަކުން ތުުހުމަތުކޮށް ފާޅުގައި އެ ވާހަކަ ދެއްކުން ކަމަށް ވެސް އެސެސްމަންޓް ރިޕޯޓްގައި ބުނެފައިވެ އެވެ.
އީސީގެ ފަންނީ ގާބިލުކަމާ މެދުު ކަންބޮޑުވުން ކުޑަ؛
ތަޖުރިބާކާރުންގެ އިންޓަވިއުތަކަށް ހަވާލާދީ، ޓްރާންސްޕޭރެންސީގެ ދިރާސާގައި ބުނެފައިވާ ގޮތުގައި ވޯޓުލުމުގެ އެންމެހާ މަރުހަލާތަކުގެ ކަންކަން ހިނގަނީ ހާމަކަން ބޮޑުކޮށް، ނޫސްވެރިންނާއި މޮނިޓަރުންނާއި އޮބްޒާވަރުންނާއި ކެންޑިޑޭޓުން ތަމްސީލުކުރާ މަންދޫބުންގެ ކުރިމަތީގަ އެވެ.
"ވޯޓު ލުމުގެ ކަންކަމުގެ ހާމަކަން ބޮޑުވުމާއި، ވޯޓުލާ ދުވަހުގެ އިޖުރާއަތްތައް ރޭވިފައިވާ ގޮތް ހަރުދަނާވުމުން، ނިޒާމީ ގޮތުން ވޯޓު އޮޅުވާލުމުގެ ފުރުސަތު ނެތް ކަން ފާހަގަ ކުރެވެ އެވެ," ޓްރާންސްޕޭރެންސީގެ ދިރާސާ ކަރުދާހުގައި ބަޔާންކޮށްފައިވެ އެވެ.
ނިޒާމީ ގޮތެއްގައި ވޯޓު އޮޅުވާ ނުލެވޭ ވަރަށް ސީދާ ވޯޓު ލުމުގެ ކަންކަން ރޭވިފައިވާ ކަމަށް ގަބޫލުކުރެވޭ ކަމަށް ޓްރާންސްޕޭރެންސީއަށް އިންޓިވިއު ދިން ތަޖުރިބާކާރުން ބުނެފައިވާ ކަމަށް އޭގައިވެ އެވެ. އަދި ވޯޓުގެ ސިއްރުކަން ކަށަވަރު ނުކުރެވޭ ފަދަ ސީރިއަސް ނިޒާމީ މައްސަލަތަކެއް ނެތް ކަމަށް ވެސް އޭގައިވެ އެވެ.
