ސަރުކާރުގެ މައި ހޮސްޕިޓަލް، އައިޖީއެމްއެޗަށް ބޭނުންވާ ކާބަންޑައިއޮކްސައިޑް ނުލިބޭތާ ތިން ހަފުތާވެ، އާންމު ސާޖަރީތައް ހުއްޓާލާފައިވާ ކަމަށް ރިޕޯޓު ކުރީ އިއްޔެ އެވެ.

ކާބަންޑައިއޮކްސައިޑް އާންމުކޮށް ބޭނުން ކުރަނީ ލެޕަރޮސްކޮޕް ނުވަތަ ބަނޑުގައި ލޯވަޅު އަޅައިގެން ކުރާ ސާޖަރީތަކުގަ އެވެ. އޭގެ ތެރޭގައި އެޕެންޑިކްސް ސާޖަރީ، ގޯލްސްޓޯންސް ސާޖަރީ ފަދަ ކުދި ސާޖަރީތަކުގަ އެވެ.

އައިޖީއެމްއެޗްގެ ސީއީއޯ އިބްރާހިމް ސަލީމް "އަދަދު" އަށް ވިދާޅުވީ ގޭހުގެ ސްޓޮކް ނުލިބޭތީ ފާއިތުވީ ތިން ހަފުތާ ތެރޭގައި ހިފަހައްޓަމުން ދިޔައީ އެ ހޮސްޕިޓަލްގައި ހުރި ގޭހުން ކަމަށެވެ. އާންމު ސާޖަރީތަކުގެ ތެރެއިން ކާބަންޑައިއޮކްސައިޑް ބޭނުންކޮށްގެން ކުރަންޖެހޭ ފަސް ސާޖަރީ ދުވާލަކު އެވްރެޖުކޮށް ކުރާ ކަމަށާއި ނަމަވެސް މިހާރު ގޭސް ހުރީ އެމަޖެންސީ ކޭސްތަކުގައި ސާޖަރީ ކުރެވޭނެ ވަރަށް ކަމަށް ސަލީމް ވިދާޅުވި އެވެ. އެއީ ދެ ފުޅި ކަމަށް އޭނާ ވިދާޅުވި އެވެ.

"އެހެންވެ އާންމުކޮށް ކުރަންޖެހޭ ސާޖަރީތަކުގައި މީހުން އެޑްމިޓް ނުކުރަން،" އޭނާ ވިދާޅުވި އެވެ.

ކާބަންޑިއޮކްސައިޑް ގޭސް އައިޖީއެމްއެޗަށް ސައިޕްލައިކޮށް ދެނީ މޯލްޑިވްސް ގޭހުންނެވެ. ގޭހުގެ ސްޓޮކް ހުސްވީ މޯލްޑިވްސް ގޭސްގެ ޝިޕްމެންޓް އައުން ލަސްވެގެން ކަމަށް ސަލީމް ވިދާޅުވި އެވެ.

އެހެންވެ، އަމިއްލަ ހޮސްޕިޓަލަކަށް ގެނެސްފައިވާ ކާބަންޑައިއޮކްސައިޑް ޝިޕްމެންޓެއް މާލޭ ބަނދަރުގައި އެބަ އޮތް ކަމަށާއި އެ ޝިޕްމެންޓް ގޭސް ލިބޭތޯ މަސައްކަތް ކުރާ ކަމަށް އޭނާ ވިދާޅުވި އެވެ.

"އަޅުގަނޑުމެން މަސައްކަތް ކުރަމުން މިދަނީ އެ ޝިޕްމެންޓުން ވެސް [ގޭސް] ލިބޭތޯ. ނަމަވެސް އެ ޝިޕްމެންޓު ވެސް ހުސް ނުކުރެވޭތާ ހަތަރު ދުވަސް ވެއްޖެ،" ސަލީމް ވިދާޅުވި އެވެ.

"މިއީ އައިޖީއެމްއެޗްގެ މައްސަލައެއް ނޫން. ސަޕްލަޔަރުގެ މައްސަލައެއް."

މިކަމާ ގުޅޭ ގޮތުން މޯލްޑިވްސް ގޭހުގެ ބަހެއް އަދި ނުލިބެ އެވެ.

މުހިންމު ބައެއް ހަބަރު

• މޯލްޑިވިއަން ޑިމޮކްރަސީ ނެޓްވޯޑް އުވާލި މައްސަލަ ކޯޓުން ހުށަހެޅުމުން، އެ ޖަމިއްޔާއިން އެހެން ދީނެއްގެ ފިކުރާއި ޝިޔާރު ފަތުރަން އުޅުނު ކަމަށް ބެލެވިދާނެ ކަމަށް ކަނޑައަޅައި ޖަމިއްޔާ އުވާލީ ރަނގަޅަށް ކަމަށް ނިންމި އެވެ.

