މާރާމާރީ ހިންގަން އުޅެނިކޮށް މަޖީދީމަގުން ހުކުރު ދުވަހުގެ ރޭ ހައްޔަރުކުރީ, ޓާމިނަލް ކެފޭ ތެރޭގައި މަރާލި ނަދީމް އިބްރާހިމްގެ މަރުގެ ތުހުމަތުގައި ދައުވާކޮށް ދަށު ކޯޓުގައި ކުށް ސާބިތުނުވެގެން ދޫކޮށްލި މުހައްމަދު މަފާޒު ހުސެއިން ސަލީމްކަން އެނގިއްޖެ އެވެ.
ނަދީމްގެ މަރުގެ މައްސަލައިގައި, ޖުމުލަ ހަތަރު މީހުންގެ މައްޗަށް ދައުވާކުރިއިރު، ތޫނު އެއްޗަކުން ހަމަލާދީ މީހަކު މެރުމުގެ ދައުވާ އުފުލީ ހަމައެކަނި މަފާޒުގެ މައްޗަށެވެ. ނަމަވެސް އެ ދައުވާ ސާބިތުނުވުމުގެ ސަބަބުން, ކްރިމިނަލް ކޯޓުން ވަނީ އޭނާ މިނިވަން ކޮށްފަ އެވެ.
ރޭގެ މައްސަލައިގައި ބަންދުގެ މުއްދަތު އިތުރު ކުރަން މަފާޒު ކޯޓަށް ގެންދިއުމުން ކްރިމިނަލް ކޯޓުން ވަނީ އޭނާގެ ބަންދަށް 15 ދުވަަހުގެ މުއްދަތެއް ޖަހައިފަ އެވެ.
ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުމުގެ ތުހުމަތުގައި އޭނާ ހައްޔަރު ކުރިއިރު, ފުލުހުން ވަނީ އެ ސަރަހައްދުން ކަތިވަޅިއެއް ވެސް ހޯދާފަ އެވެ.
މި މާރާމާރީއާ ގުޅިގެން ފުލުހުން ކުރިން ބުނީ ގްރޫޕެއްގެ މެދުގައި ތޫނު ހަތިޔާރު ބޭނުންކޮށްގެން މާރާމާރީ ހިންގަން އުޅެނިކޮށް ފުލުހުންގެ ހައި ވިޒިބިލިޓީ ޑިޕާޓްމެންޓުން ހުއްޓުވާފައިވާ ކަމަށެވެ. އެ ގްރޫޕުގެ ތެރެއިން އެކަކު އަތުލައި ގަނެވުނުއިރު, އަނެއް ދެމީހުން ވަނީ ދުވެ ފިލާފަ އެވެ.
ނަމަވެސް އެމީހުން ފިލީ އެމީހުން ދުއްވަން ގެންގުޅު ސައިކަލު ދޫކޮށްލާފަ އެވެ. އެހެންކަމުން ފުލުހުން ވަނީ އެ ދެ ސައިކަލު ޓޯކޮށްފަ އެވެ.
ނަދީމްގެ މަރުގެ މައްސަލާގައި ތުހުމަތު ކުރެވި, ދައުވާ އުފުލާފައިވާ މީހަކު ރޭ މާރާމާރީއަކާ ގުޅިގެން ހައްޔަރުކޮށްފައިވާއިރު, ކްރިމިނަލް ކޯޓުގައި ކުށް ސާބިތުނުވި މައްސަލަ ދައުލަތުން ވަނީ ހައި ކޯޓުގައި އިސްތިއުނާފްކޮށްފަ އެވެ. ދަށު ކޯޓުގައި ސާބިތުނުވީ މައްސަލާގައި ސިއްރު ހެކިބަސް ދިން ދެމީހަކު, އެމީހުންގެ ހެކިބަސް އަނބުރާ ގެންދިއުމުންނެވެ.
ނަދީމްގެ ބޮލަށް އެ ހަމަލާ ދިން ކަމަށް ދައުލަތުން މަފާޒުގެ މައްޗަށް ތުހުމަތު ކުރަނީ ވެސް މޫނު ފޮރުވަން އަޅައިގެން ހުރި ފޮތިގަނޑު ވެއްޓިގެން މޫނު ފެނުނު ކަމަށް އެ ދެ ހެކިވެރިން ބުނެފައިވާ ބުނުމުގެ މައްޗަށެވެ. އެކަމަކު ދެ ހެކިން ފަހުން ކޯޓަށް ފޮނުވި ސިޓީގައި ބުނެފައިވަނީ އެހެން ޝަރީއަތުގައި ބުނީ ހީވި ހީވުމެއްގެ މައްޗަށް ކަމަށެވެ.
އެ ސިޓީތަކާ ގުޅިގެން ނަދީމްގެ ބޮލަށް ހަމަލާ ދިނީ ސީދާ މަފާޒު ކަމާ މެދު އުފެދޭ ޝައްކު ފިލުވައިނުލެވޭ ކަމަށް ގާޒީ ވިދާޅުވި އެވެ. އެހެންވެ މަފާޒުގެ މައްޗަށް ކުށް ސާބިތުނުވާ ކަމަށް ގާޒީ ނިންމެވި އެވެ.
