ރައީސް އިބްރާހިމް މުހައްމަދު ސޯލިހު ދަތުރުކުރައްވަމުން ގެންދެވި މޮޓޯކޭޑަށް ބަޔަކު ހުރަސްއެޅި މައްސަލާގައި މަސްއޫލިއްޔަތުތަކުން އެކަހެރިކުރި އޭރު ޕްރެޒެޑެންޝިއަލް ގާޑްސްގެ ކޮމާންޑިން އޮފިސަރުގެ މަގާމުގައި ހުންނެވި އަބްދުﷲ އިބްރާހިމަށް ބްރިގޭޑިއާ ޖެނެރަލްގެ މަގާމަށް ޕްރޮމޯޓު ކޮށްފި އެވެ.
ސިފައިންގެ މަގާމުތައް ބެހިފައިވާގޮތުން ހަތަރުވަނައަށް އެންމެ މަތީ ރޭންކަށް އަބްދުﷲ ޕްރޮމޯޓުކޮށްފައި މިވަނީ ރައީސްގެ މޮޓޯކޭޑަށް ބަޔަކު ހުރަސް އަޅައި ހުއްޓުވިތާ ދެ މަސްދުވަސް ނުވަނީހެވެ.
އަބްދުﷲ އަށް މަގާމުގެ ކުރިއެރުން ދީފައިވާކަން ސިފައިންގެ މީޑިއާ އޮފިޝަލް މިއަދު "އަދަދު" އަށް ކަށަވަރުކޮށްދީފައިވާއިރު އިތުރަށް އެ މައްސަލައާ ގުޅިގެން އަބްދުﷲ ސަސްޕެންޑު ނުކުރާ ކަމަށާއި ވަޒީފާއިން އެކަހެރިކުރީ ސިފައިންގެ ގަވާއިދު ބުނާ ގޮތުގެ މަތިން ކަމަށެވެ.
ރައީސްގެ ސެކިއުރިޓީ ބެލެހެއްޓުމުގެ ކޮމާންޑު ފަހުން ވަނީ ވަގުތީގޮތުން ހަވާލުކުރީ މޭޖާ އިބްރާހިމް ހަލީމްއާ އެވެ. އޭގެ ފަހުން, ދާއިމީ ގޮތެއްގައި ޕްރެޒިޑެންޝިއަލް ގާޑްސްއަށް ކޮމާންޑަރަކު އައްޔަނުކުރިކަން އެމްއެންޑީއެފުން ހާމަކޮށްފައި ނުވެ އެވެ.
މާޗު 20 ވަނަ ދުވަހުގެ ރޭ ހުޅުމާލޭގައި އޮތް އިވެންޓަކަށްފަހު ރައީސް އަދި އަނބިކަބަލުން ދަތުރުކުރައްވަމުން ގެންދެވި މޮޓޯކޭޑަށް ހުރަސްއެޅީ އިދިކޮޅު ޕީޕީއެމް އޮފީސް ކުރިމަތީ މުޒާހަރާކުރަމުންދިޔަ އިދިކޮޅު އެކްޓިވިސްޓުންނެވެ. އަދި, މޮޓޯކޭޑު ތާާށިވެ 15 ވަރަކަށް މިނެޓު އެ ސަރަހައްދުގައި އޮތެވެ. އެކަމާ ގުޅިގެން ގިނަ ބަޔަކު ވަނީ އެއީ ސިފައިންގެ ސެކިއުރިޓީ ފެއިލިއާއެއް ކަމަށް ބުނެ ވަރަށް ބޮޑަށް ފާޑުކިޔާފަ އެވެ.
އެ މައްސަލާގައި ޕީޕީއެމްގެ އިސް އެކްޓިވިސްޓެއް ކަމަށްވާ މުހައްމަދު އައްބާސްގެ އިތުރުން ތިން މީހަކު ހައްޔަރުކޮށް ބަންދުގެ މުއްދަތުވެސް ވަނީ ޖަހާފަ އެވެ. އަދި, ސިފައިންގެ ތެރޭގައި ހާއްސަ ކޮމިޓީއެއް އުފައްދާ، އަބްދުﷲ ގެ އިތުރުން އެހެން އޮފިސަރުންވެސް މަގާމުން އެކަހެރިކުރި އެވެ.
މޮޓޯކޭޑަށް ހުރަސްއެޅުމާ ގުޅިގެން މަޖިލީހުގެ 241 ކޮމިޓީއިންވެސް ވަނީ ޑިފެންސް މިނިސްޓަރު މާރީޔާ ދީދީ ހާޒިރުކޮށް ސިއްރު ބައްދަލުވުންތަކެއް ކުރިއަށް ގެންގޮސްފައިވެ އެވެ.
