ކައިރި މުސްތަގުބަލެއްގައި ރާއްޖޭގައި ޑިޖިޓަލް ހަލާލް ސިސްޓަމެއް ތައާރަފު ކުރެވިގެން ދިޔުމަކީ ވަރަށް ބޮޑު އުއްމީދެއް ކަމަށް މިނިސްޓާ އޮފް އިސްލާމިކް އެފެއާޒް ޑރ. އަހުމަދު ޒާހިރު ބުރާސްފަތި ދުވަހު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ހަލާލް އިކޯ ސިސްޓަމް ދިވެލޮޕްމަންޓް 2023ގެ ނަމުގައި ބޭއްވި ވޯކްޝޮޕެއް ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ. އެއީ ރާއްޖޭގައި ޑިޖިޓަލް ހަލާލް ސިސްޓަމް ތައާރަފުކުރުމަށް ކުރާ މަސައްކަތްތަކުގެ ދަށުން ސެރޫނާއީ އީ-ކޮމާސްއިން ކަމާ ބެހޭ ދާއިރަތަކުގެ މީހުންނާއެކު ކުރިއަށް ގެންދިޔަ ވޯކްޝޮޕެކެވެ.
އެ ރަސްމިއްޔާތުގައި މިނިސްޓަރު ޒާހިރު ވިދާޅުވީ, ރާއްޖޭގައި ހަލާލް ސެޓްފިކެޓަ ދޫކުރުމުގެ މަސައްކަތް 2014 ވަނަ އަހަރު ފަށާފައިވާ ކަމަށާއި މިހާރު ހަތް ކުންފުންޏަކުން އެ ހިދުމަތް ލިބިގަންނަ ކަމަށެވެ. އަދި އެކްސްޕޯޓްކުރާ މަހުގެ ތަފާތު ބާވަތްތަކުގެ 100 އަށްވުރެ ގިނަ އުފެއްދުންތަކަށް ހަލާލު ސެޓްފިކެޓް ދޫކުރެވުނުކަން އޭނާ ފާހަގަކުރެއްވި އެވެ.
އެއީ ކުރިއެރުމެއް ނަމަވެސް, އުފެއްދުންތަކަށް ރާއްޖޭގެ ހަލާލް ސެޓްފިކެޓް ދޫކުރުމުގައި ގޮންޖެހުންތައް ހުރިކަން ވެސް މިނިސްޓަރު ފާހަގަކުރެއްވި އެވެ. އެގޮތުން, އެކްސްޕޯޓް އަދި އިމްޕޯޓްކުރާ އުފެއްދުންތަކުގައި ހުންނަ ތަކެތި ބަލައި ތަހުލީލުކުރާނެ ލެބޯޓްރީއެއް ރާއްޖޭގައި ނެތުމާއި, އެފަދަ އުފެއްދުންތައް ތަހުލީލުކުރާން ފަންނީ މީހުން މަދުވުން ހިމެނޭ ކަމަށް މިނިސްޓަރު ވިދާޅުވި އެވެ.
އެ މޭރުމުން ވާހަކަ ދައްކަވަމުން މިނިސްޓަރު ވިދާޅުވީ ރާއްޖޭގައި ހަލާލް ސެޓްފިކެޓާމެދު އޮންނަ ހޭލުންތެރިކަން އާންމުގެ ތެރޭގައި މަދުކަމަށެވެ. އަދި އެކަމަށް ހާއްސަ ގާނޫނީ އޮނިގަނޑެއް ނެތް ކަމަށް ވެސް ވިދާޅުވި އެވެ.
"އިސްލާމިކް ޑިވެލޮޕްމަންޓް ބޭންކް (އައިޑީބީ)ގެ އެހީތެރިކަމާއިއެކު ކުރިއަށް ގެންދެވޭ މި މަސައްކަތްތަކުގެ ދަށުން އުންމީދަކީ ކައިރި މުސްތަގުބަލެއްގައި ރާއްޖޭގައި ޑިޖިޓަލް ހަލާލް ސިސްޓަމް ތައާރަފްކުރެވިގެން ދިއުން،" މިނިސްޓަރު އަހުމަދު ޒާހިރު ވިދާޅުވި އެވެ.
މިނިސްޓަރު ޒާހިރު ވިދާޅުވީ ހަލާލް ސެޓްފިކެޓް ދޫކުރުމުގައި ހުރި ގޮންޖެހުންތަކުން އަރައިގަތުމަށް ސެރޫނާއީ އީ-ކޮމާސް ގުޅިގެން، ރާއްޖޭގައި ޑިޖިޓަލް ހަލާލް ނިޒާމެއް ގާއިމްކުރުމާ ގުޅޭ ގިނަ މަޝްވަރާތަކެއް ކުރިއަށް ގެންދިޔަ ކަމަށެވެ. އެގޮތުން, ރާއްޖެއަށް އެކްސްޕޯޓްކުރާ ތަކެތި، ޑިޖިޓަލައިޒްޑް ސިސްޓަމަކުން ޓްރެކްކޮށް، ޓެސްޓްކޮށް، މޮނިޓާ ކުރުމަށް ވަނީ މަޝްވަރާކޮށްފަ އެވެ.
