ހުޅުމާލޭގައި ކޭޕާކު މަޝްރޫއު ހިންގާ ހަމްބޯޓެކް ކޮރެއާއިން އެ މަޝްރޫއު ހިންގާ ހަމްބޯ މޯލްޑިވްސް ކުންފުނީގެ ދިވެހި ހިއްސާދާރު ހަސަން މަމްދޫހަށް ބޮޑެތި ތުހުމަތުތަކެއްކޮށް އޭނާގެ މައްސަލަ ފުލުހަށް ހުށަހަޅައިފި އެވެ.
ހަމްބޯޓެކް ކޮރެއާގެ ފަރާތުން ރާއްޖޭގައި މަޝްރޫއު ހިންގުމަށް އުފެއްދި ކުންފުނި، ހަމްބޯ މޯލްޑިވްސްގެ 95 ޕަސެންޓު ހިއްސާ އޮންނަނީ އެ ކުންފުނީގެ އެމްޑީ، ޗައިނާގެ ރައްޔިތެއް ކަމަށްވާ ޖިން ޝިހޫ އަތުގަ އެވެ. ބާކީ ފަސް ޕަސެންޓު ހިއްސާ އޮންނަނީ ދިވެހި ހިއްސާދާރު ހަސަން މަމްދޫހުގެ އަތުގަ އެވެ.
ހަމްބޯގެ މައި ކުންފުނިން އިއްޔެ ނެރުނު ބަޔާނެއްގައި ވަނީ މަމްދޫހާއި އޭނާގެ ވިޔަފާރި ޕާޓުނަރު ޖައިޝަން ސައީދު، ގިނަ އަދަދެއްގެ ބަޔަކަށް މަކަރާއި ހީލާތުން އޮޅުވާލައިގެން އެޕާޓްމެންޓުތައްް ވިއްކައި ފައިސާ އަތުލާފައިވާ ކަމުގެ ތުހުމަތުކޮށްފަ އެވެެ.
އެކަމާ ހެދި މަމްދޫހުއާ އޮތް ވިޔަފާރީގެ ގުޅުން ކަނޑާލައި، އޭނާގެ އިތުރުން މަކަރާއި ހީލަތުގައި ބައިވެރިވި ކަމަށް ތުހުމަތު ކުރާ އެހެން މީހުންގެ މައްސަލަ ހަމްބޯއިން ވަނީ ފުލުހަށް ހުށަހަޅައިފަ އެވެ.
ހަމްބޯއިން ބުނާ ގޮތުގައި އެ ކުންފުނީގެ ފަރާތުން ފާސްކޮށް އެޕާޓްމެންޓުތައް ވިއްކުމުގެ ބާރު އެއްވެސް މީހަކަށް ދީފައި ނުވަނީސް މަމްދޫހު ވަނީ ނުއަގުގައި އޮޅުވާލައިގެން ގިނަ ބަޔަކަށް އެޕާޓްމެންޓުތައް ވިއްކައިފަ އެވެ.
ގަނެވިއްކުމުގެ އެއްބަސްވުމުގައި މަމްދޫހު ސޮއިކޮށްފައި ވަނީ، މައި ހިއްސާދާރު ޖިން ޝިހޫގެ ސޮއި ފޯޖުކޮށްގެން މަމްދޫހުގެ ވިޔަފާރި ޕާޓްނަރު ޖައިޝަން ސައީދަށް ދިން ކަމަށް ބުނާ ގަރާރެއް ބޭނުންކޮށްގެން ކަމަށް ވެސް ވެ އެވެ. އެ ކުންފުނިން ބުނި ގޮތުގައި ބައެއް އެއްބަސްވުންތަކުގައި ޖައިޝަން ސޮއިކޮށްފައި ހުރި އިރު، މެނޭޖިން ޑިރެކްޓަރުގެ ހައިސިއްޔަތުން ކަމަށް ބުނެ އޮޅުވާލައިގެން މަމްދޫހު ވެސް އެއްބަސްވުންތަކުގައި ސޮއިކޮށްފައި ހުއްޓެވެ.
ގިނަ އަދަދެއްގެ ކަސްޓަމަރުންނާ ހަވާލާދީ ހަމްބޯއިން ބުނި ގޮތުގައި ކަސްޓަމަރުންގެ ގާތު އެޕާޓްމެންޓަށް ފައިސާ ދެއްކުމަށް މަމްދޫހު އެދިފައި ވަނީ ނަގުދު ފައިސާއިންނެވެ. އަދި ފައިސާ ހޯދުމަށް ސީދާ މުއާމަލާތްކޮށްފައި ވަނީ ޖައިޝަން އާއި މަމްދޫހު ކަމަށް ވެސް ބުންޏެވެ.
