މިދިޔަ ހޮނިހިރު ދުވަހު ރޭ ކުއްލި ގޮތަކަށް ގެއިން ނެރެލި އަންހެނަކާއި އޭނާގެ ކުޑަ ފިރިހެން ދަރިފުޅަށް މަމްސް އެއިޑް ޖަމިއްޔާއިން 150،000 އަށް ވުރެ ގިނަ ރުފިޔާ ހޯދައިފި އެވެ.
އެ ޖަމިއްޔާއިން ބުނީ ގެއިން ނެރެލި ދެ މައިންނަށް ހަފުތާއެއްގެ ތެރޭގައި 165،730ރ. ހޯދިފައިވާ ކަމަށެވެ. އެ ދެމައިންގެ ހަރަދުތައް އެ ފައިސާއިން ބަލަހައްޓަމުން ގެންދާނެ ކަމަށް އެ ޖަމިއްޔާއިން ބުނެ އެވެ.
ގެއިން ނެރެލި ދެމައިން މިހާރު ތިބީ ޖެންޑާ މިނިސްޓްރީގެ ބެލުމުގެ ދަށުގަ އެވެ. އެ ދެ މައިން ސަރުކާރުގެ ބެލުމުގެ ދަށުން ދޫކޮށްލާނީ ކޮންމެހެން ހަދަންޖެހޭ އެސެސްމަންޓުތައް ހަދައިގެން ކަމަށް ޖަމިއްޔާއިން ބުނެ އެވެ.
އެ އާއިލާ ސަރުކާރުގެ ބެލުމުގެ ދަށުން ދޫކޮށްލުމުން ހުންނާނެ ތަނަކާއި ކިޔެވުމާއި ކެއިންބުއިމުގެ ހަރަދާއި ކައުންސިލިންގެ ހަރަދުތައް ވެސް އެ ދެމައިންނަށް ހަމަޖައްސާނީ މަމްސް ޖަމިއްޔާއިން ހޯދި ފައިސާއިން ކަމަށް އެ ޖަމިއްޔާއިން ބުނެ އެވެ.
