ދުވަސް ދުވަސްކޮޅުން، ނިކުންނަ އައު ގެޖެޓްތަކުގެ ތަފާތުކަމާއި މޮޅުކަމުގެ ސަބަބުން، ކުރިން އެއްވެސް މީހަކު އެކަމާ ވިސްނާފަ ނުވަނީ ކީއްވެގެންތޯ ވިސްނާލެވޭ ފަހަރު އާދެ އެވެ. ވާވޭ ވޮޗް ބަޑްސް އަކީ މިކަމުގެ އެންމެ ފަހުގެ މިސާލެވެ. ޗައިނާގެ ޓެކް ކުންފުނި، ވާވޭއިން އާ ސްމާޓްވޮޗެއް ތައާރަފްކޮށްފައިވާއިރު، އެ ގަޑީގެ ޑިސްޕްލޭގެ ދަށުގައި ބަހައްޓާފައިވާ ވަޔަލެސް އިއާބަޑު ޖޯޑެއް ވެސް ހިމެނެ އެވެ.
ވާވޭ ވޮޗް 3 ޕްރޯގެ ނަން ދީފައިވާ މި ޑިވައިސް އިއުލާންކޮށްފައި ވަނީ މިދިޔަ އަހަރު ޑިސެމްބަރުގަ އެވެ. އަދި މި އަހަރު މި އުފެއްދުން ނެރެ، ހުރިހާ ގައުމުކަށް ވިއްކަމުން ދާއިރު ފާހަގަ ކޮށްލެވޭ އެތައް ކަންތައްތަކެއް މި އުފެއްދުމުގައި އެބަހުއްޓެވެ.
ރީތި އަދި އާ މި ޑިވައިސް އަކީ ކޮންމެ ދުވަހެއްގެ ބޭނުންތަކަށް "އޯލް އިން ވަން" ޑިވައިސްއެއް ހޯދަން ބޭނުންވާ ފަރާތްތަކުގެ ބޭނުންތައް ފުރިހަމަކޮށްދިނުމަށް ފަރުމާކޮށްފައިވާ އެއްޗެކެވެ.
މި ގަޑީގެ ބޭރު ފަރާތް ހަދާފައިވަނީ 1300 ޑިގްރީ ސެލްސިއަސްގެ ރިފައިންޑް ސްޓީލް ބޮޑީއެއްގައި ޖައްސާފައިވާ ތްރީޑީ ކާވްޑް ބިއްލޫރިން ނެވެ. އަދި 710 ކްލޯސް ޑި ޕެރިސްގެ ޒީނަތްތަކުން ޒީނަތްކޮށްފައިވެ އެވެ. ނަތީޖާއަކީ ރީތި ޑިޒައިންގެ އަގުވަޒަންކުރާ ކޮންމެ މީހަކަށް ވެސް ކަމުދާ ފަދަ ސްޓައިލިޝް ލުކެކެވެ.
ވާވޭ ވޮޗް ބަޑްސްގެ ފުލް ގްރޭން ލެދާ ސްޓްރެޕް އިން ހަންގަނޑު ފިނިކޮށްދޭ އަރާމު ލިބިގެންދާއިރު، ނަލަ ވޮޗް ފޭސްތަކުން ސްޓައިލްގެ އިހުސާސް އިތުރުކޮށްދެ އެވެ. އަދި ވޮޗްގަ ހިމެނޭ އިއާބަޑްސް އަކީ 4 ގްރާމް ލުއި، އެޑެޕްޓިވް އައިޑެންޓިފިކޭޝަން ޓެކްނޮލޮޖީގެ ސަބަބުން ކޮންމެ ކަންފަތަކާ ވެސް ގުޅޭ އެއްޗެކެވެ.
އިއާބަޑްސް އޮރިކަލްސް ނުވަތަ ކަންފަތުގެ ކުރިމަތީގައި ހުންނަ ސަރަހައްދުގައި ދެ ފަހަރު ޓެޕްކޮށްގެން ކޯލްތަކަށް ޖަވާބުދީ ރިޖެކްޓް ނުވަތަ ޓްރެކްތައް ޕްލޭކޮށް ޕޯސް ކުރެވޭނެ އެވެ. އަދި ނޮއިސް ކެންސަލް އެކްޓިވޭޓްކޮށް ޑިސްއޭބަލް ކުރުމަށް ތިން ފަހަރު ޓެޕް ވެސް ކުރެވިދާނެ އެވެ. މީގެ އިތުރުން ޔޫޒަރުންނަށް ކަސްޓަމް ޓެޕް ކޮންޓްރޯލްތައް އުފައްދައި، އެމީހެއްގެ ބޭނުންތަކަށް ކަމުދާ ގޮތަކަށް އިއާބަޑްސް ބޭނުން ކުރެވިދާނެ އެވެ.
ބެޓެރީ ލައިފްގެ ގޮތުން ބަލާއިރު ވާވޭ ވޮޗް ބަޑްސް އަކީ ދިގު މުއްދަތަކަށް ދެމިގެންދާ އެއްޗަކެވެ. އެއްފަހަރު ޗާޖު ކުރުމުން 3 ދުވަހުގެ ބެޓެރީ ލައިފް ލިބެ އެވެ. އަދި ޗާޖު ކުރަން ފަސޭހަކަމަކީ ކޮންމެ އޭންގަލަކުން ވެސް އިއާބަޑްސް ޗާޖު ކުރެވޭތީ އެވެ.
ޖުމްލަކޮށް ބަލާއިރު ވާވޭ ވޮޗް ބަޑްސްގައި ތަފާތު ފީޗާސްތަކާއި މަތީ ފެންވަރުގެ ޑިޒައިންތަކެއް ހުރުމުން ސްމާޓްވޮޗާއި ވައިލެސް އިއާބަޑްސް އެއް ޕެކޭޖެއްގައި ބޭނުންވާ ކޮންމެ މީހަކަށް ވެސް މިއީ އެއްވަނައިގެ އުފެއްދުމެކެވެ.
ވާވޭ ވޮޗް ބަޑްސް ރާއްޖެ އިން ވެސް މިހާރު ގަންނަން ލިބޭނެ އެވެ. އެގޮތުން އުރީދޫ މޯލްޑިވްސް އިން ވަނީ އެކުންފުނީގެ "މޫލީ" ބާޒާރުން މި ގެޖެޓް ލިބޭނެ ގޮތް ހަދައިފަ އެވެ. އަދި ވޮޗް ބަޑްސް ރާއްޖެއަށް ތައާރަފުކުރުމާއި ގުޅިގެން އެ ކުންފުނިން ވަނީ ޕްރޮމޯޝަނެއް ފަށައިފަ އެވެ.
މިމަހުގެ 22 އާއި ހަމައަށް ކުރިއަށް ގެންދާ މި ޕްރޮމޯޝަންގައި 6999ރ. އަށް ވޮޗް ބަޑު ލިބޭނެ އެވެ. މި ވޮޗް ބަޑު ގަންނަ ކަސްޓަމަރުންނަށް، ރާއްޖޭގެ ކޮންމެ ހިސާބަކަށް ވެސް ޑެލިވަރީ ކޮށްދޭނެ އެވެ.
