މި ސަރުކާރު އައި ފަހުން ޓިކެޓް އަގުހެޔޮކުރީ ސަރުކާރުން ސަބްސިޑީއެއް ދޭން އެއްބަސްވެގެން ކަމަށާއި އެހެން ނަމަވެސް އަލުން ޓިކެޓް އަގު ބޮޑުކުރީ ސަަބްސިޑީ ނުދޭތީ ކަަމަށް އައިލެންޑް އޭވިއޭޝަން ސާވިސަސް (އައިއޭއެސް) އިން މިއަދު ބުނެފި އެވެ.
ޓިކެޓް އަގުހެޔޮކުރި އަހަރު، ސަބްސިޑީގެ ގޮތުގައި ސަރުކާރުން އެކުންފުންޏަށް 35 މިލިޔަން ރުފިޔާ ދިން ކަމަށާއި އޭގެ ފަހުން ސަބްސިޑީ ނުދޭ ކަމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީ (އެސްއޯއީ) ކޮމިޓީގެ މިއަދުގެ ބައްދަލުވުމުގައި އައިއޭސްގެ މެނޭޖިން ޑިރެކްޓަރު މުހައްމަދު މިހާދު ވިދާޅުވި އެވެ.
އެތެރޭގެ ދަތުރުތައް އަގު ހެޔޮކުރުމަކީ ރައީސް އިބްރާހީމް މުހައްމަދު ސޯލިހުގެ ރިޔާސީ ވައުދެކެވެ. އައިއޭއެސް އިން އޮޕަރޭޓްކުރާ ގައުމީ އެއާލައިން "މޯލްޑިވިއަން"ގެ އެތެރޭގެ ދަތުރުތައް އަގުހެޔޮކުރީ އެ ވައުދާ އެއްގޮތަށް 2019 ވަނަ އަހަރު އެވެ.
"އެނގިވަަޑައިގަންނަވާނެ 2019 ވަނަ އަހަރު ސަރުކާރުގެ ސިޔާސަތާ ގުޅިގެން އެވްރެޖްކޮށް 300 ރުފިޔާގެ ޓިކެޓް އަގުހެޔޮކުރުމެއް ހުރިހާ ދާއިރާއަކަށް ގެނެވުނު. އެއާ އެކު ސަބްސިޑީއެއް ދިނުމަށް ވަނީ ހަމަޖެހިފައި، އެހެން ނަަމަވެސް އެންމެ ފުރަތަމަ އަހަރު އަޅުގަނޑުމެންގެ ކުންފުންޏަށް 35 މިލިޔަން ރުފިޔާގެ ސަބްސިޑީއެއް ދިނީ. އޭގެ ފަހުން ސަބްސިޑީއެއް މިއަދާ ހަމައަށް ވެސް ނުލިބޭ،" މިހާދު ވިދާޅުވި އެވެ.
އޭނާ ވިދާޅުވީ އައިއޭއެސް ހިންގަމުން އަންނަނީ އެކުންފުންޏަށް ލިބޭ އާމްދަނީން ކަމަށް ވާއިރު މަތިންދާބޯޓަށް އަޅާ ތެލުގެ އަގު ކޮވިޑް-19 ގެ ބަލިމަޑުކަމަށް ފަހު ބޮޑުވެފައިވާ ކަމަށެވެ. ކޮވިޑްގެ ކުރިން ޖެޓްފިއުލް ލީޓަރެއްގެ އަގު ހުރީ 12 ރުފިޔާގައި ކަމަށް ވިޔަސް އޭގެ ފަހުން މިދިޔަ ސެޕްޓެމްބަރުމަހާ ހަމައަށް ލީޓަރެއް ހުރީ 22 ރުފިޔާއަށް ކަމަށެވެ. އޭގެ ފަހުން ލީޓަރަކުން އަގުހެޔޮވީ އޭނާ ވިދާޅުވި ގޮތޮގައި ހަތަރު ރުފިޔާ އެވެ.
"ރޫޓަކަށް އަޅާ ފްލައިޓެއްގެ [ފްލައިޓަކަށް ހިނގާ ހަރަދުގެ] 42 ޕަސެންޓަކީ ފިއުލް. އެކަމާ ގުޅިގެން އަޅުގަނޑުމެން ވާނީ ފިއުލް ސާޗާޖް ދެފަހަރެއްގެ މައްޗަށް އިތުރުކޮށްފައި،" މިހާދު ވިދާޅުވި އެވެ.
އޭނާ ވިދާޅުވި ގޮތުގައި އައިއޭސްގެ ހަރަދު ބޮޑުވި އަނެއް ސަބަބަކީ މިދިޔަ ހަތަރު އަހަރުގެ ތެރޭގައި އަލަށް ހުޅުވި އެއާޕޯޓްތަކަށް ދަތުރުތައް ކުރަން ޖެހުނު އިރު އެ މަންޒިލްތަކަށް އެކަށީގެންވާ އަދަދަކަށް ޕަސެންޖަރުން ނުލިބުމެވެ.
"މިއެއާޕޯޓްތަކަށް ދަތުރުކުރަން އަޅުގަނޑުމެންނަށް އެބަ މަޖުބޫރުވޭ،" މިހާދު ވިދާޅުވި އެވެ.
އޭނާ ވިދާޅުވީ ގައުމީ އެއާލައިނަށް ވާތީ ދަތުރުކުރަން ޖެހޭ އެއާޕޯޓްތަކަށް، އެކަށީގެންވާ ވަރަށް ޕަސެންޖަރުން ނުލިބުނަސް ހަފުތާއަކު ތިން ދަތުރުކުރާ ކަމަށެވެ.
