ސިޔާސީ ޕާޓީތަކުން މެމްބާޝިޕް ފޯމު ހުށަހެޅުމުން ޕާޓީތަކަށް ވައްދަން ހުށަހަޅާ މީހާއަށް އެކަން އަންގަންޖެހޭ ގޮތަށް ސިޔާސީ ޕާޓީގެ ގަވާއިދު ބުދަ ދުވަހު އިސްލާހުކޮށްފި އެވެ.
އެ ގަވާއިދަށް އިލެކްޝަންސް ކޮމިޝަނުން ގެނައި ހަ ވަނަ އިސްލާހުގައި ވަނީ މެމްބާޝިޕް ފޯމުތަކަށް ޝަކުވާ ހުށަހެޅުމުގެ އުސޫލެއް އެކުލަވާލައިފަ އެވެ. އޭގައިވާ ގޮތުން ޕާޓީއަކުން ފޯމު ހުށަހެޅުމުން ޕާޓީގައި ދަފުތަރު ކުރަން ބޭނުންވާ މީހާގެ ފޯނު ނަމްބަރަށް ކޮމިޝަނުން އެސްއެމްއެސްއެއް ފޮނުވަންޖެހެ އެވެ.
ކޮމިޝަނުން ފޮނުވާ އެސްއެމްއެސް ރައްދުވާ ފަރާތުން އެ މެސެޖަށް ހަތް ދުވަހުގެ ތެރޭގައި ޖަވާބުދޭންޖެހެ އެވެ. ނަމަވެސް މެސެޖަށް ޖަވާބު ނުދީފި ނަމަ ވާނެ ގޮތެއް އުސޫލުގައި ބުނެފައެއް ނުވެ އެވެ.
އިލެކްޝަންސް ކޮމިޝަނުން މިހާރު ވެސް ކުރަމުން އަންނަ ބައެއް ކަންކަން އާ އުސޫލުގެ ދަށުން ވަނީ ރަސްމީކޮށްފަ އެވެ. އެގޮތުން، ޕާޓީތަކުން މެމްބާޝިޕް ފޯމު ހުށަހެޅުމުން، ޝަކުވާ ހުށަހެޅުމުގެ ފުރުސަތު ދިނުމުގެ ގޮތުން، އޭގައިވާ މީހުންގެ މައުލޫމާތު އާންމުކުރުން ހިމެނެ އެވެ.
އެ އުސޫލުގެ ދަށުން ކޮމިޝަނުން ޝަކުވާއެއް ބަލައި އެއީ ސައްހަ ޝަކުވާއެއްކަން ސާބިތުވެއްޖެ ނަމަ އެ ޕާޓީއަކާމެދު "އުސޫލު ތަންދޭ މިންގަނޑުގެ ތެރޭގައި" ފިޔަވަޅު އަޅަންޖެހެ އެވެ.
އޭގެ އިތުރުން، ރައްޔިތުންގެ މަޖިލީހުގެ މެމްބަރުން ޕާޓީ ބަދަލު ކުރުމަށް ހުށަހެޅުމުން އެކަން އަވަހަށް ކުރިއަށް ގެންދެވޭނެ ގޮތެއް ވެސް އާ އުސޫލުން ވަނީ ކަނޑައަޅައިފަ އެވެ. ގާނޫނު ހަދާ މަޖިލީހުގެ މެމްބަރަކު ޕާޓީ ބަދަލުކޮށްދިނުމަށް ހުށަހަޅައިފި ނަމަ އެއް ދުވަހުގެ ތެރޭގައި އެކަން ކޮށްދޭންޖެހެ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސަޕޯޓަރުން އުފައްދަން މަސައްކަތް ކުރާ ދި ޑިމޮކްރެޓްސް އުފައްދަން ބޭނުންވާ 3000 ފޯމު ހަމަ ކުރުމަށްފަހު އިލެކްޝަންސް ކޮމިޝަނަށް ހުށަހެޅީ ބުރާސްފަތި ދުވަހެވެ. އެހެންކަމުން ޑިމޮކްރެޓްސް ހުށަހެޅި ފޯމުތަކަށް ޕްރޮސެސް ކުރާނީ އާ އުސޫލުގައިވާ ގޮތުގެ މަތިންނެވެ.
