ގަވާއިދާ ހިލާފަށް ރާއްޖޭގައި މަސައްކަތްކުރާ ބިދޭސީން ގަވައިދަށް ފެއްތުމުގެ އުސޫލު ކުރިއަށް ވުރެ ހަރުދަނާކޮށް، ބިދޭސީން ރާއްޖޭގައި ވަޒީފާ އަދާކުރުމުގެ ގަވައިދު އަލުން ގެޒެޓްކޮށްފި އެވެ.
ދެހާސް އަކާވީސް ވަނަ އަހަރު އަމަލު ކުރަން ފެށި "ދިވެހިރާއްޖޭގައި ބިދޭސީން ވަޒީފާ އަދާކުރުމުގެ ގަވައިދު" އިސްލާހުކޮށް އިއްޔެ ވަނީ ހަމަ އެ ނަމުގައި ގަވައިދެއް ގެޒެޓްކޮށްފަ އެވެ.
އާ ގަވައިދުގައިވާ ގޮތުން ރެގިއުލަރައިޒްކުރަން ހުށަަހަޅާ ބިދޭސީންނާ ހަވާލުވެވޭނީ ވަޒީފާ އަދާކުރުމާ ގުޅޭ ގޮތުން އެކުލަވައިލާ ގަވައިދަކާ ހިލާފުވެފައި ނުވާ ނަމަ އެވެ. ކުރީގެ ގަވައިދުގައި އެ ޝަރުތެއް ނެތެވެ.
އެހެން ނަމަވެސް ކުރީގެ ގަވައިދުގައިވާ ގޮތުން، ގަވައިދަށް ފެެތެން އެދި ހުށަހަޅާ ބިދޭސީ މީހާ އަށް ވަޒީފާ ދިނުމުގެ ހުއްދަ ކުރިން ލިބުނު ފަރާތަަކަށް އޭނާއާ އަލުން ހަވާލެއް ނުވެވޭނެ އެވެ. އާ ގަވައިދު އެކަމަށް ހުރަހެއް ނާޅަ އެވެ.
ގަވައިދަށް ފެތެން އެދެވޭނެ ބިދޭސީންނަކީ ސައްހަ ހުއްދައެއްގައި ރާއްޖެ އައިސް، ހޯދަންޖެހޭ އެހެން ހުއްދަތައް ނުހޯދާ ތިބި ބިދޭސީންނަށް ވާންޖެހެ އެވެ. އެފަދަ ބިދޭސީން ގަވައިދަށް ފެތެން އެދި ހުށަހެޅުމުން އޭނާއަކީ ކާކުކަން ދެނެގަތުމުގެ މަރުހަލާގައި އިކޮނޮމިކް މިނިސްޓްރީން އަންގާ ތަނަކަށް ބިދޭސީ މީހާ ގެންދާންޖެހޭނީ ވަޒީފާ ދޭ ފަރާތުންނެވެ.
ކާކުކަން ދެނެގަތުމުގެ މަރުހަލާގައި ބިދޭސީ މީހާ އެއްބާރުލުން ނުދީފި ނަމަ އޭނާ ގަވައިދަށް ނުފައްތައި އއަނބުރާ ގައުމަށް ފޮނުވައިލަން އެންގެ އެވެ.
