ރައީސް އިބްރާހިމް މުހައްމަދު ސޯލިހުގެ ސެކިއުރިޓީ ފެއިލްވެ އެމަނިކުފާނުގެ މޮޓޯކޭޑަށް ހުރަސްއެޅުމާ ގުޅިގެން އަމާޒުވި ފާޑުކިޔުންތަކަށް ޑިފެންސް މިނިސްޓަރު މާރިޔާ ދީދީ މިއަދު ރައްދު ދެއްވައިފި އެވެ.
މާރިޔާ މިއަދު ކުރެއްވި ޓުވީޓެއްގައި ވިދާޅުވީ ސިފައިންގެ އޮޕަރޭޝަނަލް ނުވަތަ ޓެކްޓިކަލް ކަމެއް މެދުވާއިރަށް ވަޒީރުގެ ބޮލަށް އެކަމުގެ ޒިންމާ ޖަހަނީ ޑިފެންސް މިނިސްޓަރަކީ އަންހެނެއް ވީމާ ކަމަށެވެ.
"އައިޖީއެމްއެޗުގައި ކަމެއް ގޯސްކޮށްދިޔައިމަ ހެލްތު މިނިސްޓަރު ބޮލަކަށް ނުޖަހާ، ފުލުހުން ގޯސްކޮށް ކަމެއް ކުރީމާ ހޯމް މިނިސްޓަރު ބޮލަކަށް ނުޖަހާ،" މިއީ ބައިނަލްއަގުވާމީ ގޮތުން ފާހަގަކުރާ އަންހެނުން ބާރުވެރިކުރުވާ މަސްކަން ފާހަގަކުރައްވައި މާރިޔާ ވިދާޅުވި އެވެ.
މާރިޔާ މިހެން ވިދާޅުވެފައިވަނީ ރައީސްގެ ސެކިއުރިޓީ ބްރީޗްވެ 15 މިނެޓު ވަންދެން އިދިކޮޅު މުޒާހަރާއެއްގެ ތެރޭގައި އެމަނިކުފާނުގެ ކާރުކޮޅު ތާށިވެ ރައީސްގެ ދެކަނބަލުން ނުރައްކަލަށް ވައްޓާލުމުގެ ޒިންމާ ޑިފެންސް މިނިސްޓަރާއި ސިފައިންގެ ވެރިން ނަގަންޖެހޭ ކަމަށް ގިނަ ބަޔަކު ގޮވާލަމުންދާ ދަނޑިވަޅެއްގަ އެވެ.
އަދި މި ހާދިސާއާ ގުޅިގެން މިނިސްޓަރުކަމުން މާރިޔާ އިސްތިއުފާ ދެއްވަންޖެހޭ ކަމަށް އިދިކޮޅުން އިސްވެ ދަނީ ގޮވާލަމުންނެވެ.
މި މައްސަލާގައި ޕްރެޒިޑެންޝަލް ގާޑްސްގެ ކޮމާންޑިން އޮފިސަރު އަބްދުﷲ މުހައްމަދު ވަޒީފާއަށް ނުކުތުން މަނާކޮށް، ކަންތައް ހިނގައިދިޔަ ގޮތް ބެލުމަށް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ޗެއާ ކުރައްވާ ކޮމިޓީއަކުން ތަހުގީގުކުރަން ވަނީ ފަށާފަ އެވެ. އެ މައްސަލައިގައި ކޮމާންޑިން އޮފިސަރު އަބްދުﷲ މުހައްމަދުގެ އިތުރުން އޭނާގެ ދަށުން މަސައްކަތް ކުރާ ބައެއް އެހެން ސިފައިންގެ މީހުން ވެސް ވަނީ ސަސްޕެންޑުކޮށްފަ އެވެ.
ރައީސްގެ ކާރުކޮޅު ޕީޕީއެމްގެ މުޒާހަރާގެ މެދުގައި ތާށިވެ ރޭ 11:00 ހާއިރެވެ. އެއްވެސް ކޮޅަކަށް ކާރު ނުދުއްވައި ގާތްގަނޑަކަށް 15 ވަރަކަށް މިނެޓު، ޕީޕީއެމް އޮފީސް ކުރިމަތީ މަޑުކޮށްގެން އޮތް ކަމަށްވެ އެވެ. ރައީސްގެ މޮޓޯކޭޑަށް ހުރަސްއެޅި ކަމަށް ބުނެ ހަތަރު މީހަކު ފުލުހުން ވަނީ ހައްޔަރުކޮށްފަ އެވެ.
މި މައްސަލައާ ގުޅިގެން ހަތަރު މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. ހައްޔަރުކުރި ހަތަރު މީހުންގެ ބަންދާމެދު ގޮތެއް ނިންމުމަށް އިއްޔެ ކޯޓަށް ގެންދިއުމުން، އޭގެތެރެއިން ދެ މީހެއްގެ ބަންދަށް ފަސް ދުވަސް އަދި އަނެއް ދެ މީހުންގެ ބަންދަށް 15 ދުވަސް ކޯޓުން ދީފައިވާ ކަމަށެވެ. މި މައްސަލާގައި ހައްޔަރުކޮށްފައިވަނީ އަންހެނަކާއި ތިން ފިރިހެނުންނެވެ.
