މާރާމާރީއަކާ ގުޅިގެން ފުލުހުން ހޯދަމުން ދިޔަ މީހަކު ފޮރުވައިގެން ގެންގުޅުނު ތުހުމަތުގައި, މާލޭގައި އޮޕަރޭޓްކުރާ ބޮޑު ގޭންގެއްގެ އިސް ހަތަރު މީހަކު ކޯޓު އަމުރުގެ ދަށުން މިރޭ ހައްޔަރުކޮށްފި އެވެ.
މި ތުހުމަތުގައި ބަޔަކު ހައްޔަރު ކުރިކަން ފުލުހުން ކަށަވަރުކޮށްދެ އެވެ. ނަމަވެސް އެއީ ކޮން ބައެއް ކަމެއް، އަދި ކިތައް މީހުން ކަމެއް ނުބުނެ އެވެ. އަދި ފޮރުވައިގެން ގެންގުޅު ކަމަށް ތުހުމަތު ކުރާ މީހާއަކީ ކާކު ކަމެއް ވެސް ފުލުހުން ނުބުނެ އެވެ.
"ފުލުހުން ތަހުގީގު ކުރަމުންދާ މާރަމާރީއާ ގުޅުންހުރި މައްސަލައެއްގައި މިރޭ ވަނީ ކޯޓު އަމުރެއްގެ ދަށުން ހަތަރު މީހަކު ހައްޔަރު ކޮށްފައި،" ފުލުހުންގެ މީޑިއާ އޮފިޝަލް ވިދާޅުވި އެވެ.
"އަދަދު" ނޫހަށް އެނގިފައިވާ ގޮތުގައި މިރޭ މީހުން ހައްޔަރުކޮށްފައި ވަނީ ގޭންގު މާރާމާރީއަކާ ގުޅިގެން ފުލުހުން ހޯދާ، ސ. މަރަދޫފޭދޫ، ރަށްދެބައިގެ، އިބްރާހީމް ފައިހު ނިޒާމު، 25، ފޮރުވައިގެން ގެންގުޅުމުގެ ތުހުމަތުގަ އެވެ.
ފައިހު ހޯދަމުން ދަނީ މިދިޔަ ޖެނުއަރީ، 14 ވަނަ ރޭގެ ދަންވަރު މާލޭގެ ކެފޭއަކަށް ވަދެ މީހަކު ޒަހަމުކޮށްލި ކަމަށް އޭނާގެ މައްޗަށް ތުހުމަތު ކުރެވޭތީ ކަމަށް މި ނޫހަށް ވަނީ އެނގިފަ އެވެ.
ދުވަސްތަކެއްގެ މެދުކެނޑުމަކަށް ފަހު ގޭންގު މާރާމާރީތައް އިތުރުވެފައި ވާއިރު، މިދިޔަ މަހު ވެސް މާފަންނު، މުރަނގަ މަގުގައި ހުރި ފިހާރައެއްގެ ތެރޭގައި ތޫނު ހަތިޔާރު ބޭނުންކޮށްގެން ޒުވާނަކު ވަނީ ޒަހަމު ކޮށްލައިފަ އެވެ. އެ ޒުވާނާއަށް އައިޖީއެމްއެޗުގައި ފަރުވާ ދެމުން ދަނިކޮށް އޭގެ ތިން ދުވަސްފަހުން ވަނީ މަރުވެފަ އެވެ.
އެ މައްސަލައާ ގުޅިގެން ފުލުހުންގެ ކޮމިޝަނަރު، މުހައްމަދު ހަމީދު ވިދާޅުވީ އެއީ މާލޭގެ ހެންވޭރު ކޮޅުގައި ހަރަކާތްތެރިވާ 'ކުޑަހެންވޭރު' ނަމަކަށް ކިޔާ ގޭންގަކާއި މައްޗަންގޮޅީގައި ހަރަކާތްތެރިވާ 'އެންސީ' ކިޔާ ގޭންގާ ދެމެދު ހިނގި މާރާމާރީއެއް ކަމަށެވެ.
