ރާއްޖެއިން ބޭރުން މީހުން ގެނެސްގެން ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރާ ކަމުގެ ތުހުމަތުގައި ބަންގްލަދޭޝްގެ ރައްޔިތަކު ހައްޔަރުކޮށްފި އެވެ.
ހަށިވިއްކުމުގެ ތުހުމަތުގައި ވިލިމާލޭގައި ދިރިއުޅޭ އެމްޑީ ފައިޖުލް އިސްލާމް، 33، މިދިޔަ ބުރާސްފަތި ދުވަހު ހައްޔަރު ކުރުމަށްފަހު، މައްސަލައިގެ ތަހުގީގަށް އޭނާ ބަންދު ކުރަން ކްރިމިނަލް ކޯޓަަށް ގެންދިޔުމުން އިއްޔެ އެ ކޯޓުން ވަނީ އޭނާގެ ބަންދަށް 15 ދުވަސް ދީފަ އެވެ.
ފުލުހުން ކްރިމިނަލް ކޯޓުގައި ބުނި ގޮތުގައި، ފައިޖުލް އިސްލާމްއަކީ ފުޅާ ދާއިރާއެއްގައި ރާއްޖެއިން ބޭރުން މީހުން ގެނެސްގެން ހަށިވިއްކުމުގެ ވިޔަފާރި ކުރާ މީހެކެވެ. އަދި އޭނާއަކީ އެ ނެޓްވޯކުގެ އިސް ފަރާތް ކަމަށް ވެސް ފުލުހުން ތުހުމަތު ކުރެ އެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުގައި، އޭނާގެ މައްޗަށް ކޮންމެވެސް މިންވަރެއްގެ ތުހުމަތެއް އުފެދޭ ވަރަށް ހެކި ފުލުހުން ކޯޓަށް ހުށަހެޅި އެވެ. އޭގެ ތެރޭގައި ހިމެނީ، ފުލުހުންގެ އިންޓެލިޖެންސް ރިޕޯޓުތަކާއި ތަހުގީގު ރިޕޯޓެކެވެ.
ކޯޓުން އޭނާ ބަންދު ކުރަން ނިންމީ ވެސް، އޭނާ އަކީ ނެޓްވޯކުގެ އިސް މީހާ ކަމަށް ތުހުމަތު ކުރެވޭ އިރު، މައްސަލައިގައި ހިމެނޭ ހެކީންނަށް ނުފޫޒު ފޯރުވާފާނެ ކަމަށް އަދި ފިލައިގެން ގޮސްފާނެ ކަމަށް ބަލައިގެންނެވެ.
