އީސީގެ ޖޮބް ފެއާ: ވަޒީފާގެ ގިނަ ފުރުސަތުތަކެއް

ރިޔާސީ އިންތިހާބުގެ މަސައްކަތްތަކަށް ބޭނުންވާ ވަގުތީ މުވައްޒަފުންނާއި ވޯޓު މަރުކަޒުތަކަށް އޮފިޝަލުން ހޯދަން ބާއްވާ ޖޮބް ފެއާ މާދަމާ ދަރުބާރުގޭގައި ފަށާނެ އެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ޖޮބް ފެއާ ކުރިއަށް ދާނީ ހޮނިހިރު ދުވަހާއި އާދީއްތަ ދުވަހު ހެނދުނު 10:00 އިން ރޭގަނޑު 10:00 އަށެވެ. ޖޮބް ފެއާއަށް ޒިޔާރަތް ކުރުމުން ވަގުތުން އިންޓަވިއުކޮށް ވަޒީފާގެ ކަންކަން ކުރިއަށް ގެންދާން ފަށާނެ ކަމަށެވެ.

"އައިޑީ ކާޑާއި ތައުލީމީ ސެޓްފިކެޓުތައް ހިފައިގެން ވަޑައިގަތުމުން ޓެސްޓު ދޭންޖެހޭނަމަ ޓެސްޓު ދީ، އިންޓަވިއުކޮށްފައި ދެ ދުވަހެއްގެ ތެރޭގައި އަންގާނަ ހޮވުނުކަން ނުވަތަ ނޫންކަން،" އޭނާ ވިދާޅުވި އެވެ.

ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ހަރަކާތްތެރިވުމަށް ގާތްގަނޑަކަށް 6000 އޮފިޝަލުން ބޭނުންވާއިރު، މިހާތަނަށް ލިބިފައިވަނީ 1،300 އޮފިޝަލުން ކަމަށެވެ.

ޖޮބް ފެއާގައި ކޮމްޕްލެއިންޓްސް ބިއުރޯއަށް ބޭނުންވާ މެމްބަރުން ވެސް ހޯދުން ހިމެނެ އެވެ. އެ މަގާމަށް ބޭނުންވަނީ ގާނޫނީ ދާއިރާގެ ޑިގްރީއެއް އޮތުމާއެކު ތަޖުރިބާ ލިބިފައިވާ ފަރާތްތަކެވެ.

އިންތިހާބުގެ މަސައްކަތްތަކަށް މުވައްޒަފުން ބޭނުންވާ ދާއިރާތައް

• ކޮމްޕްލެއިންޓްސް ބިއުރޯގެ މެމްބަރުން
• މެނޭޖަރު
• މީޑިއާ އޮފިސަރު
• ސީނިއާ އޮފިސަރު
• ގްރެފިކްސް ޑިޒައިނަރު
• ފޮޓޯގްރާފަރު
• އޮފިސަރުން
• މަސައްކަތު މީހުން
• ސެކިއުރިޓީ އޮފިސަރުން
• ޑްރައިވަރުން
• ސަޕޯޓު އޮފިސަރުން
• ވޯޓު މަރުކަޒުގެ އޮފިޝަލުން

"މިއީ ވަގުތީ ވަޒީފާއެއް ނަމަވެސް، މި ވަޒީފާތަކުގެ ތެރެއިން ގިނަ ވަޒީފާތަކުގައި އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބާ ހަމައަށް ތިބޭނެ،" ހަބީބު ވިދާޅުވި އެވެ.

އިންތިހާބަށް ނަގާ ވަގުތީ މުވައްޒަފުންގެ ތެރެއިން ގިނައީ ވޯޓު މަރުކަޒުގެ އޮފިޝަލުންނެވެ. މިހާތަނަށް އޮފިޝަލުންގެ ގޮތުގައި 1،300 މީހުން ލިބިފައި ވިޔަސް، ރަށްރަށުގައި އޮފިޝަލުން ލިބުމުގެ ދަތިކަމެއް ނޫޅޭނެ ކަމަށް ހަބީބު ވިދާޅުވި އެވެ.

ވޯޓު މަރުކަޒުގެ އޮފިޝަލުންގެ ޝަރުތު

• އުމުރުން 18 އަހަރު ފުރުން
• ސިޔާސީ ޕާޓީއެއްގެ އިސް މަގާމެއް އަދާކުރާ މީހަކަށް ނުވުން
• ކެންޑިޑޭޓެއްގެ ކެމްޕޭން ހަރަކާތްތަކުގައި އަމަލީ ގޮތުން ބައިވެރިވާ މީހަކަށް ނުވުން
• އޮފިޝަލަކަށްވުމަށް އެދި ފޯމު ހުށަހެޅި ދާއިރާ/ ރަށަށް ކުރިމަތިލާ ކެންޑިޑޭޓެއްގެ މަންމައެއް، ބައްޕައެއް، ދަރިއެއް، އަންބެއް، ފިރިއެއް، އެއްބަނޑުއެއްބަފާ، އެއްބަނޑު ނުވަތަ އެއްބަފާ މީހަކަށް ނުވުން
• އޮފިޝަލެއްގެ މަސައްކަތް ކުރެވޭނެ ތައުލީމާއި ތަޖުރިބާ ހުރުން
• މިފަދަ މަސައްކަތަކަށް ސިއްހީ ގޮތުން ގާބިލް މީހަކަށް ވުން
• ޖިނާއީ ކުށެއްގެ ޙުކުމް ތަންފީޒުކުރަމުންދާ މީހަކަށް ނުވުން

ވޯޓުލާ މަރުކަޒުގެ އޮފިޝަލުން އުޖޫރަ

• ވޯޓުލާ މަރުކަޒުގެ ވެރިޔާ: 1500ރ. - (ހަމައެކަނި ވޯޓުލާ ދުވަހު)
• ވޯޓުލާ މަރުކަޒުގެ ވެރިޔާގެ އެހީތެރިޔާ - 1،200ރ. (ހަމައެކަނި ވޯޓުލާ ދުވަހު)
• ވޯޓުލާ މަރުކަޒު އޮފިޝަލުން: 1،000ރ. (ހަމައެކަނި ވޯޓުލާ ދުވަހު)
• ރިޒާވް އޮފިޝަލުން: 500ރ. (ހަމައެކަނި ވޯޓުލާ ދުވަހު)

titledesc