ރާއްޖެ އާއި ޗާގޯސް އާއި ދެމެދު އިން ވަކިކުރި ގޮތާމެދު ހިތްހަމަނުޖެހި، އެއީ ދިވެހިންގެ ކަނޑުން ބައެއް ވިއްކާލީ ކަމަށް ބުނެ، "ފޯޅަވަހި ކޯލިޝަން" އިން ހުކުރު ދުވަހު މާލޭގައި ބާއްވާ އެއްވުމަށް އެންމެ ފަހުގެ ތައްޔާރީތައް ވަމުން ދަނިކޮށް، އެ އެއްވުމުގައި ޖުމްހޫރީ ޕާޓީގެ އެއްވެސް މެންބަރަކު ބައިވެރި ނުވުމަށް އެދި އެ ޕާޓީގެ ލީޑަރު ގާސިމް އިބްރާހިމް ވަނީ ހާއްސަ އިލްތިމާސްއެއް އިއްޔެ ކުރެއްވި އެވެ.
ފޯޅަވަހި ކޯލިޝަނަށް ޖުމްހޫރީ ޕާޓީން ތާއިދު ނުކުރިޔަސް، އެ ޕާޓީގެ ބައެއް މެމްބަރުން ފޯޅަވަހި ކޯލިޝަންގެ ހަރަކާތްތަކުން ފެނިގެންދެ އެވެ. ނަމަވެސްގާސިމް އިލްތިމާސް ކުރައްވާފައި މިވަނީ ސަރުކާރާ ދެކޮޅަށް ކުރިއަށް ގެންދާ އެ އެއްވުމުގައި އެ ޕާޓީގެ އެއްވެސް މެމްބަރަކު ބައިވެރި ނުވުމަށެވެ.
ރާއްޖޭގައި ހުންނެވި އެންމެ ބޮޑު މަހުޖަނު މިގޮތަށް އިލްތިމާސް ކުރެއްވީ އެ ޕާޓީ ކައުންސިލްގެ ވަޓްސްއެޕް ގުރޫޕަށް އިއްޔެ ފޮނުއްވި ދިގު މެސެޖެއްގަ އެވެ.
"ދޭއް ޖޫންގެ މުޒާހަރާގައި ޕާޓީގެ ލީޑަޝިޕާއި އާންމު މެންބަރުން ބައިވެރިވެ ވަޑައިނުގަތުމަކީ އަޅުގަނޑުގެ އިހުލާސްތެރި ނަސޭހަތާއި އަދި އިލްތިމާސް އެކެވެ،" އެ މެސެޖުގައި ލިޔުއްވައިފައިވެ އެވެ.
ޕާޓީގެ މެމްބަރުންނަށް ގާސިމް ހަނދާން އާކޮށްދެއްވީ ކުރީގެ ރައީސް އަބްދުﷲ ޔާމީންގެ ވެރިކަމާ ދެކޮޅަށް އޭރު އިދިކޮޅު ޕާޓީތަކުން މެއި 1، 2015 ގައި ބޭއްވި "މޭޑޭ މުޒާހަރާ"ގެ ނަތީޖާ ނުކުތް ގޮތެވެ.
ގާސިމް ވިދާޅުވީ މޭޑޭގެ މުޒާހަރާއިން ނުކުންނާނެ ކަމަށް ލަފާ ކުރި ނަތީޖާ އާއި ނުކުތް ނަތީޖާ ވަރަށް ބޮޑަށް ތަފާތު ކަމަށާއި އެ މުޒާހަރާގައި ވެސް ޖުމްހޫރީ ޕާޓީން ބައިވެރިނުވަން ނިންމީ ނަތީޖާ ގޯސްވެދާނެ ކަމަށް ލަފާ ކުރެވޭތީ ކަމަށެވެ.
ހުކުރު ދުވަހުގެ އެއްވުމުގެ މިސްރާބާއި ނަތީޖާ ޖުމްހޫރީ ޕާޓީގެ ލީޑަޝިޕުގެ ގިނަ މެންބަރުންނަށް އޮޅިފައި ނޯންނާނެ ކަމަށާއި އެންމެ ފަހުން ބޭއްވި އެ ޕާޓީގެ ކައުންސިލްގެ ބައްދަލުވުމުގައި ނިންމި ގޮތަށް ގައުމުގެ އަމަންއަމާންކަމާއި ސުލްހަ މަސަލަސްކަން އިސް ކުރުމަށް، ރާއްޖޭގެ އެންމެ ބޮޑު އެއް މަހުޖަނު ގާސިމް އެދިވަޑައިގެންނެވި އެވެ.
