މާލޭ ގެއެއްގައި ރަހީނުކޮށް އެކި ވަރުގެ އަނިޔާތަކެއް ދީފައިވާ ތިން ދިވެހިން ފުލުހުން މިއަދު ސަލާމަތްކޮށްފި އެވެ.
ފުލުހުން ބުނީ ރަހީނުކޮށްފައި ތިބި ތިން ދިވެހިން ސަލާމަތް ކުރީ އަބަދަށް އުފާ މަގުގައި ހުރި ގެއެއްގެ ދޮރު ވައްޓާލައި އެ ގެއަށް ގަދަކަމުން ވަދެގަނެގެން ކަމަށެވެ. ސަލާމަތް ކުރި ތިން ދިވެހިންނަށް ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށް ފުލުހުން ބުންޏެވެ.
"ފުލުހުންނަށް ލިބުނު މައުލޫމާތަކާ ގުޅިގެން ފުލުހުން އެޓެންޑުވެ، ބާރުގެ ބޭނުންކޮށްގެން އެތަނުގެ އެތެރެއަށް ވަދެފައިވޭ. އަދި ރަހީނުކޮށްފައި ތިބި ތިން ދިވެހިން ވަނީ ސަލާމަތްކޮށްފަ. އެމީހުންނަށް އެކިވަރުގެ އަނިޔާކޮށްފައިވޭ،" ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވެ އެވެ.
ރަހީނުކޮށްފައި ތިބި މީހުންނަށް ލިބިފައި ހުރި އަނިޔާތަކެއް ފުލުހުން ހާމައެއް ނުކުރެ އެވެ.
އެ މައްސަލައިގައި ދެ މީހަކު ހައްޔަރުކޮށްފައިވާ ކަމަށް ފުލުހުން ބުނެ އެވެ. ހައްޔަރު ކުރި މީހުންގެ ތެރޭގައި ކުޑަކުއްޖަކު ހިމެނޭ ކަމަށް ވެސް އެ އިދާރާއިން ބުނެ އެވެ.
ފުލުހުން ބުނީ އެ މައްސަަލަ ތަހުގީގުކުރަމުން އަންނަ ކަމަށެވެ.
