ހަމްބޯޓެކް ކޮރެއާއިން ހުޅުމާލޭގައި އިމާރާތްކުރަމުން އަންނަ ކޭޕާކް ރެސިޑެންސް އިން އެޕާޓުމަންޓު ގަނެފައިވާ މީހުންގެ ޝަކުވާއެއް އޮތްނަމަ، ލަސްނުކޮށް އެކަން ފުލުހުންނަށް ހުށަހެޅުމަށް އެ މުއައްސަސާއިން އެދިއްޖެ އެވެ.
ފުލުހުން މިރޭ ނެރުނު ނޫސް ބަޔާނެއްގައި ބުނީ ކޭޕާކު ރެސިޑެންސް އިމާރާތް ކުރަމުން އަންނަ ކުންފުނީގެ މައިނޯރިޓީ ޕާޓުނަރު، ހަސަން މަމްދޫހު (މަންޑޭ) ހަންބޯގެ ނަމުގައި އަސްލު ނޫން ލިޔެކިިޔުންތަކެއް ތައްޔާރުކޮށް އާންމުންނަށް އެތަންތަން ވިއްކަމުންދާކަމަށް ތުހުމަތު ކުރެވޭ މައްސަލަ ތަހުގީގު ކުރަމުންދާ ކަމަށެވެ.
"ހަންބޯ ކޮންޕެނީ ޕްރައިވެޓް ލިމިޓެޑާއި އާބަންކޯ (ހައުސިން ޑިވެލޮޕްމަންޓު ކޯޕަރޭޝަން) ހަދާފައިވާ އެއްބަސްވުމުގެ ދަށުން ހުޅުމާލޭގައި އިމާރާތްކުރަމުން އަންނަ ކޭޕާކު ރެޒިޑެންސްގެ އެޕާޓުމަންޓުތައް ހަންބޯ ކުންފުނީގެ ނަމުގައި ހަދާފައިވާ ފޯޖު ލިޔެކިޔުންތަކެއް ބޭނުންކޮށްގެން މަކަރާއި ހީލަތުން ކޭޕާކު ރެޒިޑެންސްގެ އެޕާޓުމަންޓުތައް އެކި ފަރާތްތަކަށް ވިއްކައި، ލިބުނު ފައިސާއަށް ހިޔާނާތްތެރިވެފައިވާ ކަމަށް ތުހުމަތުކުރެވިގެން ހުށަހަޅާފައިވާ މައްސަލަ މި ހިދުމަތުން ދަނީ ތަހުގީގު ކުރަމުންނެވެ،" އެ ބަޔާނުގައިވެ އެވެ.
އެ މައްސަލަ ފުލުހުންނަށް ހުށަހެޅީ ހަންބޯޓެކް ޕްރައިވެޓް ލިމިޓެޑަށް ކޭޕާކު ރެޒިޑެންސް އިމާރާތްކުރުމަށް ލޭންޑުލޯޑެއްގެ ހައިސިއްޔަތުން ހަވާލުކުރި، އާބަންކޯއިންނެވެ. އެކަން އެ ކުންފުނީގެ ސަމާލުކަމަށް ގެނައީ ހަންބޯ ކޮރެއާއިންނެވެ.
އެ މައްސަލަ އާބަންކޯގެ ސަމާލުކަމަށް ގެނައުމާއެކު އެ ކޯޕަރޭޝަނުން ވަނީ އެކަމުގައި ފުރިހަމަ ތަހުގީގެއް ކޮށްދިނުމަށް ފުލުހުންގެ ކިބައިން އެދިފަ އެވެ.
އެ މައްސަލައާ ގުޅިގެން މިރޭ ފުލުހުން ނެރުނު ބަޔާނުގައި ބުނެފައި ވަނީ އެ މައްސަލައިގައި އެއްވެސް ޝަކުވާއެއް އޮތްނަމަ އިކޮނޮމިކް ކުރައިމް ޑިޕާޓުމެންޓުގެ ނަންބަރު، 9790048 އަށް ގުޅައި އެކަން ހިއްސާ ކުރުމަށް އެދޭ ކަމަށެވެ.
މަކަރާއި ހީލަތުން ކޭޕާކު ރެޒިޑެންސުގެ އެޕާޓުމަންޓުތައް މީހުންނަށް ވިއްކައި، ލިބުނު ފައިސާއަށް އެ ކުންފުނީގެ ދިވެހި ހިއްސާދާރު، މަންޑޭ ހިޔާނާތްތެރިވެފައިވާ ކަމަށް ބުނެ ހަންބޯ ކޮރެއާއިން ނެރުނު ބަޔާނުގައި ވަނީ އެ އެޕާޓުމަންޓުތައް ވިއްކުމުގެ ބާރު އެއްވެސް ފަރާތަކަށް ދީފައި ނުވާނެ ކަމަށް ބުނެފަ އެވެ.
އެހެންނަމަވެސް އެ ކުންފުނީގެ މެނޭޖިން ޑިރެކްޓަރު، ޖިން ޝިހޫގެ ސޮއި ފޯޖުކޮށްގެންނާއި މެނޭޖިން ޑިރެކްޓަރުގެ ހައިސިއްޔަތުން މަންޑޭ ވެސް ބައެއް އެއްބަސްވުންތަކުގައި ސޮއިކޮށް އެޕާޓުމަންޓު ވިއްކާފައިވާ ކަމަށް އެ ކުންފުނިން ތުހުމަތުކޮށްފައިވެ އެވެ.
އެތަނުން އެޕާޓުމަންޓު ގަތް ފަރާތްތަކުގެ އެއްވެސް ޝަކުވާއެއް އޮތްނަމަ ލަސްނުކޮށް އެކަން ފުލުހުންނަށް އެންގުމަށް އެ މުއައްސަސާއިން އެދިފައިވާއިރު، ހަންބޯ ކޮރެއާއިން ވަނީ ކޭޕާކު ރެޒިޑެންސުން އެޕާޓުމަންޓު ގަތް ގިނަ ކަސްޓަމަރުންނާ ހަވާލާދީ ވެސް ވާހަކަތަކެއް އެކުންފުނީގެ ބަޔާނުގައި ހިމަނައިފަ އެވެ.
އެ މައްސަލަ ތަހުގީގު ކޮށްދިނުމަށް އެދި އާބަންކޯގެ ސަމާލުކަމަށް އެކަން ގެނައި ކަމުގައިވީ ނަމަވެސް މި އަހަރުގެ ފަހު ކުއާާޓަރުގައި ކޭޕާކު ރެޒިޑެންސްގެ މަސައްކަތް އެއްކޮށް ނިންމައި އެޕާޓުމެންޓުތައް ހަވާލުކުރެވޭނެ ކަމަށް ހަމްބޯއިން ބުނެފައިވެ އެވެ.
