އިންތިހާބުތަކުގެ އާންމު ގާނޫނަށް ހުށަހަޅާފައިވާ އިސްލާހާ ގުޅިގެން އަމާޒުވި ނުރުހުން ފިނިކުރަން އިލެކްޝަންސް ކޮމިޝަނުން ދެން ވެސް އާންމު ކުރީ ހަމަ އެފަދަ ކަމެކެވެ؛ ރިޔާސީ އިންތިހާބު ކަވަރު ކުރާ ހުރިހާ ނޫސްވެރިންނަށް އެ ކޮމިޝަނުން ތަމްރީނެއް ދޭނެ ވާހަކަ އެވެ. ދޭސީ ވިޔަސް ބިދޭސީ ވިޔަސް މެ އެވެ.
އިންތިހާބާ ބެހޭ ގައުމީ ލަފާ ދޭ ކޮމިޓީގެ ބައްދަލުވުމުގައި އެ ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ހުރިހާ ނޫސްވެރިންނަށް ވެސް އިންތިހާބު ކަވަރު ކުރުމުގެ ފުރުސަތު ފަހިވެފައި އޮންނާނެ ކަމަށާއި އެހެންނަމަވެސް އެ ކޮމިޝަނުން ދޭ ދެ ގަޑިއިރުގެ ތަމްރީނެއް ފުރިހަމަ ކުރަން ޖެހޭނެ އެވެ.
އިންތިހާބު ކަވަރު ކުރުމުގެ ފުރުސަތު ލިބޭނެ އޭގެ ފަހުގައި އިލެކްޝަންސް ކޮމިޝަނުން އެކްރެޑިޓް ކުރުމުން ކަމަށް އެ ކޮމިޝަނުން ބުނެ އެވެ.
އޭނާ ވިދާޅުވީ މިކަން ކުރަން ޖެހުނު ސަބަބަކީ ބައެއް ސިޔާސީ ނުފޫޒު އޮންނަ މީހުންނާއި އެ ހިޔާލުތަކުގެ މީހުން ވެސް ރިޕޯޓަރުންގެ ގޮތުގައި ހަރަކާތްތެރިވެ، ހަމަނުޖެހުން ހިންގަން މަސައްކަތް ކޮށްފައިވާތީ ކަމުގަ އެވެ.
"ކޮމިޝަނުގެ ވިސްނުމަކީ މި ބޭފުޅުން [ނޫސްވެރިން]ގެ ދައުރު ފުރިހަމައަށް ކިޔައިދެވިފައި ނެތީމަ އޭ މި ގޮތަށް މި ހިނގަނީ، އެހެންވީމާ ކޮމިޝަނުން ނިންމީ ދެ ގަޑިއިރެއްހާ އިރުގެ ޓްރެއިނިން ޕްރޮގްރާމެއް ފޭސް ޓު ފޭސް ކޮށް ނުވަތަ އޮންލައިން ކޮށް ހިންގަން،" އޭނާ ވިދާޅުވި އެވެ.
ރާއްޖެއިން ބޭރުން އަންނަ ނޫސްވެރިން ވެސް އެކްރެޑިޓް ކުރާނީ މި ތަމްރީނު ފުރިހަމަ ކުރުމުން ކަމަށް އޭނާ ވިދާޅުވި އެވެ.
މެންބަރުންނަށް "ބޮޑު ޖޯކެއް"
މަޖިލީހަށް މިހާރު ހުށަހެޅިފައި އޮތް އިސްލާހަށް ވެސް ބޮޑެތި ފާޑުކިޔުންތަކެއް އަމާޒުވެފައިވަނިކޮށް، އިލެކްޝަންސް ކޮމިޝަންގެ ތަމްރީނު ޕްރޮގްރާމް ވެސް އެ ބޮޅަށް އިތުރުވެގެން ދިޔަ އެވެ.
"އަޅުގަނޑަކަށް އެއްގޮތަކަށްވެސް ނޭނގުނު މީޑިއާ ޓްރެއިން ކުރަން، ނޫނީ މީޑިއާ އަށް ތަމްރީނު ދޭން އިލެކްޝަންސް ކޮމިޝަނުން ކުރަންޖެހޭ މަސައްކަތެއް. މީޑިއާ ކައުންސިލު، މީޑިއާ ޓްރެއިންކުރަންޏާ މީޑިއާ ކައުންސިލެއް އެބަ އޮތް. ބްރޯޑްކާސްޓިން ކޮމިޝަނެއް އެބަ އޮތް،" މަޖިލީހުގެ ބުދަ ދުވަހުގެ ޖަލްސާގައި ބަހުސް ކުރައްވަމުން ވިލުފުށީ ދާއިރާގެ މެންބަރު ހަސަން އަފީފް ވިދާޅުވި އެވެ.
