އިދިކޮޅުން ރޭ ކުރިއަށް ގެންދިޔަ މުޒާހަރާގެ ތެރެއިން ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް ހުރަސްއެޅި މައްސަލާގައި ހައްޔަރުކުރި ހަތަރު މީހުންގެ ބަންދުގެ މުއްދަތު ކޯޓުން އިތުރުކޮށްފި އެވެ.
ފުލުހުން ބުނި ގޮތުގައި ހައްޔަރުކުރި ހަތަރު މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން، އޭގެތެރެއިން ދެ މީހެއްގެ ބަންދަށް ފަސް ދުވަސް އަދި އަނެއް ދެ މީހުންގެ ބަންދަށް 15 ދުވަސް ކޯޓުން ދީފައިވާ ކަމަށެވެ. މި މައްސަލާގައި ހައްޔަރުކޮށްފައިވަނީ އަންހެނަކާއި ތިން ފިރިހެނުންނެވެ.
މީގެއިތުރުން ރޭގެ މުޒާހަރާގެ ތެރެއިން ފުލުހުން ހައްޔަރުކުރި އިތުރު 17 މީހަކު ކޯޓަށް ހާޒިރުކުރުމުން ޝަރުތުތަކަކާއެކު ކޯޓުން ދޫކޮށްލާފައިވާ ކަމަށްވެސް ފުލުހުން ވަނީ ބުނެފަ އެވެ. ރޭގެ މުޒާހަރާގެ ތެރެއިން ޕީޕީއެމްގެ ނައިބު ރައީސް އަހުމަދު ޝިޔާމް ވެސް ހައްޔަރުކުރި އެވެ. ނަމަވެސް ރޭގެ ވަގުތެއްގައި ޝިޔާމް ވަނީ ދޫކޮށްލާފަ އެވެ.
ފުލުހުން އިތުރަށް ބުނީ މި މައްސަލަ އަދިވެސް ތަހުގީގު ކުރަމުންދާ ކަމަށެވެ. މީޑިއާތަކަށް މައުލޫމާތު ދެއްވަމުން ރައީސް ސޯލިހު މިއަދު ހަވީރު ވިދާޅުވީ، މި ހާދިސާއާ ގުޅިގެން ފުލުހުން ތައްޔާރުކުރި ރިޕޯޓު މިއަދު ހަވީރު އެމަނިކުފާނަށް ލިބިފައިވާ ކަަމަށެވެ.
ރައީސްގެ މޮޓޯކޭޑަށް އިދިކޮޅު މުޒާހަރާގެ ބައިވެރިން ހުރަސްއެޅީ ރޭ 11:00 ހާއިރު ރައީސް ސޯލިހުގެ ދެކަނބަލުން، ބައިނަލްއަގުވާމީ އަންހެނުން ދުވަސް ފާހަގަކުރުމަށާއި ރެހެންދި އެވޯޑު ދިނުމަށް ހުޅުމާލޭގައި އޮތް ހަފުލާއަށްފަހު މާލެ ވަޑައިގެންނެވި ވަގުތުގަ އެވެ.
މިކަމާ ގުޅިގެން ޕްރެޒިޑެންޝަލް ގާޑްސްގެ ކޮމާންޑިން އޮފިސަރު އަބްދުﷲ މުހައްމަދު ވަޒީފާއަށް ނުކުތުން މަނާކޮށް، ކަންތައް ހިނގައިދިޔަ ގޮތް ބެލުމަށް ސީރިއަސް ތަހުގީގެއް ފަށާފައިވާ ކަމަށް މިއަދު އެމްއެންޑީއެފް އިން ވަނީ ބުނެފަ އެވެ.
އެ މައްސަލާގައި ކޮމާންޑިން އޮފިސަރު އަބްދުﷲ މުހައްމަދުގެ އިތުރުން އޭނާގެ ދަށުން މަސައްކަތް ކުރާ ބައެއް އެހެން ސިފައިންގެ މީހުން ވެސް ވަނީ ސަސްޕެންޑުކޮށްފަ އެވެ. އެ މައްސަލަ ސިފައިންގެ އިންޓާނަލް ކޮމެޓީއަކުން މިހާރު ތަހުގީގު ކުރަން ފަށާފައިވާއިރު އެ ކޮމެޓީ ޗެއާ ކުރައްވަނީ ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް އެވެ.
އެމްއެންޑީއެފްގެ އެތެރޭގެ ތަހުގީގެއްގެ އިތުރުން، އެ ހާދިސާގައި އިހުމާލުވި ފަރާތެއް ބެލުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ވެސް ވަނީ ނިންމައިފަ އެވެ.
