މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 483،624 އަށް އަރައިފި އެވެ.
ތަފާސް ހިސާބުތަކުން ދައްކާ ގޮތުން މިއީ މިދިޔަ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންނާ އަޅާ ބަލާއިރު 22 އިންސައްތަ އިތުރު އަދަދެކެވެ.
ފާއިތުވި އަހަރުގެ މި މުއްދަތުގައި 394،204 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއަހަރުގެ މިހާތަނަށް ޒިޔާރަތްކުރީ 483،624 ފަތުރުވެރިންނެވެ. ދެހާސްއެކާވީސް ވަނަ އަހަރުގެ މި މުއްދަތުގައި ޒިޔާރަތްކޮށްފައި ވަނީ 266،752 ފަތުރުވެރިންނެވެ.
ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ގައުމު ހިމެނޭ ލިސްޓުގެ އެންމެ ކުރީގައި އަދިވެސް އޮތީ ރަޝިއާ އެވެ. ދެވަނައަށް އިންޑިއާ އޮތް އިރު ތިންވަނަގައި އޮތީ އިނގިރޭސިވިލާތެވެ. މި ލިސްޓުގައި އިޓަލީ، ޖަރުމަނު، ފްރާންސް، އެމެރިކާ، ޗައިނާ އަދި ސްވިޒަލޭންޑްގެ އިތުރުން ޕޮލެންޑު ވެސް ހިމެނެ އެވެ.
މިއަހަރުގެ ފާއިތުވި ތިން މަހުގެ ތެރެއިން އެންމެ ގިނައިން ފަތުރުވެރިން ޒިޔާރަތްކުރީ މިދިޔަ ފެބުރުއަރީ މަހު އެވެ. ފެބުރުއަރީ މަހު އެކަނި ވެސް 177،914 ފަތުރުވެރިން ޒިޔާރަތްކުރި އެވެ.
ރާއްޖޭގެ ފަތުރުވެރިކަން ރަނގަޅުވަމުން އަންނައިރު، ރާއްޖޭގައި އޮޕަރޭޝަނަލް ކެޕޭސިޓީގައި 60،382 އެނދު އެބަހުއްޓެވެ. އޭގެ ތެރޭގައި 173 ރިސޯޓުގެ 42،037 އެނދާއި، 13 ހޮޓަލެއްގެ 1640 އެނދާއި، 894 ގެސްޓްހައުސްއެއްގެ 14،642 އެނދު އަދި 153 ސަފާރީއެއްގެ 2959 އެނދު ހިމެނެ އެވެ.
ރާއްޖޭގެ 116 ރަށެއްގައި ގެސްޓްހައުސް ހިންގަމުންދެ އެވެ. އެގޮތުން، އެންމެ ގިނައިން ގެސްޓްހައުސްތައް ހިންގަމުން އަންނަ އަތޮޅުތަކަކީ ކ، އއ، އދ އަދި ވ އަތޮޅެވެ.
