މި ރޯދަ މަހު ވައްކަމުގެ މައްސަލަތައް މަދު ކުރުމަށްޓަކައި ކޮންމެ މީހަކުވެސް އެމީހެއްގެ އަމިއްލަ މުދަލަށް ރައްކާތެރިވުމަށް ފުލުހުން އިލްތިމާސްކޮށްފި އެވެ.
މުދަލަށް ރައްކާތެރިވުމުގެ ގޮތުން މި ރޯދަ މަހުގެ ވަގުތުތަކުގައި ގެ ހުސްކޮށްފައި ބޭރަށް ދާނަމަ ގޭގެ ހުރިހާ ކުޑަދޮރުތަކާއި، ފެންލައިޓު އަދި ވައިގޮޅި ފަދަ ތަންތަން ވެސް ވައްކަން ކުރުމަށް މަގުފަހި ނުވާނެހެން ރަނގަޅަށް ތަޅުލުމަށް ފުލުހުން ވަނީ އިލްތިމާސްކޮށްފަ އެވެ.
ހަމައެއާއެކު ފޯނާއި ލެޕްޓޮޕް، ޓެބްލެޓް، އައިޕެޑް، ވޮލެޓް، އަތުކުރީގަޑި އަދި ފައިސާއާއ އެހެނިހެން ތަކެތި ވެސް ވައްކަން ކުރުމަށް މަގުފަހިވާގޮތަށް ނުބެހެއްޓުމަށް ފުލުހުން އިލްތިމާސްކޮށްފައި ވެއެވެ.
އޭގެ އިތުރުން ވެސް މަގުމަތީގައި އުޅޭއިރު ފޭރުމުގެ އަމަލެއް ހިންގުމަށް މަހުފަހި ނުވާނެހެން ގެންގުޅޭ ތަކެއްޗަށް ރައްކާތެރިވުމަށާއި، އަޅުކަން ކުރުމަށް މިސްކިތުގައި ހޭދަކުރާ ވަގުތުތަކުގައި ވެސް ފޯނާއި ވޮލެޓު އަދި ދަބަސްފަދަ ތަކެއްޗަށް ސަމާލުވުމަށް ފުލުހުން އެދިފައި ވެއެވެ.
އަމިއްލަ ފަރުދުންގެ އިތުރން ވިޔަފާރިތަކުން ވެސް އޮފީސް އިމާރާތްތައް ތަޅުލުމަށާއި، ފިހާރަތަކުގެ ރައްކާތެރިކަން ކަށަވަރު ކުރުމަށް ދޮރު ރަނގަޅަށް ތަޅުލުމަށް އަދި ފިހާރަތެރޭގައި ފައިސާ ނުބެހެއްޓުމަށް ފުލުހުން ވަނީ އެދިފަ އެވެ.
ފުލުހުން އިތުރަށް ވަނީ ރައްޔިތުންގެ ސަލާމަތާއި ރައްކާތެރިކަމަށް އަދި މުޖުތަމައުގެ އަމާންކަމާއި ރައްކާތެރިކަން ކަށަވަރުކުރުމަށްޓަކައި ފުލުހުން ކުރަމުންދާ މަސައްކަތުގައި އެއްބާރުލުން ދިނުމަށް ވެސް އެދިފަ އެވެ.
