މެއި 21, ގައި ގްރޫޕަކުން ހުޅުމާލޭގައި ފުލުހަކަށް ހަމަލާދިން މައްސަލާގައި އިތުރު މީހަކު ހޯދަން ފުލުހުން އިއުލާނުކޮށްފި އެވެ.
ފުލުހުން މިއަދު ބުނީ އެ މައްސަލާގައި ފުލުހުން މިހާރު ހޯދަމުންދަނީ ދަޑިމަގު. ބޭރެފީށި، ޏ. ފުވައްމުލައް، މުހައްމަދު އަންސާމް އިބްރާހީމް، 23 ކަމަށެވެ. އަދި، ފުލުސް މީހާއަށް ހަމަލާދިނުމުގެ އިތުރުން ފުލުހުން ވަނީ އަންސާމްގެ މަސްތުވާތަކެތީގެ މައްސަލައެއް ވެސް ބަލަމުންދާ ކަމަށާއި އެ ދެ މައްސަލާގައި އޭނާ ހައްޔަރުކުރުމަށް ކޯޓު އަމުރެއް ނެރެފައިވާ ކަމަށް ބުނެފަ އެވެ.
އެ މައްސަލާގައި އެ ދުވަހު މާރާމާރީ ހިންގުމަށްފަހު ހުޅުމާލެ 53 ވަނަ ފްލެޓު ތެރޭގައި ތިބި ހަތަރު މީހަކު ހައްޔަރުކުރި އެވެ. އެއީ އުމުރުން 21 އަހަރުގެ މީހަކާއި 33 އަހަރުގެ މީހަކާއި 42 އަހަރުގެ މީހަކާއި 44 އަހަރުގެ މީހެކެވެ.
ފުލުހުން މެއި 22 ގައި ބުނީ އެ މީހުންގެ ބަންދު މުއްދަތު ޖަހަން ހުޅުމާލޭ ކޯޓަށް ގެންދިޔުމުން 21 އަހަރުގެ މީހާގެ ބަންދަށް ވަނީ 15 ދުވަސް ޖަހައިފަ އެވެ. 42 އަހަރުގެ މީހާއާއި 44 އަހަރުގެ މީހާގެ ބަންދަށް ހަތް ދުވަސް ޖަހާފައިވާއިރު 33 އަހަރުގެ މީހާގެ ބަންދަށް ޖެހީ ފަސް ދުވަހެވެ.
ފުލުސް މީހާއަށް ލިބުނު ޒަހަމްތަކަށް ފަރުވާދިނުމަށް ހޮސްޕިޓަލަށް ގެންދިޔުމަށްފަހު ހަމަލާދިން ދުވަހުގެ ރޭ ވަނީ ދޫކޮށްލާފަ އެވެ.
އެ ފުލުސް މީހާގެ ހިތްވަރަށް ތައުރީފުކޮށް ޕޮލިސް ކޮމިޝަނަރު މުހައްމަދު ހަމީދު ކުރެއްވި ޓްވީޓެއްގައި ވިދާޅުވެފައި ވަނީ އޭނާއަށް ހަމަލާ ދިނީ މާލޭގެ މަޝްހޫރު ގޭންގަކުން ކަމަށެވެ.
