ރައީސުލްޖުމްހޫރިއްޔާގެ ދެކަނބަލުން ދަތުރު ކުރައްވަމުން ދިޔަ ކާރުކޮޅު ރޭ އިދިކޮޅުން ކުރި މުޒާހަރާގެ މެދުގައި "ތާށިވި" މައްސަލައިގައި ޕްރެޒިޑެންޝަލް ގާޑްސްގެ ކޮމާންޑިން އޮފިސަރު އަބްދުﷲ މުހައްމަދު ވަޒީފާއަށް ނިކުތުން މަނާކޮށް، ކަންތައް ހިނގައިދިޔަ ގޮތް ބެލުމަށް ސީރިއަސް ތަހުގީގެއް އިއްޔެ ވަނީ ފަށައިފަ އެވެ.

އެ މައުލޫމާތު އެނގޭ މީހަކު، ނޫހުގައި ނަން ނުޖެހުމަށް އެދި "އަދަދު" އާ ވާހަކަ ދައްކަމުން ބުނީ، ރައީސް އިބްރާހިމް މުހައްމަދު ސޯލިހާއި އެމަނިކުފާނުގެ އަނބިކަނބަލުން ފަޒްނާ އަހުމަދު ހުޅުމާލޭގައި އޮތް ހަފުލާއަކަށް ވަޑައިގަތުމަށްފަހު، އެނބުރި މުލިއާގެއަށް ދަތުރުކުރައްވަނިކޮށް އިދިކޮޅު ޕީޕީއެމުން އޮފީސް ކުރިމަތީގައި ކާރުކޮޅު ހުއްޓަން ޖެހުނު މައްސަލަ ސިފައިންގެ ވެރިން ނަގަނީ ވަރަށް ސީރިއަސްކޮށް ކަމަށެވެ.

އެ މައްސަލައިގައި ކޮމާންޑިން އޮފިސަރު އަބްދުﷲ މުހައްމަދުގެ އިތުރުން އޭނާގެ ދަށުން މަސައްކަތް ކުރާ ބައެއް އެހެން ސިފައިންގެ މީހުން ވެސް ވަނީ ސަސްޕެންޑުކޮށްފަ އެވެ. އެ މައްސަލަ ސިފައިންގެ އިންޓާނަލް ކޮމެޓީއަކުން މިހާރު ތަހުގީގު ކުރަން ފަށާފައިވާއިރު އެ ކޮމެޓީ ޗެއާ ކުރައްވަނީ ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް އެވެ.

ރައީސްގެ ކާރުކޮޅު ޕީޕީއެމްގެ މުޒާހަރާގެ މެދުގައި ތާށިވެ ރޭ 11:00 ހާއިރެވެ. އެއްވެސް ކޮޅަކަށް ކާރު ނުދުއްވައި ގާތްގަނޑަކަށް 15 ވަރަކަށް މިނެޓު، ޕީޕީއެމް އޮފީސް ކުރިމަތީ މަޑުކޮށްގެން އޮތް ކަމަށްވެ އެވެ. ރައީސްގެ މޮޓޯކޭޑަށް ހުރަސްއެޅި ކަމަށް ބުނެ ހަތަރު މީހަކު ފުލުހުން ވަނީ ހައްޔަރުކޮށްފަ އެވެ.

އެރޭގެ މުޒާހަރާގެ ތެރެއިން ހައްޔަރުކުރި މީހުންގެ ތެރެއިން ކޯޓަށް ނުގެންގޮސް ދޫކޮށްލީ ޕީޕީއެމްގެ ނައިބު ރައީސް އަހުމަދު ޝިޔާމް އެކަންޏެވެ. ޝިޔާމް ފިޔަވައި ހައްޔަރު ކުރި 21 މީހުން ކޯޓަށް ގެންދިޔުމުން، ރައީސްގެ މޮޓޯކޭޑަށް ހުރަސް އެޅިކަމުގެ ތުހުމަތުގައި ހައްޔަރުކޮށްފައި ހުރި ހަތަރު މީހެއްގެ ބަންދު އިތުރުކުރި އެވެ. އަނެއް 17 މީހުން ކޯޓުން ވަނީ ދޫކޮށްލައިފަ އެވެ.

