ރައީސް އިބްރާހިމް މުހައްމަދު ސޯލިހު ދަތުރުކުރައްވަމުން ގެންދެވި މޮޓޯކޭޑަށް ބަޔަކު ހުރަސްއެޅި މައްސަލައިގައި އޭރު ޕްރެޒެޑެންޝިއަލް ގާޑްސްގެ ކޮމާންޑިން އޮފިސަރުގެ މަގާމުގައި ހުންނެވި ކާނަލް އަބްދުﷲ އިބްރާހިމް މަގާމުން އެކަހެރި ކުރުމަށްފަހު ކުރިއަށްގެންދިޔަ އިންކުއަރީން އޭނާގެ އެއްވެސް އިހުމާލެއް ނެތް ކަމަށް ނިންމައިފި އެވެ.
މި ހާދިސާ ހިނގުމާ އެކު އެމްއެންޑީއެފުން އެތެރޭގެ އިންކުއަރީއެއް ފަށައި ޕްރެޒިޑެންޝިއަލް ގާޑްސްގެ ކޮމާންޑަރު ކަމުން އޭނާ އެކަހެރި ކުރި އެވެ. އަދި ބަދަލުގައި އެމަގާމު ވަގުތީގޮތުން ހަވާލުކުރީ މޭޖާ އިބްރާހިމް ހަލީމްއާ އެވެ. އޭގެ ފަހުން, ދާއިމީ ގޮތެއްގައި ޕްރެޒިޑެންޝިއަލް ގާޑްސްއަށް ކޮމާންޑަރަކު އައްޔަނުކުރިކަން އެމްއެންޑީއެފުން ހާމަކޮށްފައި ނުވެ އެވެ.
މި ކަމާ ގުޅިގެން އެމްއެންޑީއެފުން މިއަދު ނެރުނު ބަޔާނެއްގައި ބުނީ ކާނަލް އަބްދުﷲ އިބްރާހިމް މަގާމުން އެކެހެރިކުރީ އެޅި ފިޔަވަޅެއްގެ ގޮތުން ނޫން ކަމަށެވެ.
"މިގޮތަށް ކޮމާންޑަރުން އަދާކުރައްވާ ޒިންމާއާއި މަސްއޫލިއްޔަތުތަކުން ވަގުތީ ގޮތުން އެކަހެރިކުރަނީ އެފަދަ ކަންކަމުގެ އިންކުއަރީ އެއްވެސް ފަރާތެއްގެ ނުފޫޒެއްނެތި އިންސާފުވެރިކަމާއެކު ހިންގުމަށެވެ." އެމްއެންޑީއެފްގެ ބަޔާނުގައި ބުނެފައިވެ އެވެ.
އަދި، މި މައްސަލައިގައި ހިންގި ތަހުގީގުން ކާނަލް އަބްދުﷲ އިބްރާހިމްގެ އެއްވެސް އިހުމާލެއްގައި ނެތް ކަމަށް ވެސް ބުނެފައިވެ އެވެ.
މާޗު 20 ވަނަ ދުވަހުގެ ރޭ ހުޅުމާލޭގައި އޮތް އިވެންޓަކަށްފަހު ރައީސް އަދި އަނބިކަބަލުން ދަތުރުކުރައްވަމުން ގެންދެވި މޮޓޯކޭޑަށް ހުރަސްއެޅީ އިދިކޮޅު ޕީޕީއެމް އޮފީސް ކުރިމަތީ މުޒާހަރާކުރަމުންދިޔަ އިދިކޮޅު އެކްޓިވިސްޓުންނެވެ. އަދި, މޮޓޯކޭޑު ތާާށިވެ 15 ވަރަކަށް މިނެޓު އެ ސަރަހައްދުގައި އޮތެވެ. އެކަމާ ގުޅިގެން ގިނަ ބަޔަކު ވަނީ އެއީ ސިފައިންގެ ސެކިއުރިޓީ ފެއިލިއާއެއް ކަމަށް ބުނެ ވަރަށް ބޮޑަށް ފާޑުކިޔާފަ އެވެ.
އެ މައްސަލާގައި ޕީޕީއެމްގެ އިސް އެކްޓިވިސްޓެއް ކަމަށްވާ މުހައްމަދު އައްބާސްގެ އިތުރުން ތިން މީހަކު ހައްޔަރުކޮށް ބަންދުގެ މުއްދަތުވެސް ވަނީ ޖަހާފަ އެވެ. އަދި, ސިފައިންގެ ތެރޭގައި ހާއްސަ ކޮމިޓީއެއް އުފައްދާ، އަބްދުﷲ ގެ އިތުރުން އެހެން އޮފިސަރުންވެސް މަގާމުން އެކަހެރިކުރި އެވެ.
މޮޓޯކޭޑަށް ހުރަސްއެޅުމާ ގުޅިގެން މަޖިލީހުގެ 241 ކޮމިޓީއިންވެސް ވަނީ ޑިފެންސް މިނިސްޓަރު މާރީޔާ ދީދީ ހާޒިރުކޮށް ސިއްރު ބައްދަލުވުންތަކެއް ކުރިއަށް ގެންގޮސްފައިވެ އެވެ.
