މުދަލު ޒަކާތުގެ ނިސާބަކީ ދިވެހި ފައިސާއިން ދައްކާ ނަމަ 7312.55ރ. ކަމަށް އިސްލާމިކް މިނިސްޓްރީން މިއަދު ކަނޑައަޅައިފި އެވެ.
އެ މިނިސްޓްރީން މިއަދު ނެރުނު އިއުލާނެއްގައި ބުނެފައި ވަނީ މުދަލު ޒަކާތުގެ ނިސާބު ކަނޑައެޅީ އެ މިނިސްޓްރީން އެކަމަށް ގެންގުޅޭ އުސޫލެއްގެ ދަށުން ކަމަށެވެ.
މުދަލު ޒަކާތް ދެއްކުން ވާޖިބުވާ ފަރާތްތަކުން އޭޕްރީލް 30، 2023 އިން ފެށިގެން މުދަލުގެ ޒަކާތް ދައްކަންޖެހޭނީ މިނިސްޓްރީން އަލަށް ކަނޑައެޅި އާ ނިސާބުގެ ދަށުން ކަމަށެވެ.
މުދަލު ޒަކާތުގެ ނިސާބު ކަނޑައަޅަނީ މާކެޓުގައި ރަނާއި ރިހި ގަނެވިއްކާ އަގުތަކަށް ބަލައިގެނެވެ. އެ އަގުތައް ހިސާބު ކުރަނީ މޯލްޑިވްސް މަނެޓަރީ އޮތޯރިޓީންނެވެ. މިއަދުގެ ކުރިން އެންމެފަހުން މުދަލު ޒަކާތުގެ ނިސާބު ބަދަލު ކުރީ ޖެނުއަރީ، 2023 ގަ އެވެ. އެފަހަރު ޒަކާތުގެ ނިސާބުގެ ގޮތުގައި ކަނޑައެޅީ 7062.65ރ. އެވެ.
ފިތުރު ޒަކާތުގެ ނިސާބަށް މިއަދު ބަދަލުތަކެއް ގެނައިރު ރޯދަ މަހު ނެގި ފިތުރު ޒަކާތް މިހާރު ވަނީ ބަހަން ފަށައިފަ އެވެ. ފިތުރު ޒަކާތުގެ ގޮތުގައި މި އަހަރު ހަ މިލިއަނަށްވުރެ ގިނަ ރުފިޔާ ލިބުނު ކަމަށް އިސްލާމިކް މިނިސްޓްރީން ބުނެ އެވެ.
