އެމްއާރްއެމް އުވައިލީ ރަނގަޅަށް ކަމަށް ގަބޫލުނުކުރެވޭ ނަަމަ އިލެކްޝަންސް ކޮމިޝަން (އީސީ) ބަދުނާމުކޮށް ވާހަކަ ދެއްކުމުގެ ބަދަލުގައި އެ މައްސަލަ ކޯޓަށް ހުށަހަޅަން އެދޭ ކަމަށް އެ ކޮމިޝަނުން މިއަދު ބުނެފި އެވެ.
އެމްއާރްއެމް އުވާލުމުން އިއްޔެ ބޭއްވި ނޫސްވެރިންގެ ބައްދަލުވުމެއްގައި އެމްއާރްއެމްގެ ރައީސް ފާރިސް މައުމޫނު ވިދާޅުވީ ސިޔާސީ ޕާޓީއެއްގައި ގާނޫނީ ގޮތުން ހަމަވާން ޖެހޭ އަދަދަށް ވުރެ މާ އިތުރަށް ވެސް އެމްއާރްއެމުން އީސީއަށް މެމްބަޝިޕް ފޯމް ހުށަހަޅާފައި ވާނެ ކަމަށެވެ. އެހެން ނަމަވެސް "ގޮތް ނޭނގޭ ގޮތް ތަކަކުން" އެ މެމްބަރުން ޕާޓީން ވަކިކޮށްފައިވާ ކަމަށް އޭނާ ތުހުމަތު ކުރެއްވި އެވެ.
"އަޅުގަނޑުމެން މި ދަންނަވާ ގޮތް މިއީ ހަގީގަތްކަން އިރާދަކުރެއްވިއްޔާ ރައްޔިތުންނަށް ވެސް. [ޕާޓީގެ] މެމްބަރުންނަށް ވެސް ސާބިތުކޮށްދޭނަން،" ފާރިޝް ވިދާޅުވި އެވެ.
އީސީގެ ނައިބު ރައީސް އިސްމާއީލް ހަބީބު ވިދާޅުވީ އެމްއާރްއެމް އުވައިލުމުގައި އެކޮމިޝަނުން އަމަލުކުރީ ގަވައިދާ އެއްގޮތަށް ކަމަށެވެ. އެ ޕާޓީއަށް މެމްބަރުން ހަމަކުރަން އެންމެ ފަހުން ހުށަހެޅި ފޯމްތަކުގެ ދެބައިކުޅަ އެއްބައި ވެސް ސައްހަ ނޫން ކަމަށެވެ. އެ ފޯމްތައް ސައްހަ ނުވި އިރު ގިނަ އަދަދެއްގެ ބަޔަކު އެމްއާރްއެމުން ވަކިވި ކަމަށް ވެސް އޭނާ ވިދާޅުވި އެވެ.
"ދެން އޭގައި އެއްވެސް މައްސަލައެއް އުޅެންޏާ އަޅުގަނޑުމެން ވަރަށް އިހުތިރާމާ އެކީ މި ދަންނަވަނީ، އެ ބޭފުޅުންގެ ހައްގެއް ގެއްލޭ ކަމަށް ގަބޫލުކުރެއްވެންޏާ ކޯޓަށް ވަޑައިގެން ހަމަ ވަކާލާތުކުރައްވަންވީ އިނގޭތޯ،" ހަބީބް ވިދާޅުވި އެވެ.
އޭގެ ބަދަލުގައި ކޮމިޝަން ބަދުނާމުކުރަން، ނޫސްކޮންފަރެންސްތައް ބާއްވައިގެން ހަގީގަތާ ހިލާފު ވާހަކަ ދެއްކުމަކީ ރަނގަޅުކަމެއް ނޫންކަމަށް ވެސް އޭނާ ވިދާޅުވި އެވެ.
ސިޔާސީ ޕާޓީތަކުގެ ގާނޫނުގައި ބަޔާންކޮށްފައިވާ ގޮތުގައި ޕާޓީއެއްގެ ގޮތުގައި ބަލައިގަންނާނީ 3,000 މެމްބަރުން ހަމަވާ ޕާޓީތަކެވެ. އަދި, ދަައުލަތުން ފައިސާ ދޫކުރާނީ 10,000 މެމްބަރުން ހަމަވާ ޕާޓީތަކަށެވެ.
އޭގެ ތެރެއިން އެއްވެސް އަދަދަކަށް ބޭނުންވާ ވަރަށް އެމްއާރުއެމްގައި މެމްބަރުން ހަމަ ނުވެ އެވެ. އަދި, އެ ޕާޓީން ސިޔާސީ ހަރަކާތްތައް ހިންގާ މަންޒަރެއް ވެސް ނުފެނެ އެވެ.
މިދިޔަ ޖޫން މަހުގެ ތެރޭގައި ވެސް 3000 މެންބަރުން ހަމަނުވެގެން އެމްއާރްއެމް ޕާޓީ އުވާލާނެ ކަމުގެ ނޯޓިސް އޮތީ ދީފަ އެވެ. އެކަމަކު ނޯޓިސް ދިނުމާ ގުޅިގެން އެމްއާރްއެމުން ވަނީ މެންބަރުން ހަމަކޮށްފަ އެވެ.
ނަމަވެސް, އެންމެ ފަހުން އިލެކްޝަންސް ކޮމިޝަނުން އާންމު ކުރި ތަފާސް ހިސާބުތަކުން ދައްކާ ގޮތުގައި އެ ޕާޓީގައި އޭރު ތިބީ އެންމެ 2,900 މެންބަރުންނެވެ.
