އިންތިހާބުތަކުގެ އާންމު ގާނޫނަށް ހުށަހަޅާފައިވާ އިސްލާހު ފާސްކުރިޔަސް، ކުރިއެކޭ އެއްފަދައިން ނޫސްވެރިންގެ ދައުރު އޮންނާނެ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.
އިންތިހާބާ ބެހޭ ގައުމީ ލަފާ ދޭ ކޮމިޓީގެ ބައްދަލުވުމުގައި އެ ކޮމިޝަންގެ ނައިބު ރައީސް އިސްމާއީލް ހަބީބު ވަނީ އިންތިހާބުތަކުގެ ގާނޫނަށް ހުށަހަޅާފައިވާ ބައެއް އިސްލާހުތަކާއި ބަދަލު ގެންނަން ބޭނުންވާ ސަބަބު ވިދާޅުވެފަ އެވެ.
ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު ހުށަހަޅުއްވާފައިވާ އިންތިހާބުތަކާ ބެހޭ އާންމު ގާނޫނު އިސްލާހު ކުރުމުގެ ބިލުގައިވާ ގޮތުން ވޯޓު ނަގާ ދުވަހު ވޯޓުލުމުގެ ކަންކަން މޮނިޓަރު ކުރުމަށް ވޯޓުލާ ސަރަހައްދާއި ގުނާ ސަރަހައްދުތަކުގައި ހަރަކާތްތެރިވެވޭނީ އިލެކްޝަންސް ކޮމިޝަނުން ހުއްދަ ދީފައިވާ "ރެޖިސްޓާޑް ނޫސްވެރިން" ކަމަށެވެ.
ރަޖިސްޓްރީ ކޮށްފައިވާ ނޫސްވެރިން ކަމަށް ބިލުގައި ބަޔާން ކޮށްފައިވަނީ ރަޖިސްޓްރީ ކޮށްފައިވާ އެއްވެސް މީޑިއާއެއް ނުވަތަ ބްރޯޑްކާސްޓިން ކޯޕަރޭޝަނެއްގައި ހަބަރު ފޯރުކޮށްދިނުމުގައި ހަރަކާތްތެރިވާ ފަރާތްތަކަށެވެ. އޭގެ ތެރޭގައި ފޮޓޯގްރަފަރުންނާއި ވީޑިއޯގްރަފަރުން ވެސް ހިމެނޭނެ ކަމަށް ބުނެފައިވެ އެވެ.
މި މާއްދާއާ ގުޅިގެން ގިނަ ބައެއްގެ ފާޑުކިޔުން އަމާޒުވެފައި ވަނިކޮށް، ބިލު ދިފާއު ކުރައްވައި ހަބީބް ވިދާޅުވީ ބިލަށް ގެންނަ ހުރިހާ އިސްލާހަކަށް ޖުމްލަކޮށް ބަލާއިރު، ނޫސްވެރިންގެ ހައްގު އަދާކުރުމަށް އޮންނަ ދައުރު ފުޅާ ވެގެން ދާނެ ކަމަށެވެ.
ބިލުގައި ބުނެފައިވާ "ރެޖިސްޓާޑް ނޫސްވެރިން" ހަބީބް ސިފަ ކުރެއްވީ ރެޖިސްޓާ ކޮށްފައިވާ ނޫސްތައް ތަމްސީލު ކުރާ ނޫސްވެރިންގެ ގޮތުގަ އެވެ.
"މިހާރު ވެސް [ގާނޫނުގައި އޮތީ] ރެޖިސްޓްރީކޮށްފައިވާ ނޫސްވެރިންނަށް ފުރުސަތު މި ދެނީ، ރެޖިސްޓްރީ ނުކުރާ މަގުމަތިން އަންނަ މީހަކު ތިމަންނައަކީ ރިޕޯޓަރެކޭ ބުންޏަސް އަޅުގަނޑުމެން އެކަމެއް ނުކުރަން، ކުރީގައި ވެސް ނުކުރަން، ކުރިއަށް އޮތް ތަނުގައި ވެސް ނުކުރާނަން،" ހަބީބް ވިދާޅުވި އެވެ.
މޮނިޓަރުންގެ ގޮތުގައި ބައިނަލްއަގްވާމީ އޮބްޒާވަރުންނާއި ނޫސްވެރިންނަށް ވެސް ހަރަކާތްތެރިވެވޭނެ ކަމަށާއި މި މަހުގެ 25 ވަނަ ދުވަހު އެކަމަށް ހުޅުވާލާނެ ކަމަށް ވެސް ވިދާޅުވި އެވެ.
ނޫސްވެރިންނަށް އެ ފުރުސަތު ފަހިވެފައި އޮތް ނަމަވެސް އޮބްޒާވަރުންގެ ގޮތުގައި ހަރަކާތްތެރިވާ ނޫސްވެރިން، އިލެކްޝަންސް ކޮމިޝަނުން އެކްރެޑިޓް ކުރާނެ ކަމުގައި އޭނާ ފާހަގަކުރެއްވި އެވެ. އެގޮތުން ދެ ގަޑިއިރުގެ ޕްރޮގްރާމެއް ފުރިހަމަ ކުރަން ޖެހޭނެ ކަމަށް ވިދާޅުވި އެވެ.
އޭނާ ވިދާޅުވީ މިކަން ކުރަން ޖެހުނު ސަބަބަކީ ބައެއް ސިޔާސީ ނުފޫޒު އޮންނަ މީހުންނާއި އެ ހިޔާލުތަކުގެ މީހުން ވެސް ރިޕޯޓަރުންގެ ގޮތުގައި ހަރަކާތްތެރިވެ، ހަމަނުޖެހުން ހިންގަން މަސައްކަތް ކޮށްފައިވާތީ ކަމުގަ އެވެ.
"ކޮމިޝަނުގެ ވިސްނުމަކީ މި ބޭފުޅުން [ނޫސްވެރިން]ގެ ދައުރު ފުރިހަމައަށް ކިޔައިދެވިފައި ނެތީމަ އޭ މި ގޮތަށް މި ހިނގަނީ، އެހެންވީމާ ކޮމިޝަނުން ނިންމީ ދެ ގަޑިއިރެއްހާ އިރުގެ ޓްރެއިނިން ޕްރޮގްރާމެއް ފޭސް ޓު ފޭސް ކޮށް ނުވަތަ އޮންލައިން ކޮށް ހިންގަން،" އޭނާ ވިދާޅުވި އެވެ.
ރާއްޖެއިން ބޭރުން އަންނަ ނޫސްވެރިން ވެސް އެކްރެޑިޓް ކުރާނީ މި ތަމްރީނު ފުރިހަމަ ކުރުމުން ކަމަށް އޭނާ ވިދާޅުވި އެވެ.
ހަބީބް އިތުރަށް ވިދާޅުވީ އިންތިހާބުގައި ނޫސްވެރިންގެ ދައުރު ހަނިކުރުމުގެ އެއްވެސް ވިސްނުމެއް އިލެކްޝަންސް ކޮމިޝަނުގައި ނެތް ކަމަށެވެ.