ފުލުހުން ބުނި ގޮތުގައި ހައްޔަރުކުރި ހަތަރު މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން، އޭގެތެރެއިން ދެ މީހެއްގެ ބަންދަށް ފަސް ދުވަސް އަދި އަނެއް ދެ މީހުންގެ ބަންދަށް 15 ދުވަސް ކޯޓުން ދީފައިވާ ކަމަށެވެ. މި މައްސަލާގައި ހައްޔަރުކޮށްފައިވަނީ އަންހެނަކާއި ތިން ފިރިހެނުންނެވެ.

މުހިންމު ބައެއް ހަބަރު

• އެމްޑީޕީގެ ރައީސް މުހައްމަދު ނަޝީދުގެ ތާއީދާ ނުލާވެސް، އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު، ކުރިއަށް އޮތް ރިޔާސީ އިންތިހާބު އެއްބުރުން ކާމިޔާބު ކުރައްވާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލު ވިދާޅުވި އެވެ.

• މިހާރު ވެރިކަންކުރާ ކޯލިޝަނުގައި ހިމެނޭ ޕާޓީތަކުން ކުރިއަށް އޮތް ރިޔާސީ އިންތިހާބާ ހަމައަށް އެކުގައި ސަރުކާރާ އެކު ނުތިބެވޭނަމަ ކޯލިޝަން އެއްބަސްވުން ނިމުމަކަށް ގެންނަން ޖެހޭ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ.

• ގދ. މަޑަވެލީ މަގުމަތީ އަންހެނަކު ދަމާފައި ގެނެސް، އެ އަންހެން މީހާއަށް އަނިޔާކުރި ފިރިހެނަކު ފުލުހުން ހައްޔަރުކުރި އެވެ.

• ގދ. މަޑަވެލީ މަގުމަތީގައި ފިރިހެނަކު އަނިޔާކުރި އަންހެން މީހާއަށް ރައްކާތެރިކަން ފޯރުކޮށްދީފައިވާ ކަމަށް ޖެންޑާ މިނިސްޓްރީއިން ބުނެފި އެވެ.

• ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރުގެ މަގާމަށް އައްޔަނު ކުރިތާ އެއް ދުވަސް ނުވަނީސް އިމިގްރޭޝަން ކޮންޓްރޯލަރުގެ މަގާމުގައި ވެސް ހުންނެވި މުހައްމަދު އަހްމަދު (ހަނަފީ) އެ ޕާޓީން ވަކިވެއްޖެ އެވެ.

ދުވަހުގެ ކޯޓޭޝަން

އެމްޑީޕީގެ ރައީސް މުހައްމަދު ނަޝީދުގެ ތާއީދާ ނުލާވެސް، އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު، ކުރިއަށް އޮތް ރިޔާސީ އިންތިހާބު އެއްބުރުން ކާމިޔާބު ކުރައްވާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލު އިއްޔެ ވިދާޅުވި އެވެ. އޭނާ އިތުރަށް ވިދާޅުވީ؛

އެންމެން ބޭނުންވާ ހުރިހާ ކަމެއް ހާސިލް ނުވެދާނެ، ދެމީހުންނަށް އެއްފަހަރަކާ ވެރިކަމެއް ނުކުރެވޭނެ، އެހެންވީމާ އެކަންކަމަށް ވިސްނާވަޑައިގެން އަޅުގަނޑުމެން ދިވެހިރާއްޖެއާއި ދިވެހި ގައުމާއި، ދިވެހި ރައްޔިތުންނަށްޓަކާ ކުރިއަށް ދެވޭނެ ގޮތެއް ހޯދަން އެބަޖެހޭ،"

ދުވަހުގެ ފޮޓޯ

2023 ގެ ރިޔާސީ އިންތިހާބަށް ރައީސް ސޯލިހު ހައްދަވާފައިވާ ކޯލިޝަންގެ ބައިވެރިންނާއެކު އިއްޔެ ބޭއްވި ބައްދަލުވުން. -- ފޮޓޯ: ރައީސް އޮފީސް