ރާއްޖެއިން މިއަހަރު ހައްޖަށް މީހުން ގެންދަން ގްރޫޕްތަކަށް ހުއްދަ ދިން އިރު ކަނޑައަޅާފައިވާ އަގަށް ވުރެ ދެގުނަ ބޮޑު އަގެއް ނަގަން ގްރޫޕަކުން މަސައްކަތް ކުރި ކަމުގެ ޝަކުވާ އިސްލާމިކް މިނިސްޓްރީއަށް މީހަކު ހުށަހަޅައިފި އެވެ.
އިސްލާމިކް މިނިސްޓްރީން ބުނީ ހައްޖަށް މީހުން ގެންދަން ހުއްދީފައިވާ ބައެއް ކުންފުނިތަކުން، ހައްޖަށް މީހުން ގެންދިއުމާ ބެހޭ އުސޫލާ ހިލާފަށް އިތުރަށް ފައިސާ ނަގާ ކަމުގެ ޝަކުވާ ލިބިފައިވާ ކަމަށެވެ. އެ ޝަކުވާއާ ގުޅިގެން ބަލަން ޖެހޭ ކަންތައްތައް ބަލަމުން އަންނަ ކަމަށާއި މައްސަލަ ބެލުމަށް ފަހު، އުސޫލާ ހިލާފަށް އަމަލުކުރާ ފަރާތްތަކާ މެދު ފިޔަވަޅު އަޅާނެ ކަމަށް ވެސް އެ މިނިސްޓްރީން ބުންޏެވެ.
އެނގިފައިވާ ގޮތުގައި ހައްޖަށް މީހުން ގެންދިއުމުގެ ހުއްދަ ދިން ބައެއް ކުންފުނިތަކުން ބޮޑު އަގު ނަގަން އުޅެނީ ހައްޖަށް ދާން ބޭނުންވާ މީހުންގެ އަދަދު، އެ ކުންފުނިތަކަށް ލިބުނު ކޯޓާއަށް ވުރެ އެތައް ގުނައެއް އިތުރުކަން އެނގޭތީ، ބޮޑު އަގު ދައްކާ މީހުންނަށް ޖާގަ ދޭ އުސޫލުންނެވެ. އެގޮތުން 150،000ރ. ދައްކާ މީހުންނަށް ނޫނީ ޖާގަ ނުދޭން ބައެއް ގްރޫޕްތަކުން އަންނަނީ މަސައްކަތް ކުރަމުންނެވެ.
ހައްޖަށް މީހުން ގެންދަން މިފަހަރު ހުއްދަ ދިނީ ހައްޖު ކޯޕަރޭޝަންގެ އިތުރުން އަމިއްލަ ތިން ކުންފުންޏަކަށެވެ. އެ ތިން ކުންފުނީގެ ތެރެއިން އެންމެ ބޮޑު އަގެއް ނަގަން ހުއްދަ ދިން ކުންފުންޏަށް ވެސް ސަރުކާރުން ކަނޑައަޅާފައިވާ އަގަކީ 75،465.ރ އެވެ.
