ފުވައްމުލަކު ސިޓީގައި ނުރައްކާތެރި އެކްސިޑެންޓެއް ހިނގައި ދެ ޒުވާނަކު ޒަހަމްވެއްޖެ އެވެ.
ފުލުހުން މިއަދު ބުނީ މި އެކްސިޑެންޓު ހިނގީ ރޭ 23:25 ހާއިރު ދެ ސައިކަލެއް ޖެހިގެން ކަމަށެވެ. އަދި މި އެކްސިޑެންޓުގައި އަނިޔާވެފައިވަނީ 18 އަދި 19 އަހަރުގެ ދެ ޒުވާނުންނަށް ކަމަށްވެސް ފުލުހުން ވަނީ ބުނެފަ އެވެ.
މި ދެ ޒުވާނުންނަށްވެސް މިހާރު އަންނަނީ ފުވައްމުލަކު ހޮސްޕިޓަލުގައި ފަރުވާދެމުންނެވެ. ދެ ޒުވާނުންނަށް ލިބިފައިވާ ޒަހަމްތަކުގެ ތަފުސީލެއް ފުލުހުން މިހާތަނަށް ދީފައިނުވާއިރު އެކްސިޑެންޓު ހިނގި ސަރަހައްދުގެ މަންޒަރު ފެންނަ ވީޑިއޯއެއް ސޯޝަލްމީޑިއާގައި ވަނީ އާންމުވެފަ އެވެ. އެ ވީޑިއޯއިން ފެންނަ ގޮތުން އެކްސިޑެންޓުވި ދެ ސައިކަލަށްވެސް ބޮޑެތި ގެއްލުންތަކެއް ވަނީ ލިބިފަ އެވެ.
ފުލުހުން އިތުރަށް ބުނީ އެ އިދާރާއިން މި މައްސަލަ އިތުރަށް ތަހުގީގުކުރަމުން ގެންދާ ކަމަށާއި އެކްސިޑެންޓުވި ދެ ޒުވާނުންނަކީވެސް ސައިކަލު ދުއްވުމުގެ ލައިސަންސު އޮތް ދެ މީހުން ކަމަށެވެ.
ޖާގައިގެ ގޮތުން ބޮޑު ފުވައްމުލަކަކީ މީގެ ކުރިންވެސް ނުރައްކާތެރި އެކްސިޑެންޓުތަކެއް ހިނގާފައިވާ ރަށެކެވެ.
