އޮޅުވާލައިގެން މަކަރާއި ހީލަތުގެ ތެރެއިން ފައިދާ ހޯދުމުގެ 11،192 މައްސަލަ 2012 އިން ފެށިގެން 2022 އަށް ރިޕޯޓުކޮށްފައިވާ ކަމަށާއި އެހެން ނަމަވެސް އެ މައްސަލަތަކުގައި ހިމެނޭ ފައިސާއާ ގުޅޭ މައުލޫމާތު ވަކިން ބަލަހައްޓަމުން ނުދާ ކަމަށް ފުލުހުން ބުނެފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހުން އެއްކުރި މައުލޫމާތުތަކުން އެނގޭ ގޮތުގައި ފާއިތުވެދިޔަ 10 އަހަރުގެ ތެރޭގައި އެންމެ ގިނައިން މިފަދަ މައްސަލަތައް ރިޕޯޓު ކޮށްފައި ވަނީ 2021 ގަ އެވެ. އެ އަހަރު 1،568 މައްސަލައެއް ހުށަހެޅި އެވެ. އެއަށްފަހު އެންމެ ގިނައިން ރިޕޯޓުކުރީ މިދިޔަ 2022 ގަ އެވެ.
އެ މައުލޫމާތު ކަރުދާހުން އެނގޭ ގޮތުގައި މި ހުރިހާ މައްސަލައެއްގައި ހިމެނޭ ފައިސާގެ ފުރިހަމަ މައުލޫމާތު ވަކިން ބަލަހައްޓަމުން ނުދާތީ އެ މައުލޫމާތު އެނގެން ނެތެވެ.
ފުލުހުން "އަދަދު" އާ ހިއްސާކުރި މައުލޫމާތުތަކުން އެނގޭ ގޮތުގައި ފްރޯޑްގެ ގޮތުގައި މިދިޔަ 10 އަހަރު 1،263 މައްސަލަ ހުށަހަޅާފައިވެ އެވެ. އަދި، ފްރޯޑާއި ގުޅޭ ކުށްކުށުގެ ގޮތުގައި 8،524 މައްސަލަ ހުށަހަޅާފައިވެ އެވެ.
އޮޅުވާލައިގެން ފައިސާ ހޯދުމުގެ 649 މައްސަލައެއް ނިމިގެންދިޔަ ދަހަރުގެ ތެރޭގައި ހުށަހަޅާފައިވާއިރު ފައިސާގެ ބޭރުން އޮޅުވާލައިގެން ތަކެތި ހޯދުމުގެ 296 މައްސަލައެއް ހުށަހަޅާފައިވެ އެވެ.
ވިޔަފާރި ކުރުމަށް ފަހު ފޭކު ސްލިޕް ފޮނުވުމުގެ 89 މައްސަލައެއް ފުލުހުންނަށް ހުށަހެޅުނު އިރު ސްކޭމް ކޯލް ކޮށްގެން ފައިސާ ހޯދުމުގެ 371 މައްސަލައެއް ވެސް ފުލުހުންނަށް ހުށަހަޅާފައިވެ އެވެ.
ފުލުހުން މައުލޫމާތު ދިން ގޮތުގައި ސްކޭމް ކޯލުތަކަ ގުޅޭ މައްސަލަތައް ވަކިން ރެކޯޑު ކުރަން ފެށީ 2019 ގަ އެވެ. އަދި، ފޭކު ސްލިޕް ފޮނުވުމުގެ މައްސަލަތައް ވެސް ވަކިން ރެކޯޑުތައް ބަލަހައްޓަން ފެށީ 2021 ގަ އެވެ.
މިފަދަ މައްސަލަތައް ތަހުގީގު ކުރުމަށް ފަހު ފޮނުވުމުން ދައުވާ ކުރުމާ މެދު ގޮތް ނިންމަނީ ޕްރޮސެކިއުޓާ ޖެނެރަލްގެ އޮފީހުންނެވެ.
