ބޭރު ފައިސާ ގަނެވިއްކުމުގެ ހުއްދަ ދޫކުރުން މެދުކަނޑާލިތާ ދެ އަހަރަށްވުރެ ގިނަ ދުވަސް ފާއިތުވިއިރުވެސް, ހުއްދަ ދޫކުރުން އަދިވެސް އޮތީ މަޑުޖައްސާލާފައި ކަމަށް މޯލްޑިވްސް މަނެޓަރީ އޮތޯރިޓީން އިއްޔެ ބުންޏެވެ.
އާބާދީއާ އަޅާބަލާއިރު ގިނަ ވިޔަފާރިތަކަށް ބޭރު ފައިސާ ގަނެވިއްކުމުގެ ހުއްދަ ދޫކޮށްފައިވާ ކަމަށް ބުނެ އެ ހުއްދަ އިތުރަށް ދޫކުރުން އެމްއެމްއޭއިން މެދުކަނޑާލީ އޮކްޓޯބަރު 15، 2020 ގަ އެވެ.
އޭގެ ފަހުން މި ނޫހުން ސުވާލު ކުރުމުން ޖެނުއަރީ، 2022، ގައި އެމްއެމްއޭއިން ބުނީ ބޭރު ފައިސާ ގަނެވިއްކުމުގެ ހުއްދަ އަލުން ދޫކުރަން ފަށާނެ ކަމަށާއި ހުއްދަ ދޫކުރާނީ އެކަމަށް ތައްޔާރުކޮށްފައިވާ އުސޫލު އިސްލާހު ކުރުމަށްފަހު ކަމަށެވެ.
އެކަމާ ގުޅޭ ގޮތުން އިއްޔެ އަނެއްކާ ސުވާލު ކުރުމުން އެމްއެމްއޭއިން މިހާތަނަށް ޖަވާބެއް ނުދެ އެވެ.
ވިޔަފާރިތަކަށް އެމްއެމްއޭއިން ދޫކުރާ ބޭރު ފައިސާ ގަނެވިއްކުމުގެ ހުއްދަ ދޫކުރަނީ 1987 ވަނަ އަހަރު އެކުލަވާލާފައިވާ ގަވާއިދެއްގެ ދަށުންނެވެ. ޖުމްލަ އަށް މާއްދާގެ މައްޗަށް އެކުލަވާލާފައިވާ އެ ގަވާއިދުގައި، ބޭރު ފައިސާ ގަނެވިއްކުމުގެ ހުއްދަ ދޫކުރުން މެދުކަނޑާލެވޭނެ އުސޫލެއް ބަޔާންކޮށްފައެއްނުވެ އެވެ.
ބޭރު ފައިސާ ގަނެވިއްކުމުގެ ހުއްދަ އެކަށީގެންވާ އަދަދެއްގެ ވިޔަފާރިތަކަށް ދީފައިވާ ކަމަށް ބުނާއިރު އެމްއެމްއޭގެ ވެބްސައިޓުން ފެންނަ ގޮތުގައި އެ ހުއްދަ ދޫކޮށްފައި ވަނީ 248 ވިޔަފާރިއަށެވެ. އޭގެ ތެރޭގައި ރިސޯޓުތައް ވަރަށް ގިނަ އެވެ.
ބޭރު ފައިސާ ގަނެވިއްކުމުގެ ހުއްދަ ދޫކުރުން މެދުކަނޑާލާފައިވާއިރު އެކި މައްސަލަޖެހިގެން އެ ހުއްދަ ބާތިލް ކުރަންޖެހޭ ފަރާތްތަކުގެ ހުއްދަ މަރުކަޒީ ބޭންކުން ދަނީ ބާތިލް ކުރަމުންނެވެ. އެގޮތުން ނޮވެމްބަރު، 2022 ގައި ވެސް 15 ވިޔަފާރިއަކަށް ދޫކޮށްފައި އޮތް ބޭރު ފައިސާ ގަނެވިއްކުމުގެ ހުއްދަ އެމްއެމްއޭއިން ބާތިލުކުރި އެވެ.
މުހިންމު ބައެއް ހަބަރު
ދުވަހުގެ ފޮޓޯ
ރޭ ކުޅުނު މެޗުގައި ކްލަބް އީގަލްސް އަތުން 2-0 އިން މޮޅުވެ، މާޒިޔާ ސްޕޯޓްސް އެންޑް ރެކްރިއޭޝަނުން ދެ ވަނަ ފަހަރަށް ޕްރެޒިޑެންޓްސް ކަޕްގެ ޗެމްޕިއަންކަން ހޯދުމަށް ފަހު ތައްޓާއެކު އުފާފާޅުކުރަނީ. -- ފޮޓޯ: މުހައްމަދު ޝާބިން/އަދަދު
