ސެޕްޓެމްބަރުގައި އޮންނަ ރިޔާސީ އިންތިހާބުގައި ރާއްޖޭގެ ވެރިކަމަށް ދެވަނަ ދައުރަކަށް ރައީސް އިބްރާހިމް މުހައްމަދު ސޯލިހު ގެނައުމަށް ތާއިދުކުރާކަން ހާމަކޮށް ޖުމްހޫރީ ޕާޓީ (ޖޭޕީ) ގެ ކައުންސިލުންނާއި އެ ޕާޓީގެ މެމްބަރުކަމުން މި ސަރުކާރުގައި މާލޭ ވޯޓާ އެންޑް ސުވަރޭޖު ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރު ހަސަން ޝާހު އިސްތިއުފާ ދެއްވައިފި އެވެ.
މި ސަރުކާރު ވެރިކަމަށް އައުމަށް ފަހު ޖޭޕީގެ ސްލޮޓެއްގައި ޝާހު އެންމެ ފުރަތަމަ ފުރުއްވީ މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ މެނޭޖިން ޑިރެކްޓަރު ކަމެވެ. އެއަށްފަހު، އޭނާ ބަދަލުކުރީ އެމްޑަބްލިއުއެސްސީގެ އިސްވެރިޔަކަށެވެ.
މި އަހަރުގެ ސެޕްޓެމްބަރު 9, ގައި ބާއްވާ ރިޔާސީ އިންތިހާބުގައި މަހުޖަނު ގާސިމް އިބްރާހިމްގެ ޖުމްހޫރީ ޕާޓީން ވާދަ ކުރަން ނިންމުމާ އެކު އެ ޕާޓީގެ އިސް ބައެއް ބޭފުޅުން ޕާޓީން ދަނީ ވަކިވަމުންނެވެ.
ޝާހުގެ އިސްތިއުފާ ސިޓީގައި ވަނީ 2023 ގެ ރިޔާސީ އިންތިހާބުގައި ތާއިދު ކުރަން ނިންމާފައި ވަނީ ރައީސް ސޯލިހަށް ކަމަށް ވިދާޅުވެފަ އެވެ. އަދި، އިސްތިއުފާ ދެއްވީ އެ ސަބަބާ ގުޅިގެން ކަމަށް ވިދާޅުވި އެވެ.
"[ރައީސް ސޯލިހުގެ] ރިޔާސީ ދައުރުގައި ދައްކަވައި ދެއްވާފައި ވަނީ ގައުމުގެ ހަމަޖެހުމާއި އަސާސީ ހިދުމަތްތައް ފޯރުކޮށްދިނުމާއި ތަރައްގީ އެވެ،" ޝާހުގެ ސިޓީގައި ރައީސްް ސޯލިހަށް ތާއިދު ކުރައްވަން ނިންމެވި ސަބަބުތަކެއްގެ ގޮތުގައި ބަޔާން ކުރައްވާފައިވެ އެވެ.
ގާސިމް ވަނީ މިއަދު ޖޭޕީގެ ޓިކެޓުގައި ރިޔާސީ ރޭހަށް ނުކުންނާނެކަން ހާމަކުރައްވާފަ އެވެ. އޭނާ ރިޔާސީ ރޭހަށް ނުކުންނަން ނިންމީ ރިޔާސީ ކެންޑިޑޭޓު ކަމަށް ޝަރުތު ހަމަވާ އެތައް ބޭފުޅުންނެއް ތިއްބެވި ނަމަވެސް ޕްރައިމަރީއަށް ކުރިމަތިލުމުގެ ވަގުތު ހަމަވާން ދިޔައިރު ވެސް އެއްވެސް މީހަކު ކުރިމަތިނުލުމުންނެވެ.
ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން ޖޭޕީން ނިންމާފައިވާއިރު ގިނަބަޔަކު ގަބޫލުކޮށްގެން ތިބީ ވެސް އެ ޕާޓީގެ ރިޔާސީ ކެންޑިޑޭޓަކަށްވާނީ ޕާޓީގެ ލީޑަރު ގާސިމް އިބްރާހިމް ކަމަށެވެ.