އެ އެއްވުމުގައި ބައިވެރި ނުވުމަށް ގާސިމް އިލްތިމާސް ކުރެއްވިއިރު، ޖުމްހޫރީ ޕާޓީގައި އިސްކޮށް ހަރަކާތްތެރިވާ ބައެއް ފަރާތްތަކުން މީގެ ކުރިން ވަނީ ފޯޅަވަހި ކޯލިޝަނާ އެކު މަސައްކަތްތަކެއް ވެސް ކުރައްވައިފަ އެވެ. ނަމަވެސް އެ ޕާޓީން ކަނޑުގެ އިންވަކިކުރުމުގެ މައްސަލައިގައި ރަސްމީކޮށް ވަކި ސްޓޭންޑެއް ނަގައިފައެއް ނުވެ އެވެ.
ރާއްޖޭގެ ކަނޑުން ބައެއް ވިއްކާލައިފައިވާ ކަމަށް ބުނެ ފޯޅަވަހި ކޯލިޝަނުން އެއްވުމެއް ބޭއްވުމަށް ތައްޔާރުވަމުން ދާއިރު އެ ކޯލިޝަނުގެ ތެރޭގައި ވެސް ވަނީ ބައެއް ކަންކަމުގައި ދެބަސްވެ ހިޔާލު ތަފާތުވެފަ އެވެ.
ފޯޅަވަހި ކޯލިޝަންގައި ހިމެނެނީ ޕީޕީއެމް, ޕީއެންސީ، އެމްއެންޕީ، އެމްޑީޕީން ވަކިވެ އާ ޕާޓީއެއް އުފެއްދުމުގެ މަސައްކަތް ކުރަމުން އަންނަ އެމްޑީޕީގެ ރައީސް މުހައްމަދު ނަޝީދުގެ ސަޕޯޓަރުންނާއި ރިޔާސީ އިންތިހާބުގައި ވާދަކުރައްވާނެކަން އިއުލާނު ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރު އަދި ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި ކުރީގެ ބަންޑާރަ ނައިބު އާޒިމާ ޝަކޫރެވެ.
ހުކުރު ދުވަހުގެ އެއްވުމުގައި ޖުމްހޫރީ ޕާޓީގެ އެއްވެސް މެންބަރަކު ބައިވެރިނުވުމަށް ގާސިމް އެދިވަޑައިގެންފައި ވާއިރު، އަލަށް އުފައްދާ ދަ ޑިމޮކުރެޓްސް އިން ވެސް އަދި އެ އެއްވުމުގައި ބައިވެރިވުމާ މެދު ގޮތެއް ނުނިންމަ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
އޯލެވެލްގެ ނަތީޖާ ދަށްވުމާ ގުޅޭ ގޮތުން އެޑިއުކޭޝަން މިނިސްޓަރު ޑރ. އައިޝަތު އަލީއާ އިއްޔެ ރައްޔިތުންގެ މަޖިލީހުގެ ޖަލްސާގައި ކުރެއްވި ސުވާލުތަކަށް ޖަވާބު ދެއްވަމުން ވިދާޅުވީ،
"އެހެންވީމާ އަޅުގަނޑުމެންނަށް ފެންނަނީ އަސްލު ރެޕްރެސެންޓޭޝަން އެއް ނޫން. ފަސް މާއްދާއިން ފާސްވާ ކުދިން ކަލްކިއުލޭޓް ކުރަން އޮފް ރޯލް ކުރަނީ. އެއީ ފާސް ނުވާނެހެން ހީވާ ކުދިން ބާކީކޮށްފައި ފާސްވާނެ ކުދިން ކަލްކިއުލޭޝަނަށް ލާފަ ތަފާސްހިސާބު ހަދަނީ,"
ދުވަހުގެ ފޮޓޯ
ބޭނުންކުރަން ފެށުމުގެ ކުރިން އަންދާލި ނ. ލަންދޫ ކައުންސިލްގެ ޕިކަޕް