މަމްދޫހާއި ޖައިޝަންއަށް މަކަރާއި ހީލާތުގެ ތުހުމަތުކޮށް ކުންފުންޏާ ބެހޭ އެއްވެސް ކަމެއްގައި އެ ދެ މީހުންނާ މުއާމަލާތު ނުކުރުމަށް އެޗްޑީސީއާއެކު ބޭއްވި ބައްދަލުވުމެއްގައި ހަމްބޯއިން މިހާރު ވަނީ އެދިފަ އެވެ. އަދި ހަމްބޯ މޯލްޑިވްސްއާއެކު ހެދި އެއްބަސްވުން އުވާލައި, މައި ކުންފުނީގެ ފަރާތުން ރާއްޖޭގެ މަންދޫބެއްގެ ގޮތުގައި މީހަކު ވަނީ ހަމަޖައްސައިފަ އެވެ.
އެ ކުންފުނީގެ ބޭންކް އެކައުންޓު ހުޅުވާފައި ވަނީ ސްޓޭޓް ބޭންކް އޮފް އިންޑިއާގައި ނަމަވެސް، ބައެއް ކަސްޓަމަރުންގެ އަތުން މަމްދޫހު ފައިސާ ހޯދާފައި ވަނީ ޖިން ޝިހޫގެ ސޮއި ފޯޖުކޮށްގެން ބީއެމްއެލްގައި ހުޅުވާފައިވާ ރުފިޔާ އެކައުންޓެއްގެ އިތުރުން ޑޮލަރު އެކައުންޓެއް މެދުވެރިކޮށް ކަމަށް ވެސް ހަމްބޯއިން ބުނެފައިވެ އެވެ.
ބީއެމްއެލްއިން ހޯދި މައުލޫމާތާ ހަވާލާދީ އެ ކުންފުނިން އިތުރަށް ބުނި ގޮތުގައި އެ އެކައުންޓް ހުޅުވީ ޖިން ޝިހޫ ޗައިނާގައި ހުރި ދުވަސްވަރެއްގަ އެވެ. އެކައުންޓު ހުޅުވުމުގެ ބޭނުމަށް އޭނާގެ ޕާސްޕޯޓު ކޮޕީއެއް ހުށަހެޅީ ވަކީލަކު އެ ކޮޕީގައި އަސްލާއެއްގޮތް ކަމުގެ ތައްގަނޑު ޖަހައިގެން ކަމަށްވާއިރު، އެ ވަކީލާ އެއްގޮތަކަށް ވެސް ބައްދަލުނުވާ ކަމަށް ވެސް ބުނެފައިވެ އެވެ.
ހަމްބޯއިން އިތުރަށް ތުހުމަތު ކުރާ ގޮތުގައި:
ޖިން ޝިހޫގެ ނަމުގައި ބީއެމްއެލްގައި ހެދި އެކައުންޓުތަކަށް ގިނަ އަދަދެއްގެ ބަޔަކު ޖަމާ ކުރި ފައިސާ މަމްދޫހު ވަނީ ނަގާފައި
- އެޕާޓްމެންޓުގެ އަގުގެ ބަދަލުގައި މީހުން އަތުން ކާރާއި އެ ނޫން ވެސް ތަކެތި ހޯދާފައިވޭ
- އެއް އެޕާޓްމެންޓު އެތައް ބަޔަކަށް ވިއްކައި ފައިސާ ނަގާފައިވޭ
- ކަސްޓަމަރުންނާ ހަދާފައިވާ އެއްބަސްވުންތަކާއި ފައިސާ ހަވާލުކުރިކަމުގެ ލިޔުންތައް ނުދީ ހިފަހައްޓަމުން ދޭ
- ބައެއް މީހުން އަތުން ފައިސާ ނެގުމުގައި ކޮރެއާގެ ރައްޔިތެއް ކަމަށް ވާ ޖޮންވޫ ކިމް ދައްކައި އެއީ ހިއްސާދާރެއް ކަމަށް ދައްކާފައިވާއިރު، އޭނާ ވެސް ކުންފުނީގެ ނަމުގައި މުއާމަލާތުކޮށްފައިވޭ
މަމްދޫހުގެ މައްސަލަ ފުލުހަށް ހުށަހަޅާފައިވާއިރު އެ މައްސަލަ މިހާރު ދަނީ ތަހުގީގު ކުރަމުންނެވެ. ހަމްބޯއިން ވަނީ އެގޮތަށް އޮޅުވާލައިގެން ފައިސާ ނަގާފައިވާ ފަރާތްތަކުން އެކަމުގެ މައުލޫމާތު ތަހުގީގީ އިދާރާތަކަށް ހިއްސާކުރުމަށް އެދިފަ އެވެ.
ހަމްބޯ މޯލްޑިވްސްއާއެކު ހެދި އެއްބަސްވުން އުވާލައި މަމްދޫހުގެ މައްސަލަ ފުލުހަށް ހުށަހެޅި ނަމަވެސް، މި އަހަރުގެ ފަހު ކުއާާޓާގައި ކޭޕާކު ރެޒިޑެންސްގެ މަސައްކަތް ނިންމައި އެޕާޓްމެންޓުތައް ހަވާލުކުރެވޭނެ ކަމަށް ހަމްބޯއިން ބުންޏެވެ.
