ނ. މަނަދޫގައި ނައީމާ މޫސާ މަރާލާފައި އޮއްވާ ފެނުނު މައްސަލައިގެ ތަހުގީގަށް ރަށަށް އައިސް ހަރަކާތްތެރިވަމުންދާ ފުލުހުންގެ ފޮރެންސިކް ޓީމުން ކުރިން ބަންދުކޮށް ނުކޮށް އޮތް ސަރަހައްދެއް ބަންދުކޮށް އެ ސަރަހައްދު ބަލައިފާސްކުރަން ފަށައިފި އެވެ.
މިދިޔަ ހުކުރު ދުވަހު އިރުއޮއްސެނިކޮށް ނައީމާ އުޅޭ ގެއިން އޭނާ މަރާލާފައި އޮއްވާ ފެނިފައިވާއިރު، މަރުގެ ތަހުގީގަށް ފުލުހުންގެ ގިނަ އަދަދެއްގެ ފޮރެންސިކް އެކްސްޓާޕުން ރަށަށް އައީ އެ ދުވަހުގެ މެންދަމު 2:00 ޖެހި އިރު އެވެ.
މީގެ ކުރިން މަނަދޫގައި ޓޭޕް ދަމާފައި އަދި ބެރެކޭޑް ވެސް ބަހައްޓާފައި ބަންދުކޮށްފައި ހުރީ ނައީމާ އުޅުނު ގޭގެ ސަރަހައްދު އެކަންޏެވެ. އެއީ ގެއާ އިންވެގެން ހުރި ބައެއް ގެތައް ވެސް ހިމެނޭ ގޮތަށެވެ.
މި ވަގުތު ކުލަ ހެދުމުގައި މަނަދޫގައި ހަރަކާތްތެރިވަމުންދާ ފުލުހުން މިއަދު ހެނދުނެއްގެ ވަގުތުން ފެށިގެން ރަށުގެ ހޮސްޕިޓަލުގެ ހުޅަނގު ދެކުނަށް އޮންނަ ގޯޅިން ފެށިގެން ސަރަހައްދެއް ވަނީ ބަންދުކޮށްފަ އެވެ.
އެ ސަރަހައްދުގައި ޓޭޕް އަޅާފައި ނެތް ނަމަވެސް، ބަންދުކޮށްފައި އޮތް ސަރަހައްދަށް ވަންނަން އޮންނަ ކޮންމެ ދިމާއަކުން ދެ ފުލުހަކު މަޑުކޮށްގެން ތިބެ އެވެ. އަދި އެ ސަރަހައްދަށް މީހަކު ވަންނަން ދާނަމަ ފުލުހުން މަޑުކުރުވަ އެވެ.
މި މައްސަލައާ ގުޅިގެން މީހަކު ހައްޔަރުކުރި ކަމެއް އަދި ނޭނގެ އެވެ. މައްސަލައާ ގުޅިގެން ފުލުހުން ރަސްމީކޮށް މިހާތަނަށް ބުނެފައިވަނީ ހަށިގަނޑުން ސާމްޕަލް ނަގާފައިވާ ކަމާއި، ރަށުގައި އިއްޔެ ވަޅުލާން އާއިލާއާ ހަވާލުކުރީ ޕޯސްޓްމޯޓަމް ހަދަން ޖެހޭ ސަބަބެއް ނެތް ކަމަށް ފޮރެންސިކް ޓީމަށް ފެނުމުން ކަމަށެވެ.
ނައީމާގެ އެއްވެސް ހަބަރެއް ނުވާތާ ދެ ދުވަސް ފަހުން އާއިލާއިން އެކަން ފުލުހުންނަށް އެންގުމުން އެގެއަށް ފުލުހުން ގޮސް ދޮރު ވައްޓާލައިގެން ވަތް އިރު އޭނާ އޮތީ ކޮޓަރިތެރޭ ބިންމަތީގައި މަރުވެފައި ކަމަށް ވެއެވެ.
އޭނާގެ މަރުގައި އިތުރަށް ބަލަން ޖެހޭ ކަންތައްތަކެއް ހުރުމުން، ފުލުހުންނަށް ނާންގާ އެއްވެސް އުޅަނދެއް މަނަދޫއިން ބޭރަށް ނުދިއުމަށް އެރަށު ކައުންސިލުން ވަނީ އާންމުކޮށް އަންގާފަ އެވެ. ހަމައެއާއެކު ރަށަށް ދާ މީހުން ވެސް ފުލުހުންނަށް އަންގާފައި ދިއުމަށް ވެސް ކައުންސިލުން އަންގާފައި ވެއެވެ.
އޭނާގެ މަރުގައި ޝައްކު ކުރެވޭ ކަންތައްތަކެއް ހުރުމުން އިތުރަށް ބަލަމުންދާއިރު، މި ނޫހަށް މައުލޫމާތު ލިބިފައިވާ ގޮތުގައި އޭނާ މަރުވެފައި އޮއްވާ ފެނުނުއިރު ކޮޓަރީގެ ބިންމަތީގައި ގިނަ އަދަދަކަށް ލޭ ހުއްޓެވެ.
