ސެޕްޓެމްބަރު މަހު ބާއްވާ ރިޔާސީ އިންތިހާބަށް ރާއްޖެއިން ބޭރުން އަންނަ ފަރާތްތަކުގެ ވިސާއާއި ބެހޭގޮތުން އިލެކްޝަންސް ކޮމިޝަން (އީސީ) އިން އިމިގްރޭޝަން ކޮންޓްރޯލާ މުހައްމަދު އަހުމަދު ހުސައިން (ހަނަފީ) އާ ބައްދަލުކޮށްފި އެވެ.
މި ބައްދަލުވުމާ ގުޅޭގޮތުން "އަދަދު" އާ ވާހަކަދައްކަވަމުން އީސީގެ ނައިބު ރައީސް އިސްމާއިލް ހަބީބު ވިދާޅުވީ، އިމިގްރޭޝަނާއެކު ބައްދަލުކުރީ މީގެ ކުރިން ބޭއްވި އިންތިހާބުތަކުގައި ރާއްޖެއިން ބޭރުގެ މޮނީޓަރުންނާއި އޮބްޒާވަރުންނަށް ވިސާ ލިބުމުގައި ދަތިތަކެއް ދިމާވުމާ ގުޅިގެން އެކަމަށް ހައްލެއް ހޯދުމަށް ކަމަށެވެ.
އަދި ރިޔާސީ އިންތިހާބަށް އީސީއިން ދައުވަތު ދީގެން 30 އަށްވުރެ ގިނަ ފަރާތުން ރާއްޖެއަށް އައުމަށް މިހާރު ހަމަޖެހިފައިވާކަމަށްވެސް ވިދާޅުވި އެވެ.
"އިންތިހާބުގެ ބޭނުމަށް އީސީގެ ދައުވަތަށް ވަޑައިގަންނަވާ ބޭފުޅުންނާއި އިންތިހާބަށް ރިކުއެސްޓު ކޮށްގެން ވަޑައިގަންނަވާ ބޭފުޅުންނަށް ހާއްސަ ވިސާ ހަމަޖައްސައިދޭނެ ކަމުގެ ޔަގީންކަން އިމިގްރޭޝަން ކޮންޓްރޯލާ ދެއްވި،" ހަބީބު ވިދާޅުވި އެވެ.
މިހާރު ހަމަޖެހިފައި އޮތް ގޮތުން އީސީއިން އިމިގްރޭޝަނަށް އެ ފަރާތްތަކުގެ މައުލޫމާތު ހިއްސާކުރުމުން ފަސޭހައިން ވިސާގެ ކަންކަން ހަމަޖެހިގެންދާނެ ކަން ހަބީބު ފާހަގަކުރެއްވި އެވެ.
މި އަހަރުގެ ރިޔާސީ އިންތިހާބު މޮނީޓާ ކުރަން ބޭނުންވާ ބޭރުގެ ޖަމިއްޔާތަކުން އެކަމަށް އެދި ހުށަހެޅުމަށް އީސީއިން މިހާރު ވަނީ ހުޅުވާލާފަ އެވެ.
އެގޮތުން އީސީއިން މިދިޔަ މަހުގެ 25 ގައި ކުރި އިއުލާނުގައި ބުނެފައިވަނީ އިންތިހާބު މޮނީޓާކުރަން ބޭނުންވާ ފަރާތްތަކަކީ އެމީހަކު ރިޕްރެޒެންޓު ކުރާ ޖަމިއްޔާއަކުން އެކްރެޑިޓްކޮށްފައިވާ މީހަކަށްވާންޖެހޭނެ ކަމަށެވެ. އަދި އެއީ 18 އަހަރު ފުރި، އެއްވެސް ކެންޑިޑޭޓަކަށް އަދި ޕާޓީއަކަށް ކެމްޕެއިން ކުރާ މީހަކަށްވެގެންނުވާނެ ކަމަށް ވެސް އިލެކްޝަންސް އިން ބުނެފައިވެ އެވެ.