އަފީފް ވިދާޅުވީ ދިވެހި ނޫސްވެރިން ތަމްރީނު ކުރުމާއެކު ބައިނަލްއަގްވާމީ ނޫސްވެރިން ވެސް އީސީން ތަމްރީނު ކުރުމަކީ "ބޮޑު ޖޯކެއް" ކަމަށެވެ.
"އަޅުގަނޑުމެންނަށް ވުރެ ބޮޑަށް ތަރައްގީ ވެފައިވާ މީޑިއާގެ ކަންތައްތައް ވެސް، އެހެން ކަންތައްތައް ވެސް ތަރައްގީވެފައިވާ ފަރާތްތަކެއް މި ތިބެނީ، އަޅުގަނޑުމެން ބޭރުގެ ބައެއް މުހިންމު ގައުމުތަކުގެ މީޑިއާތަކުގައި. ހާއްސަކޮށް ސީ.އެން.އެން، ބީ.ބީ.ސީ، ދެން އެހެންގޮސް ބައިވަރު މީޑިއާތައް؛ އަލްޖަޒީރާ،" އަފީފް ވިދާޅުވި އެވެ.
ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގް ވިދާޅުވީ ވޯޓު ފޮށި ކައިރީގައި ހަރަކާތްތެރިވާ ކޮންމެ މީހަކަށް އިލެކްޝަންސް ކޮމިޝަނުން ތަމްރީނު ދިނުމަކީ ނޫސްވެރިކަން ހަނި ކުރުން ކަމަށެވެ.
"އަޅުގަނޑު ގަބޫލެއް ނުކުރަން، ނޫސްވެރިންނަށް ތަމްރީނު ދޭންޖެހޭނީ އިލެކްޝަންސް ކޮމިޝަނުން ކަމަކަށް. ނޫސްވެރިންނަށް ތަމްރީނު ދޭނެ އިދާރާތަކެއް ދައުލަތުގެ ހަރަދުގައި އެބަ ހިންގާ. މީޑިއާތަކަށް ދޭންޖެހޭ ތަމްރީނެއް ވާނަމަ، އެ ފަރާތްތަކުން އެ ދަނީ ދެމުން،" ނޫސްވެރިއެއްގެ ގޮތުގައި ވެސް މަސައްކަތް ކޮށްފައިވާ މުހައްމަދު ވިދާޅުވި އެވެ.
އޭނާ ވިދާޅުވީ އިލެކްޝަންސް ކޮމިޝަނުގެ ޒިންމާއަކަށް ވާންވީ ނޫސްވެރިންނަށް ވެސް އެއްބަސްވެވޭ ގައިޑްލައިނެއް އުފެއްދުން ކަމަށެވެ. އެހެންނޫންނަމަ އިންތިހާބަށް އާންމު ރައްޔިތުންނާއި ނޫސްވެރިންގެ އޮންނަ އިތުބާރު ގެއްލިގެންދާނެ ކަަމަށް ވިދާޅުވި އެވެ.
ބިލަށް ބަހުސް ކުރެއްވި އިތުރު މެންބަރުން ވެސް ވަނީ އިލެކްޝަންސްގެ މި ނިންމުމަށް ވަރަށް ބޮޑަށް ފާޑުވިދާޅުވެފަ އެވެ.
ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު ހުށަހަޅުއްވާފައިވާ އިންތިހާބުތަކާ ބެހޭ އާންމު ގާނޫނު އިސްލާހު ކުރުމުގެ ބިލުގައިވާ ގޮތުން ވޯޓު ނަގާ ދުވަހު ވޯޓުލުމުގެ ކަންކަން މޮނިޓަރު ކުރުމަށް ވޯޓުލާ ސަރަހައްދާއި ގުނާ ސަރަހައްދުތަކުގައި ހަރަކާތްތެރިވެވޭނީ އިލެކްޝަންސް ކޮމިޝަނުން ހުއްދަ ދީފައިވާ "ރެޖިސްޓާޑް ނޫސްވެރިން" ކަމަށެވެ.
ރަޖިސްޓްރީ ކޮށްފައިވާ ނޫސްވެރިން ކަމަށް ބިލުގައި ބަޔާން ކޮށްފައިވަނީ ރަޖިސްޓްރީ ކޮށްފައިވާ އެއްވެސް މީޑިއާއެއް ނުވަތަ ބްރޯޑްކާސްޓިން ކޯޕަރޭޝަނެއްގައި ހަބަރު ފޯރުކޮށްދިނުމުގައި ހަރަކާތްތެރިވާ ފަރާތްތަކަށެވެ. އޭގެ ތެރޭގައި ފޮޓޯގްރަފަރުންނާއި ވީޑިއޯގްރަފަރުން ވެސް ހިމެނޭނެ ކަމަށް ބުނެފައިވެ އެވެ.
މި މާއްދާއިން ނޫސްވެރިންގެ ދައުރު ހަނިވާ ކަމަށް ބުނެ، ގިނަ ބައެއްގެ ފާޑުކިޔުން ވަނީ މިކަމަށް އަމާޒުވެފަ އެވެ.