• ހެންވޭރު ގެއެއްގައި ހުރި އޮފީހެއް ފަޅާލައި، ހަތް ލައްކަ ރުފިޔާ ވަގަށް ނެގި ކަމަށް ބެލެވޭ މީހަކު ފުލުހުން ހައްޔަރުކުރި އެވެ.

• ވެލާނާ އިންޓަނޭޝަނަލް އެއާޕޯޓުގައި މިއަދު މެންދުރު ޖެއްދސި ފްލައި ދުބާއީގެ މަތިންދާ ބޯޓުގެ ފުރޮޅު ފަޅައިިގެން ދިޔަ އެވެ.

• މާލެ އެތެރެކުރާ ވެހިކަލްތަކުގެ އަދަދު ކޮންޓްރޯލްކުރުމަށް އިމްޕޯޓް އެކްސްޕޯޓު ގާނޫނަށް ބަދަލު ގެނައުމަކީ މުހިންމު ކަމެއް ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވި އެވެ.

• ދިވެހިން ހިންގާ އެސްއެމްއީތަކާއި ފަތުރުވެރިކަމުގެ ސިނާތުގައި ހަރަކާތްތެރިވާ ދިވެހި ކުންފުނިތަކަށް އެހީތެރިކަން ފޯރުކޮށްދިނުމަށް، އޭޝިއަން ޑިވެލޮޕްމަންޓު ބޭންކު (އޭޑީބީ) އިން ބޭންކް އޮފް މޯލްޑިވްސް (ބީއެމްއެލް) އަށް 41 މިލިއަން ޑޮލަރު ފައިނޭންސް ޕެކޭޖެއް ފޯރުކޮށްދިނުމުގެ އެއްބަސްވުމުގައި ސޮއިކުރި އެވެ.

• މޯބައިލް ސިމް ނެގޭ މިންވަރު ކަނޑައެޅުމަށް ކުރަންޖެހޭ މަސައްކަތްތައް އަންނަ މެއި މަހުގެ ތެރޭގައި ފަށާނެ ކަމަށް ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އިން ބުނި ކަމަށް ރިޕޯޓުކުރި އެވެ.

• ތިލަފުށީގެ ބިން ބޮޑުކުރުމުގެ މަޝްރޫއުގެ ދަށުން އެ ރަށުގެ ދެވަނަ ފިޔަވަހީގައި ހިމެނޭ 'އޭރިއާ ސީ' ހިއްކުމުގެ މަސައްކަތް ފެށި އެވެ.

• ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ހުސްވެފައިވާ މެނޭޖިން ޑިރެކްޓަރުގެ މަގާމަށް އެ ކުންފުނީގެ ދަށުން ހިންގަމުންދާ މޯލްޑިވްސް ސްޓޭޓް ޝިޕިން (އެމްއެސްއެސް) ހިންގެވުމާ ހަވާލުވެ ހުންނެވި އަބްދުﷲ ސައީދު އައްޔަނު ކުރުމަށް ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑް (ޕީސީބީ) އަށް ފޮނުވި އެވެ.

ދުވަހުގެ ކޯޓޭޝަން

މާލެ އެތެރެކުރާ ވެހިކަލްތަކުގެ އަދަދު ކޮންޓްރޯލްކުރުމަށް އިމްޕޯޓް އެކްސްޕޯޓު ގާނޫނަށް ބަދަލު ގެނައުމަކީ މުހިންމު ކަމެއް ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ، ރައްޔިތުންގެ މަޖިލީހުގެ ކޮމިޓީގައި ވިދާޅުވީ؛

[އެކަށީގެން ނުވާ މިންވަރަށް މާލޭގައި ވެހިކަލްތައް ގިނަވުން] ކޮންޓްރޯލް ކުރެވޭނީ އިމްޕޯޓު އެކްސްޕޯޓު ގާނޫނަށް ބަދަލުތަކެއް ގެނެސްގެން. އިމްޕޯޓު އެކްސްޕޯޓު ގާނޫނުގަ މަނައެއް ނުއެއް ކުރޭ ކޮންމެ މީހަކުވެސް ވެހިކަލެއް ގެންނަންވީމަ ހަމަ އެތެރެކުރަންވީ ވެހިކަލެއް. އޭގައި މަނާކުރާ އެއްވެސް ކަމެއް ނެތް. އެހެންވީމަ އަޅުގަނޑުވެސް އަދި އިއްޒަތްތެރި މެންބަރުވެސް ނުވަތަ އެހެން ބޭފުޅަކު ވެސް ހަމަ 10 ވެހިކަލް، 20 ވެހިކަލް އިތުރުކުރަންވީ"

ދުވަހުގެ ފޮޓޯ

އިއްޔެ ފްލައި ދުބާއީ މަތިންދާ ބޯޓުގެ ފުރޮޅު ފަށައިގެން ގޮސްފައި. -- ފޮޓޯ: އޭވިއޭޓާސް މޯލްޑިވްސް