ލޯކަލް ކައުންސިލްތަކުން ހިންގާ ކުންފުނިތަކާއި ކައުންސިލްތަކުގެ ހިއްސާވާ އަމިއްލަ ކުންފުނިތަކަށް ރައުސްމާލުގެ ގޮތުގައި މުދަލާއި ފައިސާ ދޫކުރަން ފިނޭންސުން ހަރުކަށި އުސޫލެއް ކަނޑައަޅައިފި އެވެ.
ފިނޭންސް މިނިސްޓްރީން މިއަދު ގެެޒެޓު ކޮށްފައިވާ އުސޫލުގައިވާ ގޮތުން ކައުންސިލްތަކުން ހިންގާ ކުންފުނިތަކަށާއި ކައުންސިލްތަކުގެ ހިއްސާ އޮންނަ އަމިއްލަ ކުންފުނިތަކަށް ވެސް ކައުންސިލްތަކުގެ ފައިސާ ދޫކުރެވޭނީ ހަމަ އެކަނި ރައުސްމާލުގެ ގޮތުގަ އެވެ. މީގެ މާނައަކީ އެފަދަ އެއްވެސް ކުންފުންޏަކުން ދުވަހުން ދުވަހަށް ކުރަން ޖެހޭ އެއްވެސް ހަރަދަކަށް ކައުންސިލްތަކުން ފައިސާ ދޫކުރުން މަނާވުމެވެ.
"ލޯކަލް އޮތޯރިޓީ ކުންފުނިތަކާއި ކައުންސިލްތަކުން ހިއްސާވާ އަމިއްލަ ވިޔަފާރިތަކަށް ކެޕިޓަލްގެ ގޮތުގައި ކައުންސިލްތަކުން ހަރަދުކުރުމުގައި އަމަލުކުރާނެ ގޮތުގެ އުސޫލު" ގެ ނަމުގައި ގެޒެޓު ކުރި އެ އުސޫލުގައިވާ ގޮތުން އެފަދަ ހަރަދެއް ކުރެވޭނީ ކުންފުންޏާ ބެހޭ ގޮތުން ގިނަ ކަންތައްތަކެއް ބެލުމަށް ފަހުގަ އެވެ.
ރައުސްމާލު ދިނުމުގެ ކުރިން ބަލަން ޖެހޭ ކަންތައްތައް;
- ކުންފުނީގެ ބިޒްނަސް ޕްލޭން
- ހިންގަމުންދާ ކުންފުންޏެއް ނަމަ އެ ކުންފުނީގެ މާލީ ހިސާބުތައް
- ކުންފުނިން ކެޕިޓަލްގެ ގޮތުގައި ލިބޭ ފައިސާ ބޭނުންކުރާނެ ގޮތާއި އަންދާޒާކުރާ ފައިދާ އާއި ފައިދާއިން ބަހާނެ ކަމަށް ލަފާކުރާ ޑިވިޑެންޑާއި އިންވެސްޓުމެންޓުގައި ހުރި ހިރާސްތައް ހިމެނޭ ރިޕޯޓު
އެ އުސޫލުގައިވާ ގޮތުން ކައުންސިލަކުން ކުންފުންޏަކަށް ރައުސްމާލު ދޫކުރުމުގެ ކުރިން ކައުންސިލްތަކުން އިންވެސްޓު ކުރުމާ ބެހޭ އުސޫލެއް ނުވަތަ އިންވެސްޓުމެންޓް ޕޮލިސީއެއް ވެސް އެކުލަވައިލަން ޖެހެ އެވެ. އެ އުސޫލު ގައި ހިމަނަން ޖެހޭނެ ކަންތައްތައް ވެސް ފިނޭންސުން އޮތީ ކަނޑައަޅައިފަ އެވެ.
ފިނޭންސްގެ އުސޫލުގައިވާ ގޮތުން ކައުންސިލްތަކުގެ އިންވެސްޓްމެންޓް ޕޮލިސީގައި އެ ކައުންސިލަކުން އިންވެސްޓު ކުރާނެ ކަންތައްތައް ކަނޑައަޅާފައި އޮންނަން ޖެހެ އެވެ. ރައުސްމާލުގެ ގޮތުގައި އެ ކައުންސިލަކުން ފައިސާ އާއި މުދާ ދޫކުރާނެ މިންވަރު ވެސް އެ ޕޮލިސީގައި ބަޔާންކުރަން ޖެހެ އެވެ.
ކައުންސިލްތަކުގެ ކުންފުނިތަކާއި ކައުންސިލްތަކުން ހިއްސާވާ އަމިއްލަ ވިޔަފާރިތަކަށް ރައުސްމާލު ދޫކުރުމުގައި ކުރަން ޖެހޭ އެހެން ގިނަ ކަންަތައްތަކެއް ވެސް ފިނޭންސްގެ އުސޫލުގައި ތަފްސީލުކޮށް ހިމަނާފައި ވެ އެވެ.
